2 Mokole 15 - Wunta Mempori

I Asaria mokole i Yehuda

¹ Ia ta'u korua pulu ka opitu poparentaano i Yerobea, mokole i Isaraeli, i Asaria anano i Amasia mokole i Yehuda gagi mokole.

² Tinuwuno hopulu ka onoo nta'u tempono igagi mokole ka lima pulu ka orua nta'u tehineno ipoparenta i Yerusale. Neeno ineno i Yekolia, inso i Yerusale.

³ Onae moweweu hapa anu mentee a pongkita-Do i Ue, mengkena kana anu wineweuno i Amasia, amano.

⁴ Butu koa luwuno pongku wita pesombaa nahi pokotampulao. Mia da mpopesombaako pesomba ka mpotunu dupa a luwuno pongku wita atuu.

⁵ Ondae i Ue moweako ira mokole pohuku, ranta ka domarasaiako haki ngkuli anu mongkokongiri hawe oleo mateado ka mo'ia ira i asa raha peliahakoa. I Yotami anano mokole, kumapalaio langkanae ka molempao poparentaa a mpalili i wita atuu.

⁶ Anu susuano inso a nteweweuno i Asaria ka luwuno anu wineweuno, kombake luwuno atuu teburi a wunta tutuludo mokole i Yehuda?

⁷ I Asaria mate ka ikinaburu i horino uempu'uno i kota Daudi. Ka i'amba i Yotami anano, gagi mokole umeuo.

I Sakaria mokole i Isaraeli

⁸ Ia ta'u kotolu pulu ka oalu poparentaano i Asaria, mokole i Yehuda, i Sakaria anano i Yerobea gagi mokole a nto Isaraeli i Samaria. Onae moparenta onoo wula tehineno.

⁹ Onae moweweu hapa anu mosa'o a pongkita-Do i Ue kana anu domeweweuomo uempu'uno. Nahi bintao luwuno halano i Yerobea anano i nebati, anu poko'ariano to Isaraeli mpoweweu mbo'u hala.

¹⁰ I Salumi anano i Yabesi tepo'asa umewaio. Isapoio ka ipepateo i Yibileami, ka i'amba gagi mokole umeuo.

¹¹ Anu susuano inso a nteweweuno i Sakaria, menteeano teburi a wunta tutuludo mokole i Isaraeli.

¹² Kanandiomo pau-Do i Ue anu pinohawe ndi Yehu, ”Luwuno anamu hawe a inule anu ko'opaa ira mpentoro a ngkadera poparentaa i Isaraeli,” ka gagiomo kanandio.

I Salumi mokole i Isaraeli

¹³ I Salumi anano i Yabesi gagi mokole a nta'u anu kotolu pulu ka osio poparentaano i Usia, mokole i Yehuda. Onae moparenta i Samaria asa wula tehineno.

¹⁴ Umarino atuu i Menahemi anano i Gadi melungka inso i kota Tiresa, ka i'amba hawe i Samaria. Isapoio i Salumi anano i Yabesi i Samaria ka ipepateo, ka i'amba gagi mokole umeuo.

¹⁵ Anu susuano inso a nteweweuno i Salumi ka tepo'asaa umewa anu wineweuno, menteeano teburi a wunta tutuludo mokole i Isaraeli.

¹⁶ Ia tempo atuu mompu'u inso i kota Tiresa, i Menahemi sumapoio kota Tiresa ka luwuno mia anu kongko i larono saru witano, hangano kota atuu nahi inungkahiako. Iropuo kota atuu ka ibonsio luwuno beine anu mentia.

I Menahemi mokole i Isaraeli

¹⁷ Ia ta'u kotolu pulu ka osio poparentaano i Asaria mokole i Yehuda, i Menahemi anano i Gadi gagi mokoledo to Isaraeli. Onae moparenta i Samaria hopulu nta'u tehineno.

¹⁸ Onae moweweu hapa anu mosa'o a pongkita-Do i Ue. Nahi bintao luwuno halano i Yerobea anano i Nebati, anu poko'ariano to Isaraeli mpoweweu mbo'u hala.

¹⁹ I Puli mokole i Asuri, hawe sumapoio wita atuu. Ka i'amba i Menahemi moweeakono i Puli asa nsowu talenta salaka, kai pokowalio mokorosoo poparentaa atuu a ngkaeno.

