2 Mokole 3 - Wunta Mempori

I Yorami tepo'asa umewaio Moabi

¹ I Yorami, anano i Ahabi, gagi mokole i Samaria a nto Isaraeli a nta'u kohopulu ka oalu poparentaano i Yosapa, mokole i Yehuda. Onae moparenta hopulu ka orua nta'u tehineno.

² Onae moweweu anu mosa'o a pongkita-Do i Ue, butumo koa nahi kana amano ka ineno. Iliahakono luwuno tugu Ba'ala anu winanguno amano.

³ Sine, onae da metako a halano i Yerobea anano i Nebati anu poko'ariano to Isaraeli mpoweweu ira mbo'u hala; nahi olaiakono hala atuu.

⁴ I Mesa, mokole i Moabi, onaemo asa mia puu mpopekaria bimba. Onae mo'owahi peki'ue ndi mokoledo to Isaraeli asa etu nsowu ana bimba ka wuluno inso a asa etu nsowu bimba lakino.

⁵ Sine mansano mate i Ahabi, mokoledo to Moabi umewaio mokoledo to Isaraeli.

⁶ A tempo atuu mokole Arami meluarako inso i Samaria ka paresao baresido luwuno to Isaraeli.

⁷ Tempono ipelungka ipe'oliwiakono i Yosapa, mokoledo to Yehuda, kanandio, ”Mokoledo to Moabi i'ewai akumo! Behekomiu ke lumako merongaakune metea umewai ira to Moabi?” Sumangki i Yosapa, ”Ongkue ka omiu toperonga-ronga, paliliku ka palilimiu, ngaraku ka ngaramiu.”

⁸ Onae mesikeno mbo'u, ”Telalo a nsala isuake ba tolako?” Isangkio, ”Telalo a mpada one Edomi!”

⁹ Ka i'amba mokoledo to Isaraeli melempa saru mokoledo to Yehuda ka mokoledo to Edomi. Sine mansado mpelempa mpetanggolili opitu oleo pelempaa olaino, nahina uwoi inuado sorodadu ka pinotuwu anu tumonda ira.

¹⁰ ”Masola,” ipotae mokoledo to Isaraeli, ”Dopoboi iramo i Ue otolu mokole andio ka domempineweengako a ngkaedo to Moabi?”

¹¹ Sine mesikeno i Yosapa, ”Nahina ke i ndi'ai te'asa mia nabi-Do i Ue, ka tompo'ema pontiso-Do i Ue molalo onae?” Ka i'amba asa mia i olono pegawaido mokoledo to Isaraeli sumangki, ipotae, ”I ndi'ai kongko i Elisa anano i Sapati, anu i ndi'ipua mekakaakono i Elia.”

¹² Motae i Yosapa, ”Pau-Do i Ue kongko ndi onae.” Umarino atuu mokoledo to Isaraeli ka i Yosapa saru mokoledo to Edomi melako ntepohaweakono i Elisa.

¹³ Motae i Elisa ndi mokoledo to Isaraeli, ”Hapake orusuaku saru omiu? Lakomo a luwuno nabido amamiu ka inemiu.” Sumangki mokoledo to Isaraeli ndi onae, ”Naahi, hangano Ondaemo i Ue anu moboi ira otolu mokole andio, ka domempineweengako a ngkaedo to Moabi!”

¹⁴ Motae i Elisa, ”A nee-Do Ueno luwuakoano anu tuwu ka anu kupekakaako Ira, ba nahi hangano i Yosapa, mokoledo to Yehuda nahi aku kumitakomiu ke meriokomiu.

¹⁵ Kanandio-andio, wawaomo ndi ongkue asa mia puu mpekatapi.” Tempono ipekatapi mia atuu, pabawa-Do i Ue mewinsokio i Elisa.

¹⁶ Mepauomo, ka i'amba motae, ”Kanandiomo pau-Do i Ue: Weweuomo a korono mo'are andio luwuno pangkoro,

¹⁷ hangano kanandiomo pau-Do i Ue: Nahi komiu mpohawe angi ka usa, sine korono mo'are andio ta bukeako uwoi, ranta kai mpohawe mpo'inu saru pinotuwu sumbelea ka pinotuwu pesawia.

¹⁸ Mongkona andio monongko koa a pongkita-Do i Ue; Ira koa meweengakono to Moabi a ngkaemiu.

¹⁹ Komiu koa menangio luwuno kota mebente ka luwuno kota bininiki. Komiu mpobangkuo luwuno keu anu moiko, me'onsoo luwuno mata uwoi, ka luwuno lere anu moiko komiu mensolangiakono watu.”

²⁰ Tisomono tempono mia mpopesombaako pesomba, borono haweomo uwoi inso i Edomi, ka wita atuu bukeako uwoi.

²¹ Mansado merongeo luwuno to Moabi nine mokole atuudo melako iramo ira mpetea saru ondae, luwuno mia anu mokompowawaomo parewa mpetea ka mbo'u anu lalu mota'u, mewinawa ka domeninaa a ntida wita.

²² Tisomono mo'o-mo'oru mansado mpewangu ka oleo mepansari a wawo uwoi atuu, tengkitaomo a nto Moabi atuu uwoi i arodo motaha kana rea.

²³ Mpebooli iramo, ”Atuu rea! Bara'ura mokole atuudo mambepepate iramo ka mpebobatu iramo pada ondaedo. Kanandio-andio, hei Moabi, impomurumo!”

²⁴ Sahawedo a mpekemaado to Isaraeli, mpentade iramo to Isaraeli, ka domenangi ira to Moabi, ranta ka dompolai inso i arodo to Isaraeli. To Isaraeli mpewinsokio witado to Moabi ka dompepate ira to Moabi.

²⁵ Domehoao luwuno kota ka sompo mia mewunoako watu a lere anu moiko ranta kai buke. Dome'onsoo luwuno mata uwoi ka dompobangku ira luwuno keu anu moiko; butumo koa Kiri-Harese anu tepo'ia. Sine, luwuno puu mpepidi mengkaduo kota andio ka mensapoio.

²⁶ Mansano kumitao mokoledo to Moabi nine peteaa atuu tedoa ipemobeao, i'alao pitu etu mia puu mpo'ini ponai merongaakono ta metolahako i bungkuno te'aro ndi mokole Edomi, sine nahi pokompeluarako.

²⁷ Ka i'amba umalao anano anu aka anu ta gagi mokole umeuo, kai pesombaakono gagi pesomba tinunu a wawo bente. Onaemo kai tesingka tekuda-Do anu mongkokongiri a nto Isaraeli. Mpelungka ira mebintao ka dompekule i witado.