2 Mokole 5 - Wunta Mempori

I Na'ama pinokotompa

¹ I Na'ama, tadulako sorodaduno mokoledo to Arami, onaemo mia tinudu i arono ueno ka tedoa pinelangkai, hangano molalo onae Ondae i Ue moweeako iramo ponangiado to Arami. Onae asa mia sorodadu anu moroso ka mosia, sine merurungkoako haki lowe.

² To Arami hori ira mpebawaa hadio mposapoi ka domewawao asa nana'ote beine inso i witado to Isaraeli gagi mia tinawa. Ana beine atuu gagi puu mpopekakaakono kombiano i Na'ama.

³ Ipotaeakono ueno beine, ”Ba ipemoikoo ueku itepohaweakono nabi anu i Samaria atuu, asalakono nabi atuu ta mokotompa ira inso a haki lowedo.”

⁴ Ka i'amba i Na'ama lumako pauakono ueno, ipotae, ”Kanandiomo ipotae ana beine inso i wita Isaraeli atuu.”

⁵ Sumangki mokoledo to Arami, ”Moiko, lakomo ka aku mo'oliwi wunta ndi mokoledo to Isaraeli.” I Na'ama lumako saru mowawa hopulu talenta salaka ka nomo nsowu sikala wulaa ka hopulu mpole sangka pe'eu.

⁶ Ipohaweakono mokoledo to Isaraeli wunta, anu unino, ”Tempono wunta andio hawe ndi omiu, kai to'oriomo nine kutenao i Na'ama, pegawaiku, kai pokotompao inso a haki ngkuli mesakino.”

⁷ Mansano umari basao mokoledo to Isaraeli wunta atuu, iberio sangkano kai potae, ”Nde ongkue andio Ue Ala anu mompepate ka mompotuwu ranta kai pe'oliwi mia andio ndi ongkue kaku pokotompao asa mia inso a haki ngkuli mesakino? Kitaomo, ka to'oriomo, onae mo'ungke-ungkeako ndi ongkue.”

⁸ Mansano rumongeo i Elisa, tetenaa-Do Ue Ala atuu, nine mokoledo to Isaraeli moberi sangkano, me'oliwiomo ndi ondae mokole, kanandio, ”Tembio kai berio sangkamiu? Po'ineeomo mia atuu kai aiwa ndi ongkue, kai to'orio nine hinao asa nabi i Isaraeli.”

⁹ Ka i'amba i Na'ama aiwa saru ngara ka karetano, ka ipenaa-naa i arono pewowa rahano i Elisa.

¹⁰ I Elisa montena mia pauakono, ”Lakomo ka pedolomo pepitu a nkoro Yarade. Koroimu ta wali moiko ka kogagi tompa.”

¹¹ Sine i Na'ama tekuda ka i'amba lumako saru te'o'aliano ka ipotae, ”Bakanaano potaeku manasa onae meluarako tepohaweakune ka mentade pauo nee-Do i Ue, Ue Alano, ka i'amba lumelu-leluo kaeno i wawono anu mahaki ka mokotompao haki ngkuli mesaki atuu!

¹² Kombake Abana ka Paripari luwuno korono i Damasi, moikoopo sekono luwuno korono i Isaraeli? Kombake aku mokompedolo i ra'ai ka kugagi tompa?” Ka i'amba mewolili ka ilako tekuda.

¹³ Sine luwuno pegawaino aiwa me'umpeda ka dompotaeakono, ”Ama, Ande-andeno nabi atuu tumena komiu moweweu anu motungko, kombake komiu weweuo? Tamoako butu ipotae ndi omiu: Pedolomo ka komiu gagi tompa.”

¹⁴ Ka i'amba metii mokuuo koroino pepitu a laro ngkoro Yarade, menunu saru pauno tetenaa-Do Ue Ala atuu. Koroino wali moiko kana koroino asa nana'ote kodei ka gagiomo tompa.

