2 Samueli 1 - Wunta Mempori

Lele mateno i Saulu irongeo i Daudi

¹ Mansano mate i Saulu, tempono ipekule i Daudi umarino numangi ira to Amale, mo'iaomo i Sikila orua oleo.

² Ia oleo anu ko'otolu haweomo asa mia sorodaduno i Saulu mesangka teberi-beri ka wita a uluno. Sahaweno ndi Daudi, menggolontuomo mesomba hawe i wita.

³ Mesikeno i Daudi ndi onae, ”Isuake insoamu?” Sangkino ndi ondae, ”Molai aku inso a nsorodadudo to Isaraeli.”

⁴ Motae i Daudi ndi onae, ”hapake anu gagi? Tutuluomo ndi ongkue.” Ipotae, ”Sorodadu mpolai iramo inso ia mpeteaa, hadio anu mate. I Saulu ka i Yonata, anano, mate ira koa mbo'u.”

⁵ Ka i'amba motae i Daudi a mangalitau anu mowawa lele ndi onae atuu, ”Kana'umpe kau to'orio motae i Saulu ka i Yonata anano, mate iramo?”

⁶ Mangalitau anu mowawa lele atuu, motae, ”Tekonai aku i mentorukuno Giliboa. Kukitao i Saulu metumboako kansaino, kontongaano kareta ka sorodadu mpengara anu meluluo umpeda iramo.

⁷ Mansano mewolili i bungkuno, ikita aku ka ipoboi aku. Motae aku, ’O, ueku.’

⁸ Mesikeno ira ndi ongkue, ’Isemake omue?’ Sumangki aku ndi ondae, ’Ongkue to Amale.’

⁹ Motae iramo ndi ongkue, ’Aiwamo ramai ka upepate aku, nde tedoa akumo mompemarasai, mokoa penaaku anu kongko.’

¹⁰ Kurangkuhi ira ka kupepate ira, nde kuto'orio, nami ira tuwu mansado tebangku. Ku'alao ramba-ramba uludo ka mala-mala a ngkaedo, ka kuwawao ndi omiu ueku.”

¹¹ Ka i'amba i Daudi uminio sangkano ka ipeberisakono, kanatuu koa mbo'u luwuno mia anu merongaakono.

¹² Mponsabangi ira, mpengese ka mempuasaakono i Saulu ka i Yonata anano, bawaa-Do i Ue ka suku Isaraeli, ranta sumoo oleo, hangano memateako iramo ponai.

¹³ Ka i'amba mesikeno i Daudi a mangalitau anu mowawa lele atuu ndi onae, ”Isuake insoamu?” Sangkino, ”Ongkue anano asa mia hawe, to Amale.”

¹⁴ Motae i Daudi ndi onae, ”Kana'umpe ka nahi udoito tumandeo kaemu mepateo mia anu inurapi-Do i Ue?”

¹⁵ Ka i'amba i Daudi moboio asa mia atano ka ipotae, ”Aiwa, pepateo.” Mia atuu moko'ario, ranta ka i mate.

¹⁶ Motae i Daudi ndi onae, ”Ususuruo omuemu reamu, nde hangano paumu omuemu gagiomo sakosii umewaiko ka upotae: Kupepateomo mia anu inurapi-Do i Ue.”

Ponsabangino i Daudi hangano i Saulu ka i Yonata

¹⁷ Ponsabangino i Daudi andio mongkona i Saulu ka i Yonata, anano,

¹⁸ ka onae mompowee parenta ka domempinaguruako Penani ”Pana” a inuleno i Yehuda. Kanandiomo anu teburi a Wunta Mia Moleo:

¹⁹ Marambamiu, oo to Isaraeli, tebangku pinepate a pongku-pongkumu! Memate iramo luwuno tadulako.

²⁰ Simempaleleo atuu i Gati, simempaleleo atuu a nsala Asikelo, kasi dompo'unde ana beinedo to Pelisiti, kasi dompo'unde-unde ana beinedo mia anu nahi petindi!

²¹ Oo luwuno torukuno i Giliboa! Sihina tontoru, ke usa i wawomu, ba tonga mpada anu mewalo, nde i ra'aimo kantado pongkiari tetadiako, kantano i Saulu nami inurapiako mbo'u lana.

²² Maupo nahina reado mia mempinepate maupo nahina tabado pongkiari panano i Yonata nahi ta tepokule, ponaino i Saulu nahi ta mekule mpena.

²³ I Saulu ka i Yonata anu pinehohawa, ka pinesanaa, a ntumuwu ka matedo nahi teponsia. Magasi irapo sekono rajawali, moroso irapo sekono singa.

²⁴ Oo luwuno ana beine Isaraeli, impengesemo hangano i Saulu, anu moweeakomiu sangka motaha kirimisi anu tedoa tekosi, anu mompokonaa komiu ramba-ramba wulaa a sangkamiu.

²⁵ Memate iramo luwuno pongkiari a laro mpeteaa! I Yonata pinepate a pongku witamiu.

²⁶ Aroaku masusa hangano omue Yonata pepaekompoku. Tedoa upokonsanaa aku; pompehohawamu tedoa mo'urense laroku, sekono pompehohawano beine.

²⁷ Memate iramo luwuno pongkiari ka ropuomo luwuno sangka petea!