2 Mokole 16 - Wunta Mempori

I Ahasi mokole i Yehuda

¹ Ia ta'u kohopulu ka opitu poparentaano i Pekahi anano i Remalia, i Ahasi anano i Yotami mokole i Yehuda, gagi mokole.

² Tinuwuno i Ahasi rua pulu nta'u tempono igagi mokole ka hopulu ka onoo nta'u tehineno ipoparenta i Yerusale. Onae nahi poweweu hapa anu mentee a pongkita-Do i Ue, Ue Alano, kana i Daudi ama mpu'uno.

³ Itondao sala ntumuwudo luwuno mokole i Isaraeli, tendeano ipesombaakono anano a laro api, kana poweweudo anu mokoburu luwuno tongku anu Dosaari iramo i Ue inso i arodo to Isaraeli.

⁴ Onae mompesombaako pesomba ka montunu pesomba a luwuno po'ianga pesombaa a luwuno pongku wita ka i totono sompo keu anu marombo.

⁵ Tempo atuu i Resini mokoledo to Arami ka i Pekahi anano i Remalia, mokoledo to Isaraeli melako ira mpeteaakono Yerusale. Domengkaduo mokole Ahasi, sine nahi dompokonangio.

⁶ I tempo atuu i Resini, mokoledo to Arami, mokuleo kota Elati a nto Edomi ka sumaari ira luwuno to Yehuda inso i kota Elati. To Edomi mehawe i kota Elati ka mpo'ia i ra'ai hawe oleo andio.

⁷ I Ahasi montena mia lumako ndi Tigalati-Pileseri, mokoledo to Asuri, saru pe'oliwi, ”Ongkue andio atamiu ka anamiu. Aiwamo kadudui aku inso a ngkaeno mokoledo to Arami ka inso a ngkaeno mokoledo to Isaraeli anu aiwa iramo sumapoi aku.”

⁸ I Ahasi umalao salaka ka wulaa anu ninaa a laro raha-Do i Ue ka anu pinekaria a langkanaedo mokole, ka i'amba umoliwio ndi mokoledo to Asuri gagi pompowee.

⁹ Mokoledo to Asuri merorongeakono ka ilako umewaio kota Damasi ka ipongko'alao. Iwawa ira palilino a pontadia i Kiri ka mepateo i Resini.

¹⁰ Tempono mokole Ahasi lumako i Damasi tepohaweakono i Tigalati-Pileseri, mokoledo to Asuri, ikitao meda pontunua pesomba anu kongko i Damasi. Ka i'amba mokole Ahasi umoliwio ndi sando mpesomba Uria pandiri ka gambarano meda pontunua pesomba atuu soompo saru podedeno weweuano.

¹¹ Ka i'amba sando mpesomba Uria wanguo meda pontunua pesomba mengkena kana hapa anu inoliwino mokole Ahasi inso i Damasi. Kanandiomo iweweuo sando mpesomba Uria se'eluno ihawe mokole Ahasi inso i Damasi.

¹² Sapekuledo mokole inso i Damasi, dokitao meda pontunua pesomba atuu. Ondae mokole rumangkuhio meda pontunua pesomba atuu ka dopewuatako i tu'ai.

¹³ Ipesombaakono pesomba tinununo ka pesomba kaangano, montawa pesomba tinawano ka mesiwuiakono rea pesomba tekaduduiano a meda pontunua pesomba atuu.

¹⁴ Meda mala pontunua pesomba i aro-Do i Ue ilimbao inso i arono raha-Do i Ue, inso i olono meda pontunua pesomba wo'ohu atuu saru raha-Do i Ue, ka i'amba numaao te'alaako i utarano meda pontunua pesomba wo'ohu atuu.

¹⁵ Ka i'amba mokole Ahasi parentao sando mpesomba Uria, ”Pesombaakonomo a wawo meda pontunua pesomba langkai atuu pesomba tinunu mo'oru ka pesomba tinunu ngkiniwia, pesomba tinunu ka pesomba kaangado mokole, pesomba tinunu ka pesomba kaanga saru luwuno pesomba tinawado luwuno palili. Siwuiakonomo a meda pontunua pesomba atuu luwuno reano pesomba tinunu ka luwuno reano pesomba sinumbele. Sine, meda mala pontunua pesomba atuu aku pakeo mo'ema pontiso.”

¹⁶ Sando mpesomba Uria weweuo mengkena kana anu doparentaakono mokole Ahasi.

¹⁷ Mokole Ahasi poleo dopi tutuwino kareta pontumbo ka iliahakono bolusa pewo'ohia inso i wawono. Ipotiio bolusa langkai anu nineeako ”Tahi” inso i wawono sapi mala anu tumumboo ka inaao a wawo po'empehi watu.

¹⁸ Tambi tinutuwi pakea oleo Saba anu winanguomo a raha-Do i Ue ka pewowa pewinsoado mokole anu te'alaako i bungkuno iliahakono inso a raha-Do i Ue, hangano mo'ala aroa ndi mokoledo to Asuri.

¹⁹ Anu susuano inso a nteweweuno i Ahasi ka hapa anu wineweuno, kombake luwuno atuu teburi a wunta tutuludo mokole i Yehuda?

²⁰ Mokole Ahasi mate ka ikinaburu saru uempu'uno i kota Daudi. Ka i'amba i Hisikia anano gagi mokole umeuo.