2 Mokole 22 - Wunta Mempori

I Yosia mokole i Yehuda – Wunta Taura wali hinawe

¹ Tinuwuno i Yosia oalu nta'u tempono igagi mokole ka tolu pulu ka asa nta'u tehineno ipoparenta i Yerusale. Neeno ineno i Yedida anano i Adaya inso i Bosokati.

² Onae moweweu anu mentee a pongkita-Do i Ue ka itondao luwuno sala ntumuwuno i Daudi, uempu'uno. Nahi pansia i koana ke i manggali.

³ Ia ta'u kohopulu ka oalu poparentaano, mokole Yosia tumenao i Sapani anano i Asalia anano i Mesulami, puu mpoburi a poparentaa lumako a raha-Do i Ue, saru pe'oliwi,

⁴ ”Lakomo ndi sando mpesomba langkai Hilikia. Tenaomo kai peweengakono luwu doi anu winawa a laro raha-Do i Ue, anu domepumpuomo puu mpodagai pewowa inso a mpalili.

⁵ Moikoomo doi atuu pineweengako a ngkaedo puu mpo'angga anu pinokogagi puu mpodagai a raha-Do i Ue, kai pineweengako a luwuno puu mpo'angga anu kongko a raha-Do i Ue ka dompokomoikoo tebetano raha atuu,

⁶ a luwuno puu mpo'angga keu, puu mpowangu ka luwuno puu mpo'angga watu; saru mbo'u mpo'oli keu ka watu pina'o pokomoikono raha atuu.

⁷ Siimo i inema rekeno ndi ondae mongkona doi anu wineeako a ngkaedo, hangano moleo aroado mpo'angga.”

⁸ Sando mpesomba langkai Hilikia motaeakono i Sapani, puu mpoburi a poparentaa, ”Wunta songka Taura atuu kuhaweomo a raha-Do i Ue!” Ka i'amba wunta atuu ipeweengakono i Hilikia ndi Sapani ka ibasao i Sapani.

⁹ Ka i'amba i Sapani, puu mpoburi atuu, mewinso me'aro ndi ondae mokole ka mohaweo mongkona atuu ndi ondae mokole, ”Luwuno atamiu andio umari iramo me'alao doi anu kongko a raha-Do i Ue ka mpeweengakono a ngkaedo luwuno puu mpo'angga anu medagaio raha atuu.”

¹⁰ I Sapani, puu mpoburi atuu, pauako ira mbo'u mokole, ”Ipeweengakonomo sando mpesomba Hilikia paluluno wunta ndi ongkue.” Ka i'amba i Sapani basaako ira mokole i arodo.

¹¹ Rumongeo luwuno pauno wunta songka Taura atuu, doberio mokole sangkado.

¹² Ka i'amba mokole parentao sando mpesomba Hilikia, i Ahikami anano i Sapani, i Akabori anano i Mika, i Sapani, puu mpoburi atuu ka i Asaia mbo'u pegawaido mokole, ipotae,

¹³ ”Imelakomo, mpo'emaakune pontiso-Do i Ue, tiado palili ka luwuno Yehuda, mongkona pau a wunta anu hinawe andio, hangano mongkokongiriomo mokulano tekuda-Do i Ue anu tensila ndi ontae, hangano nahi domperorongeakono uempu'uto luwuno pauno a wunta andio saru meweweuo mengkena kana anu teburi i larono.”

¹⁴ Ka i'amba melako iramo sando mpesomba Hilikia, i Ahikami, i Akibori, i Sapani ka i Asaia ndi nabi beine Huluda, kombiano i Salumi anano i Tinawa anano i Harihasi, asa mia anu umorusuo luwuno sangka. Nabi beine atuu mo'ia i Yerusale, a Mpe'iniaa Wo'ohu. Domempauakono mongkona atuu.

¹⁵ Nabi Beine atuu sumangki ira, ”Kanandiomo pau-Do i Ue, Ue Alado to Isaraeli! Pauakonomo mia anu tumena komiu aiwa ndi ongkue!

¹⁶ Kanandiomo pau-Do i Ue, Menteeano Aku mompotii masolaa a mpo'ianga andio ka a mpalilino, menunu saru luwuno pauno wunta anu umari basaomo mokole i Yehuda,

¹⁷ hangano domebinta Aku ka mpotunu pesomba a mpinesombai susua. Hangano luwuno inanggano kaedo mpokontesingkao tekuda-Ku. Tekuda-Ku mbo'u ta tensila a mpo'ianga andio ka nahi pinokompepate.

¹⁸ Sine ndi mokole i Yehuda, anu tumena komiumo ka impo'ema pontiso-Do i Ue, asalakono imempauakono kanandio: Kanandiomo pau-Do i Ue, Ue Alado to Isaraeli: Mongkona pau anu urongeomo atuu,

¹⁹ hangano omue me'o'ole ka me'urumako i aro-Do i Ue, ka u'amba berio sangkamu ka mengese i aro-Ku mansamu rumongeo songka anu Kupauo mongkona po'ianga andio ka palilino nine ira megagi mongkokongiria ka totonaa, onaemo ka Kurongeo, kanandiomo pau-Do i Ue.

²⁰ Onaemo pu'uno, menteeano Aku pumpuko saru uempu'umu, ka kokinaburu moiko, ka matamu nahi ta kumitao luwuno masolaa anu Aku motiio a mpo'ianga andio.” Ka do'amba mpohaweo sangki atuu ndi ondae mokole.