2 KORINTI 4 - Wunta Mempori

Arataa rohani a laro bolusa wita 4:1-15

¹ Hangano pe'aroa-Do Ue Ala kimentarimaomo anggaa andio. Onaemo pu'uno nahi motewe aroamami.

² Sine nahi kimentarimao luwuno wineweu tewuni anu mompokoko'ii; nahi kimpompopo'oo ka nahi kimebalio pau-Do Ue Ala. Tendeano kimpokomengkaao menteea ka hangano kanandio kimpeweengakono koroimami ka domentimbangao luwuno mia i aro-Do Ue Ala.

³ Tewala Lele Mawongkoa anu pinalelemami da tetutuwi mbo'u, ka onae tetutuwi ndi ondae, anu ira memate,

⁴ onaemo mia anu nahi dompompe'ala-ala, anu pinewowolodo dompokomorawuomo pinesombai susua tempo andio, onaemo ka nahi domengkitao wantano Lele Mawongkoa mongkona maramba-Do i Kerisituu, anu onaemo gambara-Do Ue Ala.

⁵ Hangano komba koroimami anu pinalelemami, sine Ondae i Yesu Kerisituu anu Ue, ka koroimami gagi atamiu hangano po'ehe-Do i Yesu.

⁶ Hangano Ondae Ue Ala anu mepau Iramo, ”Inso a laro wongi-wongi ta saaba mewine!”, Ondae koa mbo'u anu weweuo mewine-Do ka imewanta i laro aroato, ka tompohawe mewine inso a ponto'ori mongkona maramba-Do Ue Ala anu tengkita a rupa-Do i Kerisituu.

⁷ Sine arataamami andio a laro bolusa wita pulu, ka imengkaa, nine roso anu langkai ntu'u atuu inso ndi Ondae Ue Ala, komba inso ndi omami.

⁸ A luwuakoano pinokonsii kami sine nahi kinte'asi; mentedungku kami, sine mpompe'osai kami mpiha;

⁹ mebinobarasai kami, sine nahi kimebininta, mempinepasiako kami, sine nahi kimemate.

¹⁰ Kimewawao mpiha mate-Do i Yesu a laro ngkoroimami, ka igagi mengkaa mbo'u tuwu-Do i Yesu a ngkoroimami.

¹¹ Hangano omami anu da mentuwu andio, wela kami mempineweengako a matea hangano Ondae i Yesu, ka igagi mbo'u mengkaa tuwu-Do i Yesu a ngkoroimami anu ta mate andio.

¹² Ka kanandiomo matea mo'angga a ngkoroimami ka tuwua mo'angga ndi omiu.

¹³ Sine hangano ndi omami hinao Penaa pompe'ala-ala anu mengkena, kana hinao teburi, ”Kupe'ala-alao, onaemo pu'uno ka kupepau”, ka omami mbo'u mpompe'ala-ala onaemo mbo'u pu'uno ka kimpepau.

¹⁴ Hangano kimento'orio, nine Ondae, anu wangu Iramo Ue Yesu, Ira koa mbo'u wangu kami meronga saru Ondae i Yesu. Ka Ira wawa kami mpe'aro ndi Ondae meronga saru omiu.

¹⁵ Nde ka igagi luwuno atuu hangano omiu, ka ikolangka-langkaino pompehohawa hangano kohadi-hadiono mia anu mpompe'ala-ala, onaemo ka ikohadi-hadiono anu umunde-undeo maramba-Do Ue Ala.

Si motewe aroa, maupo mbo'u tempono mo'aropi matea 4:16–5:10

¹⁶ Onaemo pu'uno ka nahi motewe aroamami, sine maupo koroi ntolinomami komara-marasaino, sine aroamami pinokowo'ohu sompo oleo.

¹⁷ Hangano marasaia anu monongko kanandio-andio, mo'anggaakami marambaa anu nahina tampulaano anu lumaloio luwuakoano, laluaopo langkai sekono marasaimami.

¹⁸ Hangano nahi kimperioo anu tengkita, tendeano anu nahi tengkita, hangano anu tengkita sarai koa, sine anu nahi tengkita nahina tampulaano.