2 Samueli 11 - Wunta Mempori

I Daudi rumontuo i Batiseba

¹ A mpe'euano ta'u, a tempono luwuno mokole wela melako mpetea, i Daudi tumenao i Yoabi lumako saru luwuno miano ka luwudo to Isaraeli. Domeropu ira inuleno i Amoni, ka domengkaduo kota Raba, sekono i Daudi mo'ia i Yerusale.

² Pohona tempono ngkiniwia, i Daudi mewangu inso a mpoturiano, ka i'amba melempa-lempa a dunsino langkanae. Ikitao inso a dunsi atuu aasa beine tekonai medolo. Beine atuu tedoa tekosi.

³ I Daudi montena mia ka dompesisikeno mongkona beine atuu. Mpotae iramo mia atuu, ”Komba onaeke i Batiseba anano i Eliami, kombiano i Uria to Heti?”

⁴ Umari atuu montenaomo mia i Daudi umalao i Batiseba. Beine atuu aiwa ndi onae ka i Daudi mewowaliakono. Beine atuu da'iaopo umari umaluo wulano. Ka i'amba beine atuu mekuleomo i rahano.

⁵ Nahi tehine beine atuu mentia, ka ipontena mia pauo pe'oliwino ndi Daudi, ”Mentia aku.”

⁶ Ka i'amba i Daudi montena mia lumako ndi Yoabi ka ipe'oliwi, ”Tenao i Uria, to Heti atuu, aiwa ndi ongkue.” I Yoabi tumenao i Uria me'aro ndi Daudi.

⁷ Tempono i Uria mewinso me'aro ndi onae, mesikeno i Daudi mongkona i Yoabi ka sorodaduno saru teweweuno peteaa.

⁸ Ka i'amba i Daudi motaeakono i Uria, ”Pekulemo i rahamu ka uwo'ohio karumu.” I Uria meluarako inso i langkanae, tinonda lembuiako pompoweedo mokole.

⁹ Sine, i Uria mepombole umpeda a mpewowa langkanae saru luwuno atano ueno ka nahi pekule i rahano.

¹⁰ Ka i'amba domempauakono i Daudi, kanandio, ”I Uria nahi pekule i rahano.” Motae i Daudi ndi Uria, ”Nde nahi da'iaopo upekule ke inso a pelempaamu? Tembio ka nahi upekule i rahamu?”

¹¹ Sine sumangki i Uria ndi Daudi, ”Burua saru to Isaraeli ka to Yehuda mpo'ia a laro laika, kanatuu koa mbo'u ondae ueku i Yoabi saru luwuno atado ueku mpekema a mpada. Kana'umpe ka aku mekule i rahaku, mongkaa, mo'inu ka moturi saru beineku? A ntinuwumiu ka penaa miu, nahi aku weweuo anu kanatuu!”

¹² Motae i Daudi ndi Uria, ”Po'iamo oleo andio i ndi'ai. Tisomo aku tumenako lumako.” Mo'iaomo i Uria oleo atuu i Yerusale. Tisomono,

¹³ i Daudi moboio ka dopongkaa ka mo'inu. I Daudi mokomolanguo. Mansano woongi meluarako i Uria ta moturi, a pepomboleano, saru luwuno atano ueno. Onae nahi pekule i rahano.

¹⁴ Mo'oruno i Daudi moburi wunta ndi Yoabi ka ioliwio molalo i Uria.

¹⁵ A laro wunta atuu iburio kanandio, ”Naao i Uria i arono a mpeteaa anu tedoa langkai, ka i'amba mposuka me'olaiakono, ka imate pinepate.”

¹⁶ Tempono domengkaduo kota Raba, i Yoabi tumenao i Uria lumako a mpo'ianga anu ito'orio hinao iwali anu moroso ka mosia.

¹⁷ Tempono luwuno mia i kota atuu mpeluarako mpe'iwaliakono i Yoabi, memate iramo ba opia sorodadu inso i olono miano i Daudi; ka i Uria to Heti atuu mate mbo'u.

¹⁸ Ka i'amba i Yoabi montena mia lumako pauakono i Daudi pelempano peteaa atuu.

¹⁹ Ipoweakono pontiso a mia tinena atuu, kanandio, ”Tewala umarikomo mohaweo luwuno pelempano peteaa atuu ndi ondae mokole

²⁰ ka tewala tekuda ira mokole ka dopotae ndi omue: Tembio ka i mpe'iwali umpeda a ngkota atuu? Nahi mento'orio ke nine ira mpepana mia inso i wawono bente?

²¹ Isemake anu mepateo I Abimele anano i Yerubese? Kombake asa beine anu dumunsiakono watu pogilia inso a wawo bente ranta kai mate i Tebesi? Tembio kai me'umpeda lahi a bente atuu? Tewala kanandio asalakono kau pauo: Atamiu i Uria, to Heti atuu, mate koa mbo'u.”

²² Lumakoomo mia tinena atuu ka mansano hawe, ipohaweo ndi Daudi luwuno anu iparentaakono i Yoabi ndi onae.

²³ Motaeomo mia tinena atuu ndi Daudi, ”Mia atuudo memokora irapo sekono omami ka mpeluarako ira sumapoi kami a mpo'ianga anu malua. Sine omami wali sumapoi ira hawe a mpewinsoa pewowa langkai.

²⁴ Tempo atuu luwuno puu pompana mpotolao panado te'aro a luwuno atamiu inso i wawono bente ranta ba opia ira atamiu mokole mate, ka atamiu i Uria, to Heti atuu mate mbo'u.”

²⁵ Motae i Daudi a mia tinena atuu, ”Kanandio ba upauakono i Yoabi: ’Si pe'o'oleakono anu gagiomo atuu, hangano leleoomo ponai mompepate isuamokoa. Pokomorosoomo posapoimiu a ngkota atuu ka imehoao.’ Kanandio asalakono ka upokomorosoakono aroano!”

²⁶ Tempono kombiano i Uria rumongeo nine i Uria, tamano, mateomo, monsabangiomo hangano mateno tamano.

²⁷ Mansano laloomo tempo mo'inombo, I Daudi montena mia wawao beine atuu i rahano. Onae gagiomo kombiano ka ipe'anaakono asa anano tama. Sine, anu wineweuno i Daudi atuu mosa'o a pongkita-Do i Ue.