2 Mokole 9 - Wunta Mempori

I Yehu gagi mokoledo to Isaraeli

¹ Nabi Elisa moboio asa mia inso i olono bawaado nabi ka ipotaeakono, ”Peboo ntongamo, wawaomo pido-pido lana andio ka lakomo i Ramoti-Gileadi.

² Sahawemu i ra'ai, ungkeomo i Yehu anano i Yosapa anano i Nimisi. Rangkuhio, oluakono lumako inso i olodo luwuno petewawa sorodaduno ka wawaomo a bolongko i larono.

³ Alaomo pido-pido me'ihi lana atuu, ka u'amba tumawao a wawo uluno ka pepau, ’Kanandiomo pau-Do i Ue: Ku'urapikomo gagi mokoledo to Isaraeli!’ Umarino atuu ungkahiomo tondo, pelulumo, ka pontuturakomo.”

⁴ Ka i'amba mia mongura atuu, asa nabi mongura, lumako i Ramoti-Gileadi.

⁵ Mansano hawe, tengkitaomo luwuno tadulako sorodadu kontongaado pentoro. Ka i'amba motae, ”Mowawa aku pe'oliwi ndi omiu, oo tadulako sorodadu!” Mesikeno i Yehu, ”Ndi sema inso i olomami?” Sangkino, ”Ndi omiu, oo tadulako!”

⁶ Mentade i Yehu kai pewinso a laro raha. Nabi mongura atuu tumawao lana a wawo uluno ka ipotaeaono, ”Kanandiomo pau-Do i Ue, Ue Alado to Isaraeli: Ku'urapikomo gagi mokole a bawaa-Do i Ue, a nto Isaraeli.

⁷ Omue komepate ira somborino i Ahabi, uemu, ranta Aku mombalo ndi Isebeli reado luwuno tetenaa-Ku nabi atuu, onaemo reado luwuno tetenaa-Do i Ue.

⁸ Luwuno somborino i Ahabi ta roopu. Aku mokotampulao inso ndi Ahabi sompo tama anu hinao potorono ke nahina i Isaraeli.

⁹ Aku weweuo somborino i Ahabi mengkena kana somborino i Yerobea anano i Nebati ka somborino i Baesa anano i Ahia.

¹⁰ I Isebeli ta kumaano dahu i asa ntia wita i Yisire'eli ka nahina mia kumaburuo.” Ka i'amba nabi atuu umungkahio tondo, ka i'amba melulu.

¹¹ Mansano meluarako i Yehu tepohaweako ira luwuno pegawaido ueno, asa mia motaeakono, ”Nde luwuno moi-moiko koa? Tembio mia mekombe atuu kai aiwa ndi omiu?” Isangki ira, ”Mia atuu lano imento'orio ka pepauno mondeenomo koa!”

¹² Sine mpotae ira, ”Gaupimiu! Tutuluomo ndi omami!” Ka i'amba motae, ”Kanandio pinauno ndi ongkue: Kanandiomo pau-Do i Ue: Ku'urapikomo gagi mokole a nto Isaraeli!”

¹³ Pontuturako iramo singge mia me'alao sangkano ka mewileo a toto ngkaruno i Yehu a wawo ensa, ka do'amba mempuurio tawuwua saru mpebooli, ”I Yehu mokole!”

¹⁴ Kanandiomo i Yehu anano i Yosapa anano i Nimisi tepo'asa umewaio i Yorami. Tempo atuu i Yorami kontongaano medaga-dagai i Ramoti-Gileadi, meronga saru luwuno to Isaraeli umaropio i Hasaeli, mokoledo to Arami.

¹⁵ Sine mokole Yorami asa-asano mekule i Yisire'eli, ta pinokotompa mobebelano hangano to Arami tempono ipetea umewaio i Hasaeli, mokoledo to Arami. Motae i Yehu, ”Tewala mpe'indu komiumo, si mpo'ineeo maupo isema tola inso i kota kai lako pauo mongkona atuu i Yisire'eli.”

I Yorami ka i Ahasia pinepate

¹⁶ Ka i'amba i Yehu me'ula a ngkareta ka ilako i Yisire'eli, hangano i Yorami tepombole i ra'ai ka i Ahasia, mokole i Yehuda, aiwa kumitao i Yorami.

¹⁷ Tempono puu mpodagai anu kontongaano mentade a menara i Yisire'eli, kumitao bawaano i Yehu aiwa, mebooliomo, ”Kukitao asa bawaa.” Motae i Yorami, ”Alaomo asa mia puu mpesawi a ngara, tenaomo tepohaweako ira kai pesikeno: Saru tinoo mesintuwu ke andio?”

¹⁸ Puu pesawi ngara atuu lumako tepohaweakono i Yehu ka ipotae, ”Kanandiomo pesikenodo mokole: Saru tinoo mesintuwu ke andio?” Sumangki i Yehu, ”Hapake orusuamu saru mesintuwu? Petondamo i bungkuku!” Ka i'amba puu mpodagai mohaweo, ”Mia tinena haweomo ndi ondae, sine nahi pekule.”

