2 Mokole 12 - Wunta Mempori

¹ Ia ta'u ko'opitu poparentaano i Yehu, i Yoasi gagi mokole ka ipoparenta i Yerusale pato pulu nta'u tehineno. Neeno ineno i Sibia, inso i Bereseba.

² I Yoasi moweweu hapa anu mentee a pongkita-Do i Ue asa ntinuwuno, kana anu ipaguruakono sando mpesomba Yoyada ndi onae.

³ Butu koa luwuno pongku wita pesombaa nahi pokotampulao; mia da mpopesombaako ka mpotunu dupa a luwuno pongku wita atuu.

⁴ Motaeomo i Yoasi a luwuno sando mpesomba, ”Luwuno doi anu winawa a raha-Do i Ue gagi pesomba mempori, onaemo doi anu mewinso i tempono i binuri doado to Isaraeli, doi pontolosi tinuwu montonda pontasere anu tekona pepontuno asa mia ka luwuno doi anu winawa a raha-Do i Ue a moleono aroa,

⁵ moikoomo domentarimao sando mpesomba, singge mia inso a mia anu tino'orino, ka moikoomo dompokomoikoo tebetano raha atuu, isuamokoa tebetano atuu hinawe.”

⁶ Sine a nta'u korua pulu ka otolu poparentaano mokole Yoasi luwuno sando mpesomba naapo mbo'u dompokomoikoo tebetano raha atuu.

⁷ Onaemo pu'uno mokole i Yoasi moboio sando mpesomba Yoyada ka luwuno sando mesomba susua ka ipotaeako ira, ”Tembio nahi mpokomoikoo tebetano raha atuu? Kanandio-andio nahi moiko mbo'u impotarima doi inso a mia anu tino'orimiu, sine impeweengakonomo atuu pokomoikoako tebetano raha atuu.”

⁸ Luwuno sando mpesomba mpemoikoo nahi dompotarima mbo'u doi inso a luwuno mia, ka nahi ira mbo'u mpokomoikoo tebetano raha atuu.

⁹ Ka i'amba sando mpesomba Yoyada umalao asa burua, moweweu bolo a ulono. Inaao i horino meda pontunua pesomba, i koana, ba dompewinso mia a raha-Do i Ue. Sando mpesomba puu mpodagai pewowa atuudo menaao i larono luwuno doi anu mewinawado mia a laro raha-Do i Ue.

¹⁰ Mansado mengkitao nine doi a laro burua atuu hadioomo, puu mpoburido mokole aiwa meronga sando mpesomba langkai, ka i'amba tinongo ka dinoa anu tepumpu a laro raha-Do i Ue.

¹¹ Dompeweengakono porokono doi anu pinakosi a ngkaedo puu mpo'angga anu pinokogagi mandoro a raha-Do i Ue. Ka i'amba ondae andio umowahi ira puu mpo'angga keu, puu mpowangu anu me'anggao raha-Do i Ue,

¹² puu mpo'angga rere watu ka puu pompa'o watu. Ondae mpo'oli mbo'u keu ka watu pina'o pokomoikono tebetano raha-Do i Ue ka luwuno poluarakoa doi pokomoikono raha atuu.

¹³ Sine, a raha-Do i Ue nahi wineweu bolusa inso salaka, piso, loea kodei ponsiwui, tawuwua, maupo parewa hapa inso a wulaa ka salaka, saru doi anu winawa a laro raha-Do i Ue.

¹⁴ Hangano, dompeweengakono a luwuno puu mpo'angga kai pinake mompokomoiko raha-Do i Ue.

¹⁵ Nahi dompo'ema kana'umpe pakeano doi atuu a mia anu pinoweeako doi, doi anu ira mewineeako puu mpo'angga, hangano ondae atuu mpo'angga moleo aroado.

¹⁶ Sine doi pesomba pontolosi sala ka doi pesomba po'onini hala nahi winawa a laro raha-Do i Ue, luwuno atuu gagi tiado sando mpesomba.

¹⁷ I tempo atuu i Hasaeli, mokoledo to Arami, lumako meteaakono kota Gati ka iponko'alao. Ka i'amba i Hasaeli montoo sumapoio Yerusale.

¹⁸ Sine i Yoasi, mokoledo to Yehuda, umalao luwuno pesomba mempori anu ipokomemporiomo i Yosapa, i Yorami ka i Ahasia, luwuno mokoledo to Yehuda, luwuno uempu'uno ka luwuno pesomba memporino onaeno, luwuno mbo'u wulaa anu ninaa a mpopekariaa arataa a raha-Do i Ue ka a langkanaedo mokole, ka i'amba umoliwio luwu ndi Hasaeli, mokoledo to Arami. I Hasaeli nahi gagi sumapoio Yerusale.

¹⁹ Anu susuano inso a nteweweuno i Yoasi ka luwuno anu wineweuno, kombake luwuno atuu teburi a wunta tutuludo mokole i Yehuda?

²⁰ Luwuno atano mpelelu mpoweweu tepo'asaa umewa, ka do'amba mpepateo i Yoasi i Beti-Milo anu mo'ia a nsala montindulu lumako i Sila.

²¹ I Yosakari, anano i Simeati, ka i Yosabadi, anano i Someri, ondaemo pegawaino anu mepateo. Ka i'amba kinaburu saru uempu'uno i kota Daudi. Ka i'amba i Amasia, anano gagi mokole umeuo.