2 KORINTI 8 - Wunta Mempori

Pompowee petulungi 8:1-15

¹ Pepaekompo, kami mempauakomiu mongkona pe'aroa anu domewineeako luwuno bawaa i Makedonia.

² Kontongaado me'inara-arahakoako anu mobea a laro mperupa-rupa marasaia, tedoa ira memawongko ka maupo domemongkokolaro ntu'u, sine mengkaea ira a mpe'aroa.

³ Ongkue mesakosii, nine mpompowee iramo montonda pompolido, tendeano lumaloio pompolido.

⁴ A moleono aroa dome'emao ka mpedada ndi omami, ka dompohawe koa mbo'u pompehohawa ka dompo'ala tia a pompekakaakoa mia memempori.

⁵ Ondae mpompowee hadioopo sekono anu pinerorohimami. Dompeweengakono koroido, amba-ambano ndi Ondae Ue Ala, ka i'amba ndi omami mbo'u hangano po'ehe-Do Ue Ala.

⁶ Onaemo pu'uno ka kimedadaio i Titu, ka i'aiwa tepohaweakomiu ka ipoko'umario petulungi atuu ba kana'umpe umariomo ipu'uo.

⁷ Ka kanandio-andio, mengkena kana mengkaea komiu a luwuakoano, – a pompe'ala-ala, a mpau, a ponto'ori, a pontulungi inso i aroa, ka a pompehohawamiu ndi omami – ka ikanandio koa mbo'u imengkaea a pontulungi andio.

⁸ Kupauo mongkona atuu komba kana parenta, tendeano, mopokitao peteahakodo mia susua mpontulungi, aku kumitao menteeno pompehohawamiu.

⁹ Hangano imento'oriomo pompehohawa-Do Ueto i Yesu Kerisituu, nine Ondae, anu hangano omiu gagi mongkokolaro, maupo kaea Ira, ka igagi mengkaea hangano mongkokolaro-Do.

¹⁰ Onaemo andio pohaweku mongkona anu atuu, anu bara'ura mentudu ndi omiu. Lano asa nta'u anu laloomo impompu'u meweweuo ka mempakosio ka impoko'umario koa.

¹¹ Ka kanandio-andio, impoko'umariomo wineweumiu atuu! Moikoano imeweweuo menunu saru pohaweno aroamiu, ka imeweweuomo atuu saru hapa anu hina ndi omiu.

¹² Hangano tewala inso i aroamiu mompowee, asalakono pompoweemiu ta tinarima, tewala pompoweemiu atuu me'empehiako hapa anu hina ndi omiu, komba me'empehiako hapa anu nahina ndi omiu.

¹³ Hangano mempinopotembi komiu komba ka dompohawe monongkoa mia susua, sine ka ihina koa pengkenaa.

¹⁴ Ka moikoano kanandio-andio anu torea ndi omiu mokosompoo makurado, ka ilembuino anu torea ndi ondae mokosompoo makuramiu, ka ihina koa pengkenaa.

¹⁵ Kana hinao teburi, ”Mia anu mopumpu hadio, nahi ta torea ka mia anu mopumpu tedei, nahi makura.”

I Titu tinena 8:16-24

¹⁶ Pontarimakasi ndi Ondae Ue Ala, anu hangano omiu pinoweeako mbo'u mokua anu kanandio i laro aroano i Titu tumulungi komiu.

¹⁷ Lano itarimao po'emamami, sine a mokuano ntu'u atuu lumakoomo ndi omiu a mpo'eheno aroano onaeno.

¹⁸ Meronga saru onae kimentenao pepaekompoto, anu inunde-unde a luwuno bawaa hangano po'anggano a pompalelea Lele Mawongkoa.

¹⁹ Ka komba butu onae atuu! Onae mbo'u domentisoomo luwuno bawaa ta walimami a pompowee pe'aroa andio, anu kimeweweuo pokomaramba-Do i Ue ka gagi tondonino inso i aroamami.

²⁰ Hangano kimetangkoroo mongkona andio: nine hinao mia anu mokotata kami mongkona pompowee petulungi anu pinelempaakomami ka anu hasilino langkai andio.

²¹ Hangano omami mpompewowolo anu moiko, komba butu i aro-Do i Ue, sine i arodo mbo'u mia.

²² Meronga saru ondae kimentenao mbo'u asa mia susua, onaemo pepaekompoto, anu ba pempiamo kime'arahakono ka mengkaa wela meteahako mompokowali. Ka kanandio-andio tepaheomo meteahako hangano langkaino pompe'ala-alano ndi omiu.

²³ I Titu onaemo waliku pe'asa mpo'anggaku ndi omiu; pepaekompomami anu mehano atuudo onaemo tinenado luwuno bawaa ka aasa maramba-Do i Kerisituu.

²⁴ Onaemo pu'uno impopokitaako iramo i arodo luwuno bawaa pompehohawamiu ka tondonino pompehohawamiu ka tondonino mawongkoku ndi omiu.