2 Mokole 11 - Wunta Mempori

I Atalia pinepate ka i Yoasi gagi mokole

¹ Mansano kumitao i Atalia, ineno i Ahasia nine anano mateomo, onae mompari-pari mepate ira luwu ulea mokole.

² Sine i Yoseba, ana beineno mokole Yorami, pepaekompono beine i Ahasia, umalao i Yoasi anano i Ahasia, mewuni-wuni iwawao inso i olodo anado mokole anu ta pinepate atuu. Onae ka anu mekakaakono inaa ira a bolongko poturia, iwunio inso ndi Atalia, ranta onae nahi pinepate.

³ I Yoasi mo'ia saru beine atuu onoo nta'u tehineno ka mewuni a raha-Do i Ue, kontongaano i Atalia moparenta.

⁴ Ia ta'u ko'opitu i Yoyada umolu ira luwuno petewawa sorodadu asa etu, anu inso a nto Kari ka luwuno puu mpodagai ka dome'aiwa mpe'aro ndi onae a raha-Do i Ue. Onae moweweu pedandia saru ondae ka weweu ira mpesumpa a raha-Do i Ue. Ka i'amba mopokitao anado mokole atuu ndi ondae.

⁵ Iparenta ira kanandio, ”Ndiomo anu asalakono imeweweuo: asa ntia otolu inso ndi omiu, anu umariomo anggaano a oleo Saba i ndi'ai, asalakono dumagaio langkanaedo mokole.

⁶ Asa ntia otolu mbo'u, asalakono mekongko a mpewowa langkai Suri, ka asa ntia otolu mbo'u a mpewowa langkai i bungkudo luwuno puu pompedagai. Asalakono impe'eu-eu medagaio langkanae.

⁷ Orua bawaa inso i olomiu, luwuno anu mpo'angga i ndi'ai a oleo Saba, asalakono dumagaio raha-Do i Ue hangano ondae mokole.

⁸ Asalakono imelibu ira mokole inso a luwuno siuno, singge mia saru parewa mpetea a ngkaeno. Maupo isema anu merumpa a baresi mpodagai asalakono pinepate. Sompo dopeluarako ke mewinso si mpo'inee ira mokole asa-asado.”

⁹ Luwuno petewawa sorodadu asa etu atuu meweweuo mengkena kana anu iparentaako ira sando mpesomba Yoyada. Singge mia umala ira miano anu umari mpo'angga a oleo Saba meronga saru luwuno mia anu mompu'u mo'angga a oleo atuu, ka do'amba me'aiwa ndi sando mpesomba Yoyada.

¹⁰ Sando mpesomba atuu moweeako ira petewawa sorodadu asa etu atuu kansai ka kanta luwuno anudo mokole Daudi anu kongko a raha-Do i Ue.

¹¹ Luwuno puu podagai atuu, singge mia saru sangka petea a ngkaeno, mo'ala po'ianga inso i apano koana hawe i apano manggali raha atuu, lumimbuo meda pontunua pesomba ka raha atuu dumagai ira mokole.

¹² Umarino atuu i Yoyada wawao ana ntamado mokole atuu meluarako ka i'amba mokonaakono songko mokole ka meweeakono songka-Do Ue Ala. Dompotoroo gagi mokole ka me'urapio, kontongaado mpotopa mpebooli ira, ”Tuwu iramo mokole!”

¹³ Mansano rumongeo i Atalia maroano peboolido puu podagai ka palili, onae lumako tepohaweako ira palili a laro raha-Do i Ue.

¹⁴ Ikitao mokole mentade umpeda a ngkaru raha-Do i Ue, menunu saru anu wela wineweu, kontongaado anu langkai potorono saru luwuno puu pompuuri tawuwua kongko umpeda ndi ondae mokole. Luwuno palili mpo'unde ka dompopuuri tawuwua. I Atalia berio sangkano ka ipebooli, ”Domerontuomo pabawaku, domerontuomo pabawaku!”

¹⁵ Sine sando mpesomba Yoyada parenta ira petewawa sorodadu asa etu, onaemo luwuno mia anu gagi petewawado sorodadu, ipotaeako ira, ”Imewawaomo meluarako inso a baresido puu mpodagai! Isema anu me'alaako ndi onae impepateakono ponai!” Hangano sando pesomba atuu motaeomo, ”Simpepateo a raha-Do i Ue!”

¹⁶ Domerakoo tempono ta mewinso a langkanaedo mokole molalo sala pewinsoano ngara, ka i ra'aimo ipinepate.

¹⁷ Ka i'amba i Yoyada moweweu pedandia olo-Do i Ue ka mokole ka palili nine ondae megagi bawaa-Do i Ue; ka i'olodo mbo'u mokole ka palili.

¹⁸ Ka i'amba luwuno palili mpewinso a raha Ba'ala ka mpobangkuo. Domerawo-merawo ira meda pontunua pesomba ka luwuno tinaha pesombaado ka mpepateo i Matani, sando Mpesomba Ba'ala atuu i arono luwuno meda pontunua pesomba atuu. Ka i'amba sando mpesomba Yoyada numaa ira puu mpodagai a raha-Do i Ue.

¹⁹ Ka i'amba umoluako ira petewawa sorodadu asa etu, luwudo to Kari, luwuno puu mpodagai, ka luwuno palili, ka do'amba mewawao mokole inso a raha-Do i Ue. Mpewinso ira a langkanaedo mokole telalo a mpewowa langkai pewinsoado puu mpodagai. Ka do'amba mokole mentoro a ngkadera poparentaa.

²⁰ Luwuno palili mpo'unde ka rodoomo kota atuu umarino mate i Atalia, pinepateako ponai i langkanaedo mokole.

I Yoasi mokole i Yehuda

²¹ Tinuwuno i Yoasi opitu nta'u tempono igagi mokole.