2 KORINTI 3 - Wunta Mempori

Luwuno puu pompekakaako a mpedandia anu wo'ohu 3:1-18

¹ Mpompu'u kamimo mbo'uke me'unde-undeo koroimami? Ke asalakono ka kimengkana mia susua mpopokitaakomiu wunta po'unde-unde ke inso ndi omiu?

² Omiumo wunta po'unde-undemami anu teburi i laro aroamami ka anu tino'ori ka dompokobasao luwuno mia.

³ Hangano mengkaaomo, nine omiu wunta-Do i Kerisituu, anu binuri a pompekakaakomami, komba binuriako tinta, sine saru Penaa inso ndi Ondae Ue Ala anu tuwu, komba a dopi watu, tendeano a dopi i laro aroano mia.

⁴ Kanandiomo langkaino pompe'ala-alamami ndi Ondae Ue Ala hangano Ondae i Kerisituu.

⁵ Tewala butu omami nahi kimempolio mpopau hapa kana inanggamami; naahi, ka kimempolio onaemo po'angga-Do Ue Ala.

⁶ Ondae koa mbo'u weweu kami ka kimempolio megagi puu pompekakaako a aasa pedandia wo'ohu, anu komba inso a songka anu teburi, sine inso a Mpenaa, hangano songka anu teburi mompepate, sine Penaa mompotuwu.

⁷ Pompekakaako anu metewawa a matea teburiako hurupu a dopi watu. Maupo kanandio maramba-Do Ue Ala kumongkomio tempono iwineeako. Hangano maupo nahi mewanta mbo'u, wantano rupano i Musa tesangkilo ntu'u, ranta nahi domempolio to Isaraeli mempaso matao. Tewala puu pompekakaako atuu hawe saru maramba anu kanandio

⁸ tedoaopo lalu langkai mbo'u marambaa anu kumongkomio pompekakaako-Do Penaa!

⁹ Hangano, tewala pompekakaako anu metewawa a mpohukua atuu maramba, tedoa lalu maramba mbo'u pompekakaako anu metewawa a menteea.

¹⁰ Menteeano hapa anu i ndi'upua pinemaramba, tewala pinongkenaako saru marambaa anu mewawoio luwuakoano andio, nahina ntu'u pengkonaano.

¹¹ Hangano, tewala anu nahi mewanta atuu tinondaako marambaa, laluaopo ntu'u mbo'u anu mewanta mpiha atuu tinondaako marambaa.

¹² Hangano mpomperorohi anu kanandio, onaemo ka kimemosia mpepau,

¹³ komba kana i Musa, anu tumutuwio rupano, ka si domengkitao to Isaraeli tetadino wanta anu sarai koa atuu.

¹⁴ Sine tebonsoomo pinewowolodo, hangano hawe