2 KORINTI 9 - Wunta Mempori

Popumpua doi tiano Yerusale 9:1-5

¹ Mongkona pompekakaakoa a mia memempori siimo mbo'u kuburiakomiu.

² Kuto'oriomo po'eheno aroamiu mongkona i sua kupo'undeakomiu a nto Makedonia. Kupotae, ”I kota Akaya mpepatinda iramo mompu'u ta'u anu telalo.” Ka wineweumiu gagiomo pokotesingkano aroado hadio mia.

³ Kutena ira pepaekompo atuudo, ka imentudu koa po'undemami mongkona andio ndi omiu, sine ka impepatinda koa ntu'u kana anu kupauakomiumo,

⁴ Tewala mehawe ira to Makedonia meronga saru ongkue, ka si domehawekomiu napi tetinda, ranta omami – nahi kimempaukomiu – memongkoko'ii a pompe'ala-alamami atuu.

⁵ Onaemo pu'uno ka ku'oluako ira pepaekompo atuudo ka dompelungka mpese'elungi aku, ka dontese'elu mesongkapio pompowee anu imedandiomo se'eluno, ka itepatinda te'ingka gagi tondonino pe'aroamiu ka komba gagi pompowee anu dinadai.

Mompowee a mawongkono aroa mowawa ronso 9:6-15

⁶ Impe'ihilaroomo andio: Mia anu morawo tedei, ta sumowi tedei koa mbo'u, ka mia anu morawo hadio, ta sumowi hadio koa mbo'u.

⁷ Po'ineeomo singge mia mompowee montonda po'eheno aroano, si komba masusa aroa ke hangano dinadai, hangano Ondae Ue Ala mehohawao mia anu mompowee a mawongkono aroa.

⁸ Ka Ondae Ue Ala polio mokohadioo ntu'u luwuno pompehohawa-Do ndi omiu, ka isompo koa mpiha kineremiu a luwuakoano ka tendeano komiu melalua a mperupa-rupa wineweu moiko.

⁹ Kana hinao teburi, ”Dotia-tiao, Dopoweeako ira mia mongkokolaro, mentee-Do kongko mpiha ranta nahina tampulaano.”

¹⁰ Ondae anu mompatindaakono inii anu morawo, ka roti ta kaanga, Ondae koa mbo'u anu Ira mompatindaakomiu inii ka mokomelukao ka motuwuo luwuno wuano menteemiu;

¹¹ komiu mempinokokaea a mperupa-rupa pe'aroa, anu mompokohina pontarimakasi ndi Ondae Ue Ala hangano omami.

¹² Hangano petulungi anu me'ihiako pompowee andio komba butu mokosompoo kineredo mia memempori, sine mokohadioo mbo'u pontarimakasi ndi Ondae Ue Ala.

¹³ Ka hangano peteahakomiu a pompekakaakoa atuu, dome'unde-unde Ira Ue Ala hangano pomperorongeakomiu a Lele Mawongkoa-Do i Kerisituu ka hangano pe'aroamiu mpetia luwuakoano saru ondae ka saru luwuno mia,

¹⁴ sekono a laro mpekakaido, domengkekewoikomiu koa mbo'u hangano pompehohawa-Do Ue Ala anu hadio ntu'u ndi omiu.

¹⁵ Pontarimakasi ndi Ondae Ue Ala hangano pompowee-Do anu nahi pinokopau atuu!