2 Mokole 20 - Wunta Mempori

I Hisikia mahaki ka pinokotompa

¹ A luwuno oleo atuu i Hisikia mahaki ka ilawupo imate. Ka i'amba i nabi Yesaya anano i Amosi aiwa ka ipotaeakono, ”Kanandiomo pau-Do i Ue: Pobintamo pe'oliwimu a nsomborimu, hangano omue komate, nami kotompa mbo'u.”

² I Hisikia wolilio rupano me'aro a rere ka ipekakai ndi Ondae i Ue,

³ ”Oo Ue, po'ineomo Irambeo nine tuwu akumo metenunu i aro-Miu ka moleo aroa; moweweu akumo hapa anu moiko a pongkita-Miu.” Ka i'amba i Hisikia mengese mongkoko'undu.

⁴ Se'eluno napi peluarako i Yesaya inso a kintala i tongano, haweomo pau-Do i Ue ndi onae,

⁵ ”Pekulemo ka pauakono i Hisikia, mokoledo bawaa-Ku: Kanandiomo pau-Do i Ue, Ue Alano i Daudi, ama mpu'umu: Kurongeomo pekakaimu ka Kukitaomo uwoi matamu. Menteeano Aku koa mokotompako. A oleo ko'otolu omue kolumako a raha-Do i Ue.

⁶ Aku mokomelaio tinuwumu hopulu ka olima nta'u mbo'u. Aku koa motolako ka kota andio inso a ngkaeno mokoledo to Asuri ka walao kota andio hangano Ongkue ka hangano i Daudi, tetenaa-Ku.”

⁷ Ka i'amba motae i Yesaya, ”Alaomo kukisi ara!” Ka do'amba me'alao mia ka menaao a ngkambano atuu, ka onae tompaomo.

⁸ Se'eluno atuu i Hisikia mepauomo ndi Yesaya, ”Hapake tondonino nine Ondae i Ue Ira mokotompa aku ka aku koa lumako a raha-Do i Ue a oleo anu ko'otolu?”

⁹ Sumangki i Yesaya, ”Ndiomo anu ta gagi petondoni ndi omue inso ndi Ondae i Ue nine Ondae i Ue Ira weweuo hapa anu umariomo dinandi-Do; Nde eo-eo atuu melempa hopulu laampa'a ke monsuka hopulu laampa'a?”

¹⁰ Motae i Hisikia, ”Moruana koa eo-eo atuu ta me'ondauako hopulu laampa'a! Posuleno, asalakono eo-eo atuu mosuka hopulu laampa'a i bungkuno.”

¹¹ Mebooliomo i nabi Yesaya ndi Ondae i Ue, ka i'amba Ondae i Ue weweuo eo-eo atuu mosuka hopulu laampa'a i bungkuno inso a olono anu umariomo ipelempario a pontisono mata oleo wineweuno i Ahasi.

I Hisikia ka luwuno tinena inso i Babeli

¹² I tempo atuu i Merodaki-Baladani anano i Baladani, mokole i Babeli, montena mia mowawa wunta ka pompowee ndi Hisikia, hangano irongeo i Hisikia mahaki.

¹³ Mawongko aroano i Hisikia domehawe. Ipopokitaako ira luwuno raha langkai ponaapa arataano, wulaa ka salaka, rampa-rampa ka lana anu hadio olino, raha langkai ponaapa parewa mpeteano ka luwuno anu hina a laro mponaapa arataano. Nahina sangka anu nahi popokitao i Hisikia ndi ondae, moiko i langkanae maupo a luwuno wita pinabawaino.

¹⁴ Ka i'amba haweomo i nabi Yesaya ndi mokole Hisikia ka ipesikeno ndi onae, ”Hapamo ke anu pinaudo mia andiodo? Isuake dome'inso?” Sumangki i Hisikia, ”Ondae me'aiwa inso i wita anu olai, inso i Babeli!”

¹⁵ Isikenoo mbo'u, ”Hapamo anu kinitado a langkanaemu?” Sumangki i Hisikia, ”Luwuno anu hina a langkanaeku domengkitaomo. Nahina anu nahi kupopokitaako ira a mponaapa arataaku.”

¹⁶ Ka i'amba motae i Yesaya ndi Hisikia, ”Rongeomo pau-Do i Ue!

¹⁷ Menteeano, ta hawe tempono, luwuno anu hina a langkanaemu ka anu ninaado uempu'umu hawe oleo andio ta winawa i Babeli. Nahina anu ta tebinta, kanandiomo pau-Do i Ue.

¹⁸ Asa ntia inso a inulemu anu ta hinawemu, ta inala gagi pegawai a langkanaeno mokole i Babeli.”

¹⁹ Sumangki i Hisikia ndi Yesaya, ”Moiko ntu'u pau-Do i Ue anu pinaumu atuu!” Sine pinewowolono, ”Poolo ka ihina manangai ka rodoa asa ntinuwuku!”

²⁰ Anu susua inso a nteweweuno i Hisikia, luwuno mosiano ka kana'umpe ipoweweu limbo ka pangkorono uwoi ka mowaao uwoi a laro ngkota, kombake luwuno atuu teburi a wunta tutuludo mokole i Yehuda?

²¹ I Hisikia mate. Ka i'amba i Manase anano gagi mokole umeuo.