¹⁹ Ondae mokole montena puu mpesawi a ngara anu ko'orua. Sahaweno ndi ondae ipotae, ”Kanandiomo pesikenodo mokole: Saru tinoo moiko ke andio?” Sumangki i Yehu, ”Hapa orusuamu saru mesintuwu? Petondamo i bungkuku!”

²⁰ Ka i'amba puu mpodagai mohaweo, ”Onae haweomo ndi ondae, sine nahi pekule! Sine hinao anu me'ula a ngkareta kana i Yehu, ana'ueno i Nimisi, hangano ipe'ulaio kana mia mekombe.”

²¹ Motae i Yorami, Patindaomo kareta! ”Mansado mempatindao mia karetano, i Yorami, mokoledo to Isaraeli ka i Ahasia, mokoledo to Yehuda, singge mia saru karetano meluarako tepohaweakono i Yehu. Dotepohaweakono a lereno i Naboti, to Yisire'eli atuu.

²² Mansado kumitao i Yehu, mesikeno i Yorami, Saru tinoo mesintuwu ke andio Yehu?” Sumangki i Yehu, ”Kana'umpe ka ta hina pesintuwu, tempono mia mebebelesuno i Isebeli, inemu, ka mia anu pande sihiri hadio ntu'u!”

²³ I Yorami ronga mewolili ka ipolai saru mebooli ndi Ahasia, ”Ndio pompopo'oo, Ahasia!”

²⁴ Sine i Yehu padiio panano tompaano rosono ka ipanao i Yorami i olono orua oweano. Ana mpana atuu lompahi a huleno, ka i'amba tebangku a laro ngkaretano.

²⁵ Motae i Yehu ndi Bidakari, petewawa sorodaduno, ”Tandeo ka petadiakono wata ngkoroino a lereno i Naboti, to Yisire'eli atuu, hangano pewowoloomo tempono topesawi a ngara meronga-ronga tumondao i Ahabi, amano, Ondae i Ue mokomengkaao pohuku andio ndi onae:

²⁶ ’Menteeano indiawi, Kukitao reano i Naboti ka reado luwuno anano’, pau-Do i Ue, ’ka Aku mombalo ndi omue i lere andio’, kanandio pau-Do i Ue. Onaemo pu'uno tandeo ka petadiakono a lere andio, menunu saru pau-Do i Ue.”

²⁷ Kumitao anu gagi atuu, i Ahasia, mokoledo to Yehuda, molai te'aro i Beti-Hagani. I Yehu lumuluo ka ipotae, ”Onae mbo'u panao!” Domempanao a wawo ngkaretano a mporakea lumako i Gesuri umpeda Yibileami. Onae molai lumako i Megido ka mate i ra'ai.

²⁸ Luwuno pegawaino wawao a laro ngkareta melako i Yerusale ka mengkaburuo a laro nkaburuno onaeno, i horino uempu'uno i kota Daudi.

²⁹ Ia nta'u kohopulu ka asa poparentaano i Yorami, anano i Ahabi, i Ahasia gagi mokole a nto Yehuda.

I Isebeli pinepate

³⁰ I Yehu hawe i Yesire'eli. Rumongeo mongkona atuu, i Isebeli rumamba-rambao matano ka rumamba-rambao uluno, ka i'amba mentango inso a pentangoa.

³¹ Tempono ipewinso i Yehu a mpewowa langkai, mebooli i Isebeli, ”Moi-moikoko koa ke Simiri, puu pompepate ueno atuu?”

³² Itandeo i Yehu rupano te'aro a pentangoa atuu ka ipotae, ”Isema me'alaako ndi ongkue? Isema?” Hinao orua ke otolu mia pegawai langkanae mengkita te'aro ndi onae.

³³ Petadiakonomo i totono! Mebooli i Yehu. Dompetadiakono i totono. Asa ntia reano tepidiki a rere ka a ngara; onae linolanda.

³⁴ I Yehu mewinso i larono, kai pongkaa ka mo'inu. Ka i'amba motae, ”Orusuomo beine tetotonaa atuu ka imengkaburuomo, hangano onae anano mokole.”

³⁵ Ondae melako ira mengkaburuo, sine nahi domehaweo, sangkadio banga uluno, orua karuno ka orua pele ngkaeno.

³⁶ Ka do'amba mpekule ka mempauakono i Yehu. Ka i'amba motae, ”Onaemo atuu pau-Do i Ue anu pinau-Do molalo tetenaa-Do i Elia, to Tisibe atuu: A asa ntia wita i Yisire'eli dahu ta kumaano bauno i Isebeli.

³⁷ Wata ngkoroino i Isebeli ta tetalesako i asa ntia wita i Yisire'eli kana ta'i a wawo lere, ranta nahina mia anu mokompotae: Ndiomo i Isebeli.”