2 Mokole 19 - Wunta Mempori

Yerusale tola inso a ngkaeno i Sanaheri

¹ Mansano rumongeo mokole Hisikia mongkona atuu, iberio sangkano ka koroino ikukumbuakono sawu po'inombo, ka i'amba mewinso a raha-Do i Ue.

² Ka i'amba tumenao i Eliakimi, petewawa langkanae, i Sebana, puu mpoburi a poparentaa ka luwuno mia memota'u i olodo luwuno sando mpesomba saru mpekukumbuako sawu po'inombo, tepohaweakono i nabi Yesaya anano i Amosi.

³ Mpotae ira ndi onae, ”Kanandiomo ipotae i Hisikia: Oleo andio oleo masukaraa, oleo pohukua ka pompepaukiako; hangano haweakoomo tempono ta me'ana, sine nahina roso ta me'ana.

⁴ Bara'ura Dorongeomo i Ue, Ue Alamiu pinauno i rabi-sakehi atuu anu tinenano mokoledo to Asuri, ueno kai tetewehi Ira Ue Ala anu tuwu, ranta Ondae i Ue, Ue Alamiu Ira moweeakono pohuku hangano luwuno pinauno anu Dorongeomo. Moikoomo ipekakaiako ira toreano anu da tebinta andio!”

⁵ Mansado mehawe pegawaino mokole Hisikia ndi Yesaya,

⁶ motaeomo i Yesaya ndi ondae, ”Pauako iramo uemiu kanandio: Kanandiomo pau-Do i Ue: Siimo doitoakono pau anu rinongemu anu domempauomo atano mokoledo to Asuri mepaukia-Kune.

⁷ Menteeano, Aku numaao asa penaa a laro ngkoroino, ranta kai poronge lele nahi mentee ka ipekule i witano. Aku weweuo kai mate tebangkuako ponai i witano onaeno.”

⁸ Mansano mekule i rabi-sakehi atuu, ihaweo mokoledo to Asuri metea umewaio i Libina. Hangano, irongeo nine ondae mokole melungka iramo inso i Lakisi.

⁹ Kontongaano atuu dorongeo mokole lele mongkona i Tirihaka, mokoledo to Etiopia, kanandio, ”To'oriomo, onae meluarakoomo metea umewaiko,” rumongeo mongkona atuu, itena ira mia lumako ndi Hisikia, saru pe'oliwi,

¹⁰ ”Kanandiomo asalakono imempauakono i Hisikia, mokole i Yehuda: Siimo tepopandei ndi Ondae Ue Alamu anu pinerorohimu atuu, saru pedandi: Yerusale nahi ta pineweengako a ngkaeno mokoledo to Asuri.

¹¹ Menteeano, omue isa'a rumongeo mongkona anu wineweudo luwuno mokoledo to Asuri a luwuno wita nine domeropu iramo. Kana'umpemo ke omue kopinotola?

¹² Luwuno tongku anu rinopudo uempu'uku, Gosani, Harani, Resepi, ka inuleno i Edeni anu i Telasari, nde hori ira pinesombai susua motola ira?

¹³ Mokole i wita Hamati, mokole i wita Aripadi, mokole i kota Separawaimi, mokole i wita Hena ka mokole i wita Iwa, isua ira ke?”

¹⁴ I Hisikia tumarimao wunta atuu inso a ngkaedo tinena ka ibasao. Ka i'amba lumako a raha-Do i Ue ka iwileo wunta atuu i aro-Do i Ue.

¹⁵ I Hisikia mekakai i aro-Do i Ue, kanandio, ”Oo Ue, Ue Alado to Isaraeli anu mo'ia i wawono kerubi! Butu Omiumo isa'a Ue Alano luwuno poparentaa i tolino. Omiumo anu mokogagio langi ka tolino.

¹⁶ Ipo'aroomo biri-Miu, oo Ue ka Irongeomo. Iwileomo mata-Miu, oo Ue ka Ikitaomo. Irongeomo luwuno pinauno i Sanaheri anu i'oliwiomo me'uru-uru Komiu Ue Ala anu tuwu.

¹⁷ Oo Ue, menteeano luwuno mokoledo to Asuri mporopu iramo tongku ka luwuno witado,

¹⁸ ka menaao pinesombaido susua a laro api, hangano ondae komba Ue Ala, butu wineweuno kaeno mia, butu keu ka watu, ranta ka dopokonsolangi ira.

¹⁹ Onaemo pu'uno, oo Ue, Ue Alamami, Ikadudui kamimo inso a ngkaeno ka domento'orio luwuno poparentaa i tolino nine butu Omiumo isa'a Ue Ala, oo Ue.”

