2 Samueli 12 - Wunta Mempori

Pongkuahakono i Nata, tepidino i Daudi

¹ I Nata Dotenao i Ue lumako ndi Daudi. Haweomo ndi Daudi ka ipotae, ”Hinao orua mia a asa kota, asa mia mompoli ka aasa mongkokolaro.

² Anu mompoli tedoa hadio bembe bimba, ka sapino.

³ Anu mongkokolaro nahina hapa-hapano sangkadio aasa ana bimba waino anu kodei, anu inolino ka ipekariao. Anano bimba atuu langkaiomo ndi onae ka luwuno anano, mongkaa inso a ngkaangano anu tedei, mo'inu inso a sangkirino ka moturi a wawo mpa'ano, kana anano anu beine.

⁴ Asa mia melakopi hawe a mia mompoli atuu. Nahi haweako aroano umalao aasa inso a asa bawaa bembe bimbano ke sapino, ta ninahuako mia melakopi anu hawe ndi onae atuu. Onaemo ka i'alao ana bimba waino anuno mia mongkokolaro ka inahuakono mia anu hawe ndi onae atuu.”

⁵ I Daudi tedoa tekuda a mia atuu ka ipotaeakono i Nata, ”Ia nee-Do i Ue anu tuwu: mia anu moweweu atuu asalakono ta mate!

⁶ Anano bimba waino atuu asalakono inowahi, euno meluka opaa hangano iweweuomo anu kanatuu ka nahina pompehohawano.”

⁷ Ka i'amba motae i Nata ndi Daudi, ”Omuemo mia atuu! Kanandiomo pau-Do i Ue, Ue Alado to Isaraeli: Ongkuemo anu umurapiko gagi mokoledo to Isaraeli ka Ongkuemo anu motolako inso a ngkaeno i Saulu.

⁸ Kuweeakomumo luwuno ihino rahano uemu, ka luwuno beineno uemu gagi tiamu. Kuweeakomumo tongku Isaraeli ka Yehuda. Tewala atuu napi upesompoo, Aku tumiangiakomu tehadio mbo'u.

⁹ Tembio kau pokongkodei Ira i Ue ka upoweweu anu mosa'o a pongkita-Do? I Uria to Heti atuu upepateakono ponai. Beineno u'alao gagi beinemu, ka onae upepateakono ponaino inuleno i Amoni.

¹⁰ Onaemo pu'uno, ponai nahi ta otu umaropi ira inulemu ranta ntinuwu, hangano upokongkodei Akumo ka u'alao kombiano i Uria, to Heti atuu ka ukombiao.

¹¹ Kanandiomo pau-Do i Ue: Aku moweeko masukaraa inso a somborimu omuemu. Aku umala ira beinemu i aromu ka meweengako ira a mia susua. Onae ta me'asa mpoturiako ira kombiamu tempono meene.

¹² Hangano uweweuomo mewuni-wuni, sine Aku weweuo anu atuu i arodo luwuno to Isaraeli tempono meene.”

¹³ Ka i'amba motaeomo i Daudi ndi Nata, ”Tehala akumo ndi Ondae i Ue.” Motae i Nata ndi Daudi, ”Ondae i Ue Do'oniniomo halamu, nahi komate.

¹⁴ Maupo kanandio, hangano tedoako ntu'u mokongkodei Ira i Ue ka upoweweu kanandio, asalakono nana'ote anu ta hina atuu ta mate.”

¹⁵ Mekuleomo i Nata i rahano. Ka Do'amba i Ue tumotonaao anano i Daudi anu pine'anaakono kombiano i Uria, ranta kai mahaki.

¹⁶ Ka i'amba i Daudi mekakaiakono nana'ote atuu ndi Ondae Ue Ala. Onae mepuasa ntu'u inso i aroano, mewinso i bolongko ka asa wongi i pepombole a wita.

¹⁷ Ka do'amba mehawe mia memota'u langkanae ndi onae dome'emao ka ipewangu inso a wita, sine nahi behe. Onae mbo'u nahi behe mongkaa saru ondae.

¹⁸ Ko'opitu oleono nana'ote atuu mate. Luwuno pegawaino i Daudi medoito ira mempauakono, nine nana'ote atuu mateomo, hangano mpotae ira, ”Tempono da tuwu nana'ote atuu, to mempauakonomo, sine nahi perioo pinauto. Kana'umpe ka kita mokopauakono: Nana'ote atuu mateomo? Ta mansa sumolangio koroino!”

¹⁹ Tempono ikita ira i Daudi pegawaino mpetanga-tanga, ipokonto'oriomo, nine nana'ote atuu mateomo. Ka i'amba i Daudi Sumikeno ira pegawaino, ”Mateomoke nana'ote atuu?” Domesangkio, ”Mateomo.”

²⁰ Mewanguomo I Daudi inso a horo, ka i'amba medolo, memina-mina ka i'euo sangkano. Mewinso a laro Raha-Do i Ue ka ipenggolontu mesomba. Umari atuu mekule i raha, hangano po'emano pinatindaako kaanga, ka i'amba mongkaa.

²¹ Mpotae iramo pegawaino ndi onae, ”hapake anu wineweumiu andio? Tempono da ituwu nana'ote atuu, puasa ka mengese komiu, sine mansano nana'ote atuu mate mewangu komiu ka ipongkaa!”

²² Sangkino, ”Tempono nana'ote atuu da tuwu, puasa aku ka mengese aku, hangano kupewowoloo, ’Ba mansa Dopehohawa aku i Ue ranta ka ikongko tuwu nana'ote atuu.’

²³ Sine kanandio-andio mateomo, tembio ka asalakono aku puasa? Nde da aku mokompokuleo mbo'uke? Ongkue anu ta lumako ndi onae, sekono onae nahi ta mekule ndi ongkue.”

²⁴ Ka i'amba i Daudi tumareroo aroano i Batiseba, kombiano. Irangkuhio ka ipe'asa mpoturiakono. Beine atuu me'anaako asa ana ntama ka ineeakono i Salomo. Ondae i Ue mehohawao nana'ote andio

²⁵ ka molalo i nabi Nata, onae nineeako i Yedidia, a mpo'ehe-Do i Ue.

Poko'ariano pe'iwalia umewai ira inuleno i Amoni

²⁶ I Yoabi me'iwaliakono Raba, kotado inuleno i Amoni, ka irontuo kota poparentaa atuu.

²⁷ Ka i'amba i Yoabi montena mia lumako ndi Daudi mowawa pe'oliwi, ”Metea aku umewaio Raba ka kupongko'alao bente uwoino.

²⁸ Kanandio-andio pumpu iramo toreano sorodadu, sapoiomo kota atuu ka rontuomo, kasi ongkue anu rumontuo kota atuu ka neeku gagi neeno kota atuu.”

²⁹ Onaemo ka ipumpu ira i Daudi luwuno sorodadu kai lako i Raba. Isapoio ka ipongko'alao.

³⁰ I alao songko mokole inso a uluno mokoledo, mobeano asa talenta wulaa, meramba-rambaako watu paramata anu masuli olino. Ka i'amba songko mokole atuu pinokonaako a uluno i Daudi. Onae mowawa hadio ntu'u pinomuru inso a ngkota atuu.

³¹ Palili i kota atuu iwawa ira ka idadai ira mpo'anggaako garagadi, pontande labu, ka uase. Ipopo'angga ira mbo'u a mpoweweua watu tela. Kanandio koa mbo'u iweweuo i Daudi a luwuno kota inuleno i Amoni. Umarino atuu i Daudi mekule saru luwuno sorodadu i Yerusale.