¹⁵ Ka i'amba onae saru luwuno binawaano mpekule a ntetenaa-Do Ue Ala atuu. Mansado mehawe, onae mentade i arono i Elisa ka ipotae, ”Kanandio-andio kuto'orio nine i asa wawontolino nahina Ue Ala sangkadio i Isaraeli. Onaemo pu'uno, itarimaomo pompoweeno atamiu!”

¹⁶ Sine sumangki i Elisa, ”A nee-Do i Ue anu tuwu, anu pinekakakoku, nahi aku montarima maupo hapa.” I Na'ama dumadasio i Elisa kai tarimao, sine nahi hori behe tumarimao.

¹⁷ Ka i'amba motae i Na'ama, ”Tewala kanandio, po'ineeomo i wineeako atamiu andio wita anu pinoko'ulano asa pasa bagali. Hangano atamiu andio nami ta mompesombaako mbo'u pesomba tinunu ke pesomba sinumbele a pinesombai susua sangkadio ndi Ondae i Ue.

¹⁸ Po'ineeomo Do'ampunio i Ue atamiu andio mongkona andio: Tewala ondae ueku mokole mewinso a raha mpelahumoaa Rimoni ira menggolontu mesomba i ra'ai, ka dopehonda a ngkaeku, ranta ongkue asalakono metonda menggolontu mesomba a laro raha mpelahumoaa Rimoni atuu, po'ineeomo Ondae i Ue umampunio atamiu andio mongkona atuu.”

¹⁹ Motae i Elisa ndi onae, ”Lakomo temoiko!” Mansano melempa i Na'ama napi olai inso ndi onae,

²⁰ i Gehasi, atano i Elisa, tetenaa-Do Ue Ala atuu motae, ”Menteeano ondae ueku me'aroa ira lahi ndi Na'ama, to Arami andio, nahi dotarimao pesombano. A nee-Do i Ue anu tuwu, menteeano aku melulu tumonda bungkuo ka aku montarima maupo hapa inso ndi onae.”

²¹ Ka i'amba i Gehasi tumonda bungkuo i Na'ama. Mansano kumitao i Na'ama hinao mia melulu tumonda bungkuo, mompari-pariomo metii inso a ngkareta kai tepohaweakono, ipotae, ”Nde moi-moiko koa luwu?”

²² Sumangki i Gehasi, ”Luwuno moiko! Butu, ondae ueku i Elisa tumena aku pauo: Da saraipo orua ira mia mongura inso i olodo bawaado nabi aiwa ndi ongkue inso a mentorukuno Eparai. Ipoweeako iramo asa talenta salaka ka orua pasa sangka.”

²³ Motae i Na'ama, ”Moiko, alaomo orua talenta.” I Na'ama dumadaio ka itongoo orua talenta salaka ka orua pasa sangka i larono orua kadu ka i'amba meweengakono a orua atano ka ondae andio wawao i arono Gehasi.

²⁴ Mansado mehawe a pongku wita, i'alao i Gehasi inso a nkaedo ka inaao i raha. Itena ira mia orua atuu ka dolako, ka do'amba lumako.

²⁵ Mansano mewinso i Gehasi ka ipentade i arodo ueno, motae i Elisa ndi onae, ”Insoko isuake Gehasi?” Sumangki i Gehasi, ”Atamiu andio nahi lako maupo isua!”

²⁶ Sine motae i Elisa ndi onae, ”Kombake aroaku metonda lumako tempono ipetii mia atuu inso a ngkaretano tepohaweakomu? Ndiomoke tempono mo'ala salaka ka mohawe sangka, lere saitu, lere anggoro, asa bawaa bembe bimba, sapi, ata tama ka beine?

²⁷ Sine, haki ngkuli anu umaluo i Na'ama ta metako ndi omue ka ana'uemu ranta nahina tampulaano.” Ka i'amba meluarako i Gehasi inso i arono; onae i'aluo haki ngkuli, mpute kana uwoi baku.