²⁰ I Menahemi mopotembiako ira doi andio a nto Isaraeli, a luwuno mia anu mompoli ka anu pinelangkai, sompo mia lima pulu sikala salaka anu ta wineeako ndi mokole i Asuri. Ka i'amba mokole i Asuri mekule ka nahi po'ia i ra'ai, i wita atuu.

²¹ Anu susuano inso a nteweweuno i Menahemi ka luwuno anu wineweuno, kombake luwuno atuu teburi a wunta tutuludo mokole i Isaraeli?

²² I Menahemi mate. Ka i'amba i Pekahiya, anano gagi mokole umeuo.

I Pekahiya mokole i Isaraeli

²³ Ia ta'u kolima pulu poparentaano i Asaria, mokole i Yehuda, i Pekahia anano i Menahemi, gagi mokoledo to Isaraeli i Samaria. Onae moparenta orua nta'u tehineno.

²⁴ Onae moweweu anu mosa'o a pongkita-Do i Ue. Nahi bintao luwuno halano i Yerobea anano i Nebati anu poko'ariano to Isaraeli mpoweweu mbo'u hala.

²⁵ Ka i'amba i Pekahi anano i Remalia, petewawa sorodaduno tepo'asa umewaio. I Samaria a benteno langkanaedo mokole, i Pekahi saru lima pulu mia inso a inuleno i Gileadi mepateo i Pekahia, i Arigo ka i Arie. Kanandiomo i Pekahi mepateo i Pekahia ka i'amba gagi mokole umeuo.

²⁶ Anu susuano inso a nteweweuno i Pekahia ka luwuno anu wineweuno, menteeano teburi a wunta tutuludo mokole i Isaraeli.

I Pekahi mokole i Isaraeli

²⁷ Ia ta'u kolima pulu ka orua poparentaano i Asaria mokole i Yehuda, I Pekahi anano i Remalia gagi mokoledo to Isaraeli i Samaria. Onae moparenta rua pulu nta'u tehineno.

²⁸ Onae moweweu hapa anu mosa'o a pongkita-Do i Ue. Onae nahi bintao luwuno halano i Yerobea anano i Nebati, anu poko'ariano to Isaraeli mpoweweu mbo'u hala.

²⁹ I tempo poparentaano i Pekahi mokole i Isaraeli, haweomo i Tigalati-Pileseri mokole i Asuri mongko'alao Iyoni, Abeli-Beti-Ma'aka, Yanoahi, Kedesi ka Hasori, Gileadi ka Galilea saru luwuno wita Napatali. Ka i'amba wawa ira palilino a pontadia i Asuri.

³⁰ I Hosea anano i Ela moweweu tepo'asaa umewaio i Pehahi anano i Remalia. I Hosea mepateo, ka i'amba gagi mokole umeuo ia ta'u korua pulu poparentaano i Yotami anano i Usia.

³¹ Anu susuano inso a nteweweuno i Pekahi ka luwuno anu wineweuno, menteeano teburi a wunta tutuludo mokole i Isaraeli.

I Yotami mokole i Yehuda

³² Ia ta'u ko'orua poparentaano i Pekahi anano i Remalia mokole i Isaraeli, i Yotami anano i Usia mokole i Yehuda gagi mokole.

³³ Tinuwuno rua pulu ka olima nta'u tempono igagi mokole ka onae moparenta i Yerusale hopulu ka onoo nta'u tehineno. Neeno ineno i Yerusa, anano i Sadoki.

³⁴ Onae moweweu hapa anu mentee a pongkita-Do i Ue, mengkena kana anu wineweuno i Usia, amano.

³⁵ Butu koa luwuno pongku wita pesombaa nahi pokotampulao. Tongku atuu da mpopesombaako pesomba ka mpontunu dupa a luwuno pongku wita atuu. Iwanguo Pewowa Langkai Mantande a raha-Do i Ue.

³⁶ Anu susuano inso a nteweweuno i Yotami ka anu wineweuno, kombake luwuno teburi a wunta tutuludo mokole i Yehuda?

³⁷ I tempo atuu Ondae i Ue mompu'u tumenao i Resini mokoledo to Arami ka i Pekahi anano i Remalia umewaio Yehuda.

³⁸ Ka i'amba i Yotami mate. Onae kinaburu saru uempu'uno i kota Daudi, ama mpu'uno. Ka i'amba i Ahasi, anano gagi mokole umeuo.