2 PETURU 2 - Wunta Mempori

Luwuno nabi ka luwuno guru anu mpegaupi 2:1-22

¹ Ba kana'umpe luwuno nabi mpegaupi i ndi'upua mpentade i tonga-tongado bawaa-Do Ue Ala, kanandio koa mbo'u i olomiu ta hina guru mpegaupi. Ira mewinsoo luwuno pompaguru mompopo'oo anu mompepate, tendeano ondae ira mehapu Ira Anu Pabawa anu tumolosi iramo ka saru mesala kanandio ronga mowawa mateado.

² Hadio mia ira mentondao sala ntumuwudo anu pinabawaino po'eheno aroa, ka hangano ondae Sala Menteea ta pinepauikiako.

³ Ka hangano dokodo guru mpegaupi atuudo ira mpe'usaha mpo'ungke urado inso ndi omiu mesala a luwuno tutulu anu tinutuludo ondaedo. Sine a mpoweweudo atuu pohuku tehineomo tepatinda ka matea nahi ta tepotulu.

⁴ Hangano tewala Ondae Ue Ala nahi Dopehohawa ira mala'eka anu mpoweweu hala sine metadiako ira a laro naraka ka ba kanandio meweengako ira a laro ngkunepo anu wongi-wongi ka domeninaa hawe a oleo pobitaraa;

⁵ ka tewala Ondae Ue Ala nahi Dopehohawao wawontolino i ndi'upua, sine butu kumaduduio i Noho, pompalele menteea atuu, saru opitu mia susua, tempono Dopokololowio wawontolinodo mia anu mosa'o gaudo;

⁶ ka tewala Ondae Ue Ala sumongkoo kota Sodomo ka Gumora, ka ba kanandio rumopuo ka mokogagio aasa pompopoto'orido anu mentuwu mpogau mosa'o a tempo lembuino,

⁷ sine Dokaduduio i Lo'oti, mia anu mentee, anu marasai mpiha hangano sala ntumuwudo mia anu nahi dompoto'ori songka ka anu butu mpontonda po'eheno aroado, –

⁸ hangano mia mentee andio mo'ia i tonga-tongado ka sompo oleo kumitao ka rumongeo luwuno wineweudo anu mosa'o atuu, ranta sumangano anu mentee atuu tebobarasai –

⁹ ka mengkaa, nine Ondae i Ue tumo'orio kumadudui ira mia mpesomba ntu'u inso a mpo'ara-arahako ka tumo'orio numaa ira mia mpoweweu mosa'o ka domebinobarasai a oleo pobitaraa,

¹⁰ tamoako ondae anu mentondao po'eheno aroado hangano mingki sumosa'aio koroino ka anu mokongkuramao poparentaa-Do Ue Ala. Memosia ira ntu'u ka mpompelangka-langkai, ranta nahi donte'ondaha mpepaukiakono marambaa,

¹¹ kahinaano luwuno mala'eka isa'a, anu maupo lalu memoroso ka lalu mempabawa sekonopo ondae, nahi dompepauako pau pompepaukiako, tewala dometuntuo mala'eka hukudo i aro-Do Ue Ala.

¹² Sine ondae atuu mengkena saru pinotuwu anu nahina akalano, mengkena saru kondehora anu butu pine'anaako ka irinako ka rinopu. Dompepaukiakono hapa anu nahi domento'orio, ranta hangano wineweudo anu mosa'o ondae isa'a ira memate kana kondehora mo'ila,

¹³ ka ira mpompembasai teweweu anu mosa'o gagi tambodo mpoweweu mosa'o. Mpesana-sanaa tempono meene, domentuduo mawongkoa. Ondaemo atuu ta'i ka tataa, anu memolangu a laro mpo'eheno aroado tewala mpentoro ira mpongkaa mpo'inu mperonga-ronga saru omiu.

¹⁴ Matado buke aroa monsosabo ka nahi dohori nte'osa mpoweweu hala. Domempopandei ira mia anu memolema. Aroado leleoomo a laro modokoa. Ondaemo mia anu mentetotonaa!

¹⁵ Hangano domebintaomo pesalaa anu mentee, onaemo ka dontesaa, ka do'amba mentondao pesalaano i Bilea, anano i Beori, anu ineheno montarima tambo a luwuno wineweu anu mosa'o.

¹⁶ Sine i Bilea mohawe pompopoto'ori montaso a mpoweweuno anu mosa'o, hangano kalide pontekea anu beebe mepau kana mia ka umontoo monge-mongeno nabi atuu.

¹⁷ Guru mpegaupi atuudo onaemo kana mata uwoi anu mo'are, kana gawu anu pinuurino angi mokora; tiado tetindaomo po'ianga a laro wongi-wongia anu tedoa worikidi.

¹⁸ Hangano ondae mpepauako pau anu mompelangka-langkai ka mooa ka mempakeo po'eheno aroa belesu pompopandeido mia anu da iaopo dompepotola inso ndi ondae anu mentuwu a laro ntesosaeloa.

¹⁹ Domedandiako ira maradekaa a mia susua, kahinaano ondaemo isa'a atano matea, hangano isema anu ninangino mia, onaemo atano mia atuu.

²⁰ Nde tewala ondae, hangano ponto'orido Ondae i Ue ka Puu Pongkaduduito, Ondae i Yesu Kerisituu, mpepotola iramo inso a luwuno mokoburuno wawontolino, sine ntewinso ira mbo'u i larono, ka poko'ariano teweweudo mosa'oopo sekono anu se'eluno.

²¹ Onaemo pu'uno ndi ondae moikoopo, tewala nahi dohori mento'orio Sala Menteea sekonopo domento'orio, sine lembuino mpewolili inso a parenta mempori anu domempinauako.

²² Ndi ondae kona ntu'u hapa anu pinauno potundaano pau anu mentee andio, ”Dahu ipekuletio mbo'u teluano, ka boe anu medolo mekule mbo'u a umbeleno.”