2 Mokole 7 - Wunta Mempori

¹ Motae i Elisa, ”Rongeomo pau-Do i Ue. Kanandiomo pau-Do i Ue: Tisomo bara'ura tempo kanandio asa seahi tarigu moiko ntu'u me'oli asa sikala ka orua seahi jelai me'oli asa sikala a mpewowa langkai Samaria.”

² Sine petewawa sorodadu anu gagi mia pine'ala-alado mokole, sumangkio tetenaa-Do Ue Ala, ipotae, ”Maupo Doweweuo i Ue hadio pentangoa i langi, kana'umpe kai gagi mongkona atuu?” Sumangki tetenaa-Do Ue Ala, ”Menteeano, kokumitaakono matamu omuemu, sine nahi komongkaa hapa-hapa inso ndi onae.”

³ Opaa mia anu mahaki ngkuli mongkokongiri kongko i arono pewowa pewinsoa a mpewowa langkai. Mpepau ira pada ondaedo, ”Hapa tuduno tompentoro-ntoro i ndi'ai ranta mate?

⁴ Tewala kita mpotae, moikoopo ba tompewinso i kota, kahinaano i laro kota hinao mokoninggoa, kita koa memate i ra'ai. Tewala mpentoro kita mpiha i ndi'ai, kita koa memate mbo'u. Gagi kanandio-andio, aiwamo tompe'asambaliako a mpekemaado sorodadu to Arami. Tewala dompo'inee kita tuwu, kita mentuwu, ka tewala dompepate kita, kita koa memate.”

⁵ I tempono ngkiniwia mpelungka ira mpewinso a mpekemaado sorodadudo to Arami. Sine mansado mehawe a ntidano pekemaado to Arami atuu, mengkaaomo nahina maupo te'asa mia i ra'ai.

⁶ Doweweu iramo i Ue sorodadudo to Arami atuu ka domporonge unino kareta, ngara ka bawaa sorodadu anu hadio, ranta ka dompepau pada ondaedo, ”Kitao, mokoledo to Isaraeli itambo iramo mokoledo to Heti ka luwuno mokoledo to Misiraimi umewai kita, ka domensapoi kita.”

⁷ Onaemo pu'uno, ka dompolai i tempono ngkiniwia. Kema, ngara ka kalidedo, luwuno pekemaa atuu domansa mebintao. Mpolai ira kumaduduio koroido.

⁸ Luwudo mia anu mahaki ngkuli atuu mehawe a ntidano pekemaa, ka mpewinso i larono asa kema, ka do'amba mpongkaa ka mpo'inu. Umarino atuu dompeteoo inso i ra'ai wulaa, salaka, ka sangka, ka domelako mewumio. Ka do'amba mpekule, mpewinso a laro ngkema anu susua, ka dompenteoo mbo'u luwuno sangka inso i ra'ai, ka domelako mewunio.

⁹ Mpepau ira pada ondaedo, ”Nahi pototono tompoweweu kanandio. Oleo andio oleo lele moiko, sine butu kita mpo'ia-ia. Tewala kita mensikorio kai mewanta mo'oru, pohuku ta umalu kita. Kanandio-andio aiwamo tomelako mempauo mongkona atuu a langkanaedo mokole.”

¹⁰ Melako ira, ka do'amba mpebooli a puu mpodagai pewowa langkai kota ka mentutuluako ira luwuno mia atuu, dompotae, ”Mpewinso kamimo a mpekemaado to Arami. Mengkaaomo nahina maupo te'asa mia i ra'ai ka nahi teronge pepauno mia. Butu hinao ngara ka kalide anu tetanggo. Maupo luwuno kema domansa mebintao.”

¹¹ Luwuno puu mpodagai pewowa mpebooliakono lele atuu, ka i'amba mia mempauako ira luwuno ihino langkanaedo mokole.

¹² Ia wongi atuu ondae mokole mewangu, ka i'amba motaeako ira luwuno pegawaino, ”Moikoomo kupauakomiu hapa anu ta wineweudo to Arami atuu ndi ontae. Domento'orio nine ontae memarasai mokoninggo. Onaemo ka dompeluarako inso a mpekemaa ka dompewuni a mpada, dompewowoloo, ’Tewala to Isaraeli mpeluarako inso a laro ngkota, kita merako ira kongko tuwu, ka to'amba mpewinso a laro ngkota.’”

¹³ Ka i'amba asa mia pegawaino sumangki, ”Kai inalamo olima inso a ngara anu da mo'ia i laro kota andio. Kitao, luwuno pehowudo to Isaraeli anu mo'ia i larono ta gagi kana luwuno pehowudo to Isaraeli anu pingkoomo memate. Laluopo tompontena mia lumako i ra'ai ka tomento'orio koa.”

¹⁴ Ka do'amba me'alao orua kareta saru ngarano. Ondae mokole tumena ira ka dotonda bungku ira sorodadudo to Arami, ka dopotae, ”Imelakomo mengkitao!”

¹⁵ Ka do'amba melako tumonda bungku ira mia atuudo hawe a ngkoro Yarade. Huu, luwuno sala atuu bukeako sangka ka parewa anu pinetadiakodo to Arami tempono dompolai moririmpate. Mpekule iramo mia tinena atuu ka domentutuluo mongkona atuu ndi ondae mokole.

¹⁶ Ka i'amba palili i kota atuu mpeluarako mpomuruo pekemaado to Arami. Onaemo pu'uno, asa seahi tarigu anu moiko ntu'u me'oli asa sikala ka orua seahi jelai me'oli asa sikala, menunu saru pau-Do i Ue.

¹⁷ Kontongaano atuu dotenaomo mokole petewawa sorodadu pine'ala-alano atuu dumagaio pewowa langkai. Onae mate domelolandao palili a mpewowa langkai menunu saru pauno tetenaa-Do Ue Ala anu pinauno i tempono dohawe mokole tepohaweakono.

¹⁸ Ka gagiomo kana anu pinauno tetenaa-Do Ue Ala atuu ndi ondae mokole, ”Orua seahi jelai me'oli asa sikala ka asa seahi tarigu anu moiko ntu'u me'oli asa sikala, tisomo bara'ura tempo kanandio a mpewowa langkai Samaria.”

¹⁹ I tempo atuu petewawa sorodadu atuu sumangkio tetenaa-Do Ue Ala, ”Maupo Ondae i Ue weweu ira pentangoa i langi, kana'umpe anu kanatuu ta gagi?” Sine motae i Elisa, ”Menteeano kokumitaakono matamu omuemu, sine nahi komongkaa hapa-hapa inso ndi onae.”

²⁰ Kanandiomo anu gagi a mia atuu: Onae mate domelolandao palili a mpewowa langkai.