2 PETURU 1 - Wunta Mempori

Tabea 1:1-2

¹ Inso ndi Simo Peturu, tetenaa ka tinena-Do i Yesu Kerisituu, hawe ndi ondae anu mperonga saru omami mpohawe pompe'ala-ala hangano moleo-Do Ue Ala ka Puu Pongkaduduito, Ondae i Yesu Kerisituu.

² Pe'aroa ka rodoa koteti-tetiangino ndi omiu hangano ponto'ori mongkona Ondae Ue Ala ka mongkona Ondae i Yesu, Ueto.

Pepoboi ka pobiniki-Do Ue Ala 1:3-15

³ Hangano pabawa-Do Ue Ala moweeakitamo luwuakoano anu mentudu tiano tuwu anu moleo hangano ponto'orito mongkona Ondae, anu moboi kitamo hangano pabawa-Do anu maramba ka kinohali-haliako.

⁴ Mesala kanatuu Doweeakitamo luwuno dandi anu masuli olino ka anu tedoa langkai, ka ihangano onae moiko impo'ala tia a pabawa-Do i Ue, ka mentola inso a mpo'eheno aroa ntolino anu sumolangio wawontolino.

⁵ Onaemo pu'uno asalakono tementee ntu'u impe'usaha ka imentiangio poweweu moiko a pompe'ala-alamiu, ka ponto'ori a mpoweweu moiko,

⁶ ka pompetea po'eheno koroi a ponto'ori, mokua a pompetea po'eheno koroi, ka moleoa a mokua,

⁷ ka a moleoa pompehohawa a luwuno pepaekompo, ka a pompehohawa a luwuno pepaekompo pompehohawa a luwuno mia.

⁸ Hangano tewala luwuno atuu hinao ndi omiu ka ikoteti-tetiangi, ta weweu komiu gagi memokua ka mehasili a ponto'orimiu Ondae i Yesu Kerisituu, Ueto.

⁹ Sine ba isema anu nahina luwuno atuu, onae gagi morawu ka nahi malua pinewowolono, hangano ikolupeo, nine luwuno halano anu i ndi'upua pinahihiomo.

¹⁰ Onaemo pu'uno, pepaekompoku luwu-luwu, impe'usahamo ntu'u, ka ikomoro-morosono poboimiu ka tebinikimiu. Hangano tewala imeweweuo, nahi komiu hori ntetidu.

¹¹ Hangano kanandio komiu mewineeako tia buke ka impewinso a Poparentaa anu nahina tampulaano, onaemo Poparentaa-Do i Ue ka Puu Pongkaduduito, Ondae i Yesu Kerisituu.

¹² Onaemo pu'uno ka kuwela montoo mpoto'oriakomiu luwuno atuu, maupo imento'oriomo ka memoroso a menteea anu imentarimaomo.

¹³ Kutuduo anggaaku mopoto'oriakomiu mpiha luwuno atuu i larono napi kubintao koroiku andio.

¹⁴ Hangano kuto'orio, nine aku ronga kubintao koroiku andio, kana anu umariomo Dopauakune i Yesu Kerisituu, Ueto.

¹⁵ Sine aku koa me'usaha, ka i'umariku mbo'u lumako atuu ka iwela koa mpewowoloo luwuno atuu.

Pinau anu ta gagi mongkona maramba-Do i Kerisituu inihiiomo 1:16-21

¹⁶ Hangano nahi kimentondao tutu-tutulu montonda pinewowolono mia, tempono kimempauakomiu pabawa ka hawe-Do Ueto, i Yesu Kerisituu gagi mokole, sine kimensakosiiakono matamami maramba-Do.

¹⁷ Kimensakosiio, ba kana'umpe Dopontarima pompelangkai ka marambaa inso ndi Ondae Ue Ala Ama, tempono hawe suara ndi Ondae inso a Anu Tedoa Maramba, anu motae, ”Ndiomo Ana anu pinehohawa-Ku, ndi Ondaemo mawongko aroa-Ku.”

¹⁸ Suara atuu kimerongeo hawe inso i suruga, tempono kimperongaako Ira i wawo ntorukuno anu mempori.

¹⁹ Hangano kanandio komoro-morosomami hangano pau anu dompohaweomo luwuno nabi. Tedoa moiko tewala impekokoongakono mengkena kana mompekokoongako hulu anu mewanta a mpo'ianga anu wongi-wongi hawe ka ipesabaako towea ka buntala i sabaano oleo saba mewanta i laro aroamiu.

²⁰ Anu lalua asalakono imento'orio, onaemo nine luwuno pinau anu ta gagi a laro Wunta Mempori nahi moiko ipinokonto'ori montonda po'eheno onaeno,

²¹ hangano pinau anu ta gagi nahi hori te'inso a mpo'eheno mia, sine hangano petena-Do Penaa Mempori ka dompepau luwuno mia a nee-Do Ue Ala.