2 Mokole 18 - Wunta Mempori

I Hisikia mokole i Yehuda

¹ Ia ta'u ko'otolu poparentaano i Hosea anano i Ela, mokole i Isaraeli, i Hisikia anano i Ahasi mokole i Yehuda gagi mokole.

² Tinuwuno rua pulu ka olima nta'u tempono igagi mokole ka rua pulu ka osio nta'u tehineno ipoparenta i Yerusale. Neeno ineno i Abi anano i Sakaria.

³ Onae moweweu hapa anu mentee a pongkita-Do i Ue, mengkena kana anu wineweuno i Daudi, ama mpu'uno.

⁴ Ipokotampulao luwuno pongku wita pesombaa, luwuno tugu ipuro-puroo ka luwuno karuno pelahumoaa ituehio, saru ule mala wineweuno i Musa iperawo-rawoo, hangano hawe i tempo atuu to Isaraeli da mpotunu pesomba tiano ule anu pinau Nehusitani atuu.

⁵ Onae mompe'ala-ala ndi Ondae i Ue, Ue Alado to Isaraeli, ka i olodo luwuno mokole i Yehuda, moiko anu umarino onae maupo anu se'eluno, nami hina mbo'u anu mengkena kana onae.

⁶ Onae me'ini moroso ndi Ondae i Ue. Onae nahi pebungkui Ira i Ue, tendeano me'ini a luwuno parenta anu Dopohaweomo ndi Musa.

⁷ Ondae i Ue kumongkomio, maupo isua ilako mehasili. Onae umewaio mokoledo to Asuri ka nami petenunu mbo'u ndi onae.

⁸ Inangi ira mbo'u to Pelisiti hawe i Gasa ka luwuno witano, mompu'u inso a ngkota hinao menara podagaia ranta a ngkota mebente.

⁹ Ia ta'u ko'opaa poparentaano mokole Hisikia, onaemo ta'u ko'opitu poparentaano i Hosea anano i Ela, mokole i Isaraeli, lumakoomo i Salamaneseri, mokoledo to Asuri sumapoio Samaria ka kumaduo.

¹⁰ Kota atuu pinongko'ala umarino lalo otolu nta'u. Kanandiomo ipinongko'ala Samaria ia ta'u ko'onoo poparentaano i Hisikia, onaemo ta'u ko'osio poparentaano i Hosea, mokole i Isaraeli.

¹¹ Mokoledo to Asuri wawa ira to Isaraeli a pontadia i Asuri ka numaa ira i Halahi, a wiwi ngkoro Habori i wita Gosani ka a luwuno kotado to Madai.

¹² Kai gagi kanatuu hangano nahi domperorongeakono pau-Do i Ue, Ue Alado ka melimpaio pedandia-Do, luwuno anu iparentaako ira i Musa, tetenaa-Do i Ue. Nahi domebehe mperorongeakono ka nahi domeweweuo.

I Sanaheri, mokoledo to Asuri kumaduo Yerusale

¹³ Ia ta'u kohopulu ka opaa poparentaano mokole Hisikia, i Sanaheri mokoledo to Asuri lumako sumapoio luwuno kota mebente i wita Yehuda, ka i'amba mongko'alao.

¹⁴ I Hisikia mokole i Yehuda montena mia ndi mokoledo to Asuri i Lakisi, saru pe'oliwi, ”Salaomo wineweuku. Posukamo inso ndi ongkue. Maupo hapa ipopotembiakune aku umihiio.” Ka i'amba mokoledo to Asuri mopotembiakono i Hisikia, mokole i Yehuda, tolu etu talenta salaka ka tolu pulu talenta wulaa.

¹⁵ I Hisikia meweengakono luwuno salaka anu kongko a laro raha-Do i Ue ka anu pinekaria a langkanaedo mokole.

¹⁶ I tempo atuu i Hisikia bolongko wulaa inso a luwuno pewowa ka a luwuno arono pewowano raha-Do i Ue, anu umariomo i'apiio i Hisikia, mokoledo to Yehuda. Luwuno ipeweengakono ndi mokoledo to Asuri.

¹⁷ Umarino atuu mokoledo to Asuri tumena ira tadulako sorodadu, i rabi-sarisi ka i rabi-sakehi inso i Lakisi lumako ndi mokole Hisikia i Yerusale, sorodadu anu hadio tumonda ira. Melako ira ka mehawe i Yerusale. Mansado melako ka mehawe i tu'ai, mpo'ala ira po'ianga umpeda pangkorono limbo i wawono a nsala langkai a Pada Penatu.

¹⁸ Ondae mebo-boolio mokole. Ka i'amba i Eliakimi anano i Hilikia, petewawa a langkanae, meluarako tepohaweako ira, ipokowalio i Sebina puu mpoburi a poparentaa saru i Yoahi anano i Asapi, puu pompekaria arataano poparentaa.

¹⁹ Motae i rabi-sakehi atuu ndi ondae, ”Pohaweakonomo i Hisikia: Kanandiomo paudo mokole pinelangkai, mokoledo to Asuri: Pompe'ala-ala hapa anu ininimu andio?

