2 Mokole 24 - Wunta Mempori

¹ I tempono poparentaano i Nebukanesa, mokoledo to Babeli, lumako monsapoi. I Yoyakimi metenunu ndi onae otolu nta'u tehineno. Sine lembuino onae mewolili umewaio i Nebukanesa.

² Ondae i Ue tumena ira gerombola Kasidimi, gerombolado to Arami, gerombolado to Moabi ka luwuno gerombola inuleno i Amoni umewaio i Yoyakimi. Dotena ira lumako umewaio Yehuda ka dosolangi ira menunu saru pau-Do i Ue anu pinohawe-Do tetenaa-Do luwuno nabi.

³ Mentee ntu'u, mongkona atuu gagi a nto Yehuda menunu saru petena-Do i Ue ka doliahako ira inso i aro-Do, hangano luwuno halano i Manase, menunu saru luwuno anu wineweuno,

⁴ hangano mbo'u reado mia anu nahina salado anu i'uwuomo. Hangano iweweuomo Yerusale bukeako reano mia anu nahina salano, ka Ondae i Ue nahi Dobehe umampunio.

⁵ Anu susua inso a nteweweuno i Yoyakimi ka luwuno anu wineweuno, kombake luwuno atuu teburi a wunta tutuludo mokole i Yehuda?

⁶ I Yoyakimi mate. Ka i'amba i Yoyakini, anano, gagi mokole umeuo.

⁷ Mokoledo to Masiri nami peluarako mbo'u metea inso i witano, hangano ipongko'alaomo luwu mokoledo to Babeli, luwuno anu tewinso witano mokoledo to Masiri mompu'u inso a ngkoro Masiri hawe a ngkoro Eparata.

I Yoyakini mokole i Yehuda

⁸ Tinuwuno i Yoyakini hopulu ka oalu nta'u tempono igagi mokole ka otolu wula tehineno ipoparenta i Yerusale. Neeno ineno i Nehusita anano i Elinatani inso i Yerusale.

⁹ Onae moweweu anu mosa'o a pongkita-Do i Ue, mengkena kana anu wineweuno amano.

¹⁰ I tempo atuu luwuno miano i Nebukanesa mokole i Babeli, lumako sumapoio Yerusale ka kumaduo kota atuu.

¹¹ I Nebukanesa mokoledo to Babeli, hawe mbo'u sumapoio kota atuu, anu kontongaano domengkaduo luwuno miano.

¹² Ka i'amba meluarakomo i Yoyakini mokole i Yehuda, tepohaweakono mokoledo to Babeli, onae saru ineno, luwuno pegawaino, luwuno anu langkai potorono ka luwuno pegawai langkanaeno. Onae irakoo mokoledo to Babeli ia ta'u ko'oalu poparentaano.

¹³ I Nebukanesa lumuarakono inso i ra'ai luwuno anu pinekaria a raha-Do i Ue ka anu pinekaria a langkanaeno mokole. Ilangkoo mbo'u wulaa inso a luwuno parewa wulaa anu wineweuno i Salomo mokole i Isaraeli, i raha-Do i Ue kana anu Dopauomo i Ue.

¹⁴ Iwawao luwuno palilino Yerusale a pontadia, luwuno tadulako sorodadu ka luwuno puu mpetea anu moroso ka mosia, hadiono hopulu nsowu mia tinawa, luwuno mbo'u puu mpo'angga ka puu mpolabu. Nahina bininta sangkadio mia memongkokolaro inso i olono palili.

¹⁵ Iwawao i Yoyakini a mpontadia i Babeli. Inedo mokole iwawao mbo'u, luwuno beinedo mokole, luwuno pegawai langkanaeno ka luwuno petewawa gagi mia tinadi i Babeli inso i Yerusale.

¹⁶ Luwuno mia anu moroso ka mosia, pitu nsowu mia hadiono, luwuno puu mpo'angga ka puu mpolabu, asa nsowu mia hadiono, luwuno puu mpetea anu moroso metea, iwawa ira mokoledo to Babeli gagi mia tinadi i Babeli.

¹⁷ Ka i'amba mokole i Babeli motoroo i Matania, maamano i Yoyakini gagi mokole umeuo ka umeuo neeno gagi i Sedekia.

Inso ndi Sedekia ranta tekaleno poparentaa Yehuda

¹⁸ Tinuwuno i Sedekia rua pulu ka asa nta'u tempono igagi mokole ka hopulu ka asa nta'u tehineno ipoparenta i Yerusale. Neeno ineno i Hamutali anano i Yeremia, inso i Libina.

¹⁹ Onae moweweu anu mosa'o a pongkita-Do i Ue, mengkena kana anu wineweuno i Yoyakini.

²⁰ Mentee ntu'u, hanganomo tekuda-Do i Ue kai gagi kanatuu i Yerusale ka Yehuda, ranta Dotadi ira inso i aro-Do. Ka i'amba i Sedekia umewaio mokoledo to Babeli.