²⁰ Ka i'amba i Yesaya anano i Amosi montena mia tepohaweakono i Hisikia saru pe'oliwi, ”Kanandiomo pau-Do i Ue, Ue Alado to Isaraeli: Hapa anu umariomo upekakaiakono ndi Ongkue mongkona i Sanaheri, mokoledo to Asuri, Kurongeomo.

²¹ Ndiomo pau anu Dopauomo i Ue mongkona onae: Ana beine i Sioni, ana beine atuu, ipe'uru-urukomo, ka ipasinggiriko, Ana beine i Yerusale mebitu-bitu uluomo i bungkumu.

²² Isemake anu pine'uru-urumu ka pinepaukiakomu? Te'aro ndi sema ke upepau meroku, ka mengkita mompelangka-langlai? Te'aro ndi Ondae anu tedoa Mempori Ue Alado to Isaraeli!

²³ Molalo luwuno tinenamu upe'uru-uru Iramo i Ue. Upotae, ’Hangano hadiono karetaku mewuatako aku a luwuno po'ianga mantande i mentorukuno, a mpo'ianga anu lalu olai i torukuno Libano; kutuehi ira keu arasino anu ondau ka langkai, luwuno keu sinobarino anu tebiniki; hawe akumo i punsuno anu lalu mantande, a ntobu anu mokapa.

²⁴ Mongkeke akumo ka mo'inu uwoi i wita susua, kupokomo'areakonomo pele ngkaruku luwuno korono i wita Masiri!’

²⁵ Komba urongeomo ke nine Kupakosiomo mompu'u da olai tempono? Kupewowoloomo i tempono i ndi'ipua ka kanandio-andio Kupokogagio: omue weweuo luwuno kota mebente boni-boni, gagi howuno hanga ngkota,

²⁶ ka palilino anu nahina rosono gagi ntededengke ka mo'o'anuno. Megagi ira kana pinopaho i tonga mpada kana ewo molowulu, kana ewo a wawo mbumbunge, anu moleuako angi i sabaano oleo.

²⁷ Kuto'orio pentoro ka pewangumu, peluarako pewinsomu, tekudano aroamu ndi Ongkue.

²⁸ Hangano u'ewai Akumo, ka pompelangka-langkaimu mewuatakoomo hawe a biri-Ku, Aku pasao kae-Ku a engemu ka sama-Ku a ngangamu. Aku mokuleko telalo a nsala inso isua u'aiwa.

²⁹ Ndiomo anu ta gagi petondoni ndi omue, Hisikia: I larono ta'u andio mia mpongkaa hapa anu tuwuako onaeno, ka i larono ta'u ko'orua, hapa anu tuwu inso a mpinopaho anu amba-ambano. Sine, i larono ta'u ko'otolu, imporawomo inii, mensowimo, weweumo lere anggoro ka impongkaamo wuano.

³⁰ Luwuno mia anu tepotola i olodo suku Yehuda, anu da tebinta, ira mpehaka mbo'u i totono ka mpewua i wawono.

³¹ Hangano inso i Yerusale ira mpeluarako luwuno mia anu tebinta ka inso i torukuno Sioni luwuno mia anu tepotola; mahakino-Do Ueno luwuakoano Ira weweuo anu andio.

³² Onaemo pu'uno, kanandiomo pau-Do i Ue mongkona mokoledo to Asuri: Onae nahi ta mewinso i kota andio ka nahi ta motolao ana mpanano te'aro i ndi'ai. Onae mbo'u nahi ta aiwaako kanta ka nahi ta mohowu wita gagi rere watu pongkadua.

³³ Telalo a nsala tempono i'aiwa onae pesalaano mekule, sine a ngkota andio nahi ta mewinso, kanandiomo pau-Do i Ue.

³⁴ Aku walao kota andio kumaduduio, hangano Ongkue ka hangano i Daudi tetenaa-Ku.”

³⁵ A wongi atuu meluarakoomo Mala'eka-Do i Ue mompepate asa etu ka halo pulu ka olima nsowu mia a mpekemaado to Asuri. Tisomono, tempono dompewangu mia mo'o-mo'oru, tengkitaomo luwuno gagiomo wata ngkoroi!

³⁶ Onaemo pu'uno i Sanaheri mokoledo to Asuri kai pelungka mekule ka mo'ia i Niniwe.

³⁷ Asa tempo, tempono ipekakai a laro raha mpelahumoaa Nisiroki, dewano, i Adarameleki ka i Sareseri, anano mepateakono ponai. Ka do'amba molai i wita Arara. Ka i'amba i Esarahadono, anano, gagi mokole umeuo.