²⁰ Potaemu butu pauno wiwimokoa tamo gagi pe'akala ka roso mpetea! Kanandio-andio, isema anu pinerorohimu kau pe'ewa ndi ongkue?

²¹ Oo, momperorohiko a nto Masiri, tuko balo anu tepudu atuu, anu ta dumuhuo kai lompahi kaeno mia anu metumbo ndi onae. Kanatuumo teweweuno i Pirao mokole i Masiri, a luwuno mia anu momperorohi ndi onae.

²² Ke bara'ura komotae ndi ongkue: Mpoperorohi kami ndi Ondae i Ue, Ue Alamami. Kombake Ondae atuu anu luwuno pongku wita pesombaa ndi Ondae ka luwuno meda mpontunua pesomba ndi Ondae ipoko'olaiomo i Hisikia? Kombake ipotaeako ira to Yehuda ka Yerusale: I arono meda pontunua pesomba anu i Yerusalemo andio asalakono impenggolontu mpesomba!

²³ Kanandio-andio, peta'oako iramo ueku, mokoledo to Asuri: Aku koa moweeakomu rua nsowu ngara poolo inso ndi omue upolio meweengako ira mia anu mokompesawikio.

²⁴ Kana'umpemo komonsaari asa mia petewawa sorodadu maupo anu lalu kodei inso i olono atado ueku? Kahinaano momperorohiko a nto Masiri komohawe kareta ka mia mpengara!

²⁵ Ka mbo'u, nde aku aiwa umewaio wita andio ka rumopuo ba nahi saru Ondae i Ue? Ondae isa'a i Ue mepau Iramo ndi ongkue: Lakomo sapoio wita atuu ka ropuomo atuu!”

²⁶ Ka i'amba motaeomo i Eliakimi anano i Hilikia, i Sebina ka i Yoahi ndi rabi-sakehi atuu, ”Pepaumo a mpaudo to Arami ndi omami atamiu andio, hangano kimento'orio. Sine siimo ipepauakami a mpau Yehuda ira merongeo palili anu mekongko a wawo rere watu.”

²⁷ Sine motae i rabi-sakehi atuu, ”Nde dotena aku ueku pauo luwuno pau andio butu ndi ondae uemiu ka ndi omiumokoa? Kombake kutinena mbo'u a luwuno mia anu mpentoro a wawo rere watu, anu mpongkaa ta'ido ka mpo'inu uwoi emedo ondaedo saru omiu?”

²⁸ Ka i'amba i rabi-sakehi mbo'u atuu mentade ka mebooli meroku a mpau Yehuda, ipotae. ”Imerongeomo paudo mokole langkai, mokoledo to Asuri!

²⁹ Kanandiomo paudo mokole: Siimo ipopandeikomiu i Hisikia, hangano onae nahi ta polio motola komiu inso a ngkaeku!

³⁰ Si mpo'ineeo i Hisikia umoluakomiu pomperorohi ndi Ondae i Ue ka ipotae: Ondae i Ue manasa Ira motola kita. Kota andio nahi ta pineweengako a ngkaeno mokoledo to Asuri.

³¹ Si merongeo i Hisikia, hangano kanandiomo paudo mokoledo to Asuri: Poweweumo pedandia sintuwu saru ongkue ka peluarakomo tepohaweakune, ka sompo mia inso i olomiu ta mongkaa inso a ngkeu anggorono ka keu arasino saru mo'inu inso a nsumuruno,

³² ranta ka kuhawe ka wawa komiu a asa wita kana witamiu, wita hinao gandu ka uwoi anggoro, wita hinao lere anggoro ka roti, wita hinao keu saitu, hinao lana ka siu hoani, ranta kai mentuwu nahi memate. Si merongeo i Hisikia, hangano ipopandei komiu ka ipotae: Ondae i Ue Ira motola kita!

³³ Horio ke luwuno pinesombaido susua luwuno tongku singge motolao witano inso a ngkaeno mokoledo to Asuri?

³⁴ Isua iramo pinesombaido susua i wita Hamati ka Aripadi? Isua iramo pinesombaido susua i wita Separawaimi, Hena ka Iwa? Nde dompotolaomo ke Samaria inso a ngkaeku?

³⁵ Isemake i olodo luwuno pinesombaido susua a luwuno wita atuu anu motolaomo witado inso a ngkaeku, ranta Dopolio i Ue motolao Yerusale inso a ngkaeku?”

³⁶ Sine, palili butu komino ka nahi domesangkio maupo te'asa mpali pau, hangano hinao parentado mokole, anu motae, ”Si mesangkio!”

³⁷ Ka i'amba lumakoomo i Eliakimi anano i Hilikia, petewawa langkanae, ka i Sebana, puu mpoburi a poparentaa, ka i Yoahi anano i Asapi, puu pompekaria arataa a poparentaa, mpe'aro ira ndi Hisikia, saru sangkano anu bineri, ka i'amba pauako ira mokole pauno i rabi-sakehi atuu.