2 Mokole 13 - Wunta Mempori

I Yoahasi mokole i Isaraeli

¹ Ia ta'u korua pulu ka otolu poparentaano i Yoasi anano i Ahasia, mokole i Yehuda, i Yoahasi gagi mokole a nto Isaraeli i Samaria. Onae moparenta hopulu ka opitu nta'u tehineno.

² Onae moweweu anu mosa'o a pongkita-Do i Ue, ka tuwu montonda halano i Yerobea anano i nebati, poko'ariano to Isaraeli mpoweweu ira mbo'u hala. Onae nahi bintao anu mosa'o.

³ Ka tekuda-Do i Ue tensilaomo a nto Isaraeli, ka Dopeweengako ira a ngkaeno i Hasaeli, mokoledo to Arami ka a ngkaeno i Benihada, anano i hasaeli, mapa ta'u-ta'u tehineno.

⁴ Sine, i Yoahasi mo'ema pompehohawa-Do i Ue ka Dorongeo i Ue, hangano Dokitaomo pompokonsii a nto Isaraeli, anu wineweuno mokoledo to Arami ndi ondae.

⁵ Ondae i Ue moweeako ira to Isaraeli asa mia puu mpongkadudui, ranta ka domentola inso a ngkaedo to Arami. Ka i'amba to Isaraeli ka dompokompo'ia a luwuno kemado kana i ndi'ipua.

⁶ Butukoa nahi domebintao luwuno halado somborino i Yerobea, anu poko'ariano mia mpoweweu mbo'u hala, tendeano mentuwu mpiha a laro hala atuu. Tinaha Asera mbo'u da mentade i Samaria.

⁷ Hangano nami hina mbo'u tebinta sorodadu ndi Yoahasi, sangkadio lima pulu sorodadu mpengara, hopulu kareta ka hopulu nsowu sorodadu mpelempa ngkaru, hangano mokoledo to Arami mokoropu iramo ka ilolanda ira kana awuno ponsesaa.

⁸ Anu susuano inso a nteweweuno i Yoahasi ka luwuno anu wineweuno ka mosiano, kombake luwuno atuu teburi a wunta tutuludo mokole i Isaraeli?

⁹ I Yoahasi mate ka kinaburu i Samaria. Ka i'amba i Yoasi, anano gagi mokole umeuo.

I Yoasi mokole i Isaraeli

¹⁰ Ia ta'u kotolu pulu ka opitu poparentaano i Yoasi, mokole i Yehuda, i Yoasi anano i Yoahasi gagi mokole a nto Isaraeli i samaria. Onae moparenta hopulu ka onoo nta'u tehineno.

¹¹ Onae moweweu anu mosa'o a pongkita-Do i Ue. Onae nahi bintao luwuno hala anu tinisono i Yerobea anano i Nebati anu poko'ariano to Isaraeli mpoweweu mbo'u hala, tendeano tuwu mpiha a laro hala atuu.

¹² Anu susuano inso a nteweweuno i Yoasi, luwuno anu wineweuno, mosiano, kana'umpe ipetea umewaio i Amasia, mokole i Yehuda, kombake luwuno atuu teburi a wunta tutuludo mokole i Isaraeli?

¹³ I Yoasi mate, ka i'amba i Yerobea mentoro a ngkadera poparentaano. I Yoasi kinaburu i Samaria a mpekaburuado mokole i Isaraeli.

Mateno i Elisa ka anu kinohali-haliako a laro ngkaburuno

¹⁴ Tempono mahaki i Elisa ka i'amba mateakono, i Yoasi, mokoledo to Isaraeli aiwa ndi onae kai pengeseio, ipotae, ”Amaku, amaku! Karetado to Isaraeli ka luwuno puu mpesawino ngara!”

¹⁵ Motae i Elisa ndi onae, ”Alaomo pana ka ana mpana!” Ka i'amba umalao pana ka ana mpana.

¹⁶ Ipotae mbo'u ndi mokoledo to Isaraeli, ”Diiomo panamu!” Ipadiio panano, sine i Elisa numaao kaeno a wawo ngkaedo mokole,

¹⁷ ka ipotae, ”Ungkahiomo pentangoa anu i sabaano oleo!” I'ungkahiomo. ”Pepanamo!” Motae i Elisa, ka ipepana. Ka i'amba motae i Elisa, ”Onaemo atuu ana mpana ponangia inso ndi Ondae i Ue, ana mpana ponangia a nto Arami. Konumangio Arami i Apeki ranta ka dometampula.”

¹⁸ Ka i'amba motae, ”Ala iramo ana mpana!” Onaemo ka do'alao mokole. Motae i Elisa ndi mokoledo to Isaraeli, ”Pesepiakono atuu a wita!” Ipesepiakono pentolu, kai penaa-naa.

¹⁹ Tetenaa-Do Ue Ala atuu tekuda ndi onae ka ipotae, ”Bakanaano upesepiakono pelima ke penomo! Bakanandio uweweuo konumangio Arami ranta ka dometampula. Sine kanandio-andio, butu koa pentolu konumangio Arami.”

²⁰ I Elisa mate ka kinaburu. Tempo atuu gerombola Moabi mararu domensapoio wita atuu a mpepo'euano ta'u.

²¹ Pohona tempono tekonai mpokaburu mia mate, borono domengkita ira gerombola atuu. Dompetendeakono wata ngkoroi atuu a laro ngkaburuno i Elisa, ka do'amba melako. Mansano tedanggi a luwuno wukuno i Elisa, wata ngkoroino mia mate atuu wali tuwu ka ipentade.

Ponangino i Yoasi a nto Arami

²² I Hasaeli, mokoledo to Arami mokonsii ira to Isaraeli tempono ituwu i Yoahasi.

²³ Sine Ondae i Ue tedoa mehohawa ira. Mewolili Ira ndi ondae hangano pedandia-Do saru i Burahima, i Saki ka i Yako. Nahi Do'eheakono rumopu ira ka tumadi ira inso i aro-Do ranta kanandio-andio.

²⁴ I Hasaeli, mokoledo to Arami mate, ka i'amba i Benihada, anano gagi mokole umeuo.

²⁵ I Yoasi anano i Yoahasi wali mongko'alao inso a ngkaeno i Benihada, anano i Hasaeli, luwuno kota anu umari pinongko'alano i Benihada a laro mpeteaa inso a ngkaeno i Yoahasi, amano i Yoasi. Pentolu i Yoasi numangio ka wali ipongko'alao luwuno kotado to Isaraeli.