2 Samueli 10 - Wunta Mempori

I Daudi me'iwaliako ira inuleno i Amoni ka to Arami

¹ Umari atuu mateomo mokoledo inuleno i Amoni, ka i Hanuni, anano anu tama, umeuo gagi mokole.

² Ka i'amba motaeomo i Daudi, ”Aku mopokitao petenunuku ndi Hanuni anano i Nahasi, kana dopopokitaomo amano petenununo ndi ongkue.” Onaemo ka i Daudi mo'oliwi pau pompemasusa ndi onae molalo luwuno pegawaino hangano mateno amano. Sine mansado mehawe pegawaino i Daudi a witado inuleno i Amoni,

³ mpotae iramo mia pinemota'u inuleno i Amoni ndi Hanuni, ”Kana'umpe pohawemu, nde lano ta melangkaio i Daudi amamu, ka ipontena mia ndi omue mowawa pau pompemasusa? Kombake butu ira me'aiwa memparesao kota andio, ka moporooo, ta kumansa-kansao ranta ka itena ira i Daudi pegawaino ndi omue?”

⁴ I Hanuni metena rumako ira pegawaino i Daudi atuu, kumeruo asa ntia danggodo ka poleio lembado mompu'u a ntongano hawe a taku mpurido, ka i'amba motola ira melako.

⁵ Mansano pinauako i Daudi mongkona andio, montenaomo mia lumako tepohaweako ira, nde mia atuudo tedoa mempinokoko'ii. Dopotae mokole, ”Impo'iamo i Yeriko ranta ka ituwu danggomiu, ka i'amba wali me'aiwa.”

⁶ Inuleno i Amoni dompokonto'orio nine tedoa do'o'aliako ira i Daudi, inuleno i Amoni montena mia montambo rua pulu nsowu sorodadu mpelempa karu inso a to Arami-Beti-Rehobo ka inso to Arami-Soba, asa nsowu mia inso a mokole wita Ma'aka ka hopulu ka orua nsowu inso i olodo to Tobi.

⁷ Rumongeo mongkona atuu, i Daudi tumenao i Yoabi lumako saru luwuno sorodadu puu mpetea.

⁸ Inuleno i Amoni melako ka mpo'atora baresi mpeteado i arono pewowa pewinsoa a mpewowa langkai, sekono to Arami inso i Soba ka inso i Rehobo, saru luwudo to Tobi ka Maaka singge ira mekongko a mpo'iangado i pada.

⁹ Mansano kumitao i Yoabi nine ponsapoi atuu ta sumolangio inso i arono ka i bungkuno, ibinikio asa ntia mia tebiniki inso i Isaraeli ka i'atorao baresi umaropi ira to Arami.

¹⁰ Sorodadu anu toreano inaa ira i totono petewawano i Abisai, uaino. I'atorao baresido ta umaropi ira inuleno i Amoni.

¹¹ Ka i'amba motae i Yoabi, ”Tewala to Arami memoroso irapo sekono ongkue, asalakono kau tulungi aku. Sine tewala inuleno i Amoni memoroso irapo sekono omue, aku koa aiwa tumulungiko.

¹² Pokorosoomo aroamu ka aiwamo tompokodatoo tinooto tiano tongkuto ka tiano luwuno kota-Do Ue Alato. Po'ineeomo Doweweuo i Ue anu moiko a pongkita-Do.”

¹³ Ka i'amba i Yoabi ka sorodadu anu perongano melako mpetea umewai ira to Arami ka luwuno mia atuudo mpolai inso i arodo.

¹⁴ Mansado mengkitao inuleno i Amoni nine to Arami mpolai iramo, ondae mbo'u mpolai inso i arono i Abisai ka mpewinso a laro ngkota. Ka i'amba i Yoabi mekule umarino meteaako ira inuleno i Amoni ka haweomo i Yerusale.

¹⁵ Mansano to Arami mengkitao nine mentenangi iramo a nto Isaraeli, mpepumpu iramo mperonga-ronga.

¹⁶ Ka i'amba i Hadadeseri montena to Arami anu i asa towano Koro Eparata melako mpetea. Mehawe ira i Helami petewawado i Sobaki, tadulako sorodaduno i Hadadeseri.

¹⁷ Mansano pinauako i Daudi mongkona atuu ipumpu ira luwudo to Isaraeli, ka do'amba mensakio Koro Yarade ka hawe i Helami. To Arami me'atorao baresido umaropio i Daudi ka dompetea umewaio.

¹⁸ Sine to Arami mpolai inso i arodo to Isaraeli. I olodo to Arami, i Daudi mompepate pitu nsowu sorodadu mpekareta, ka pato pulu nsowu sorodadu mpengara. I Sobaki, tadulako sorodadudo, ibelaio ranta ka imate i ra'ai.

¹⁹ Mansano luwuno mokole anu mpetuundu ndi Hadadeseri mengkitao nine to Isaraeli numangi ira, mpoweweu ira pesintuwua saru to Isaraeli ka mpetenunu ndi ondae. Umarino atuu, to Arami medoito iramo tumulungi ira mbo'u inuleno i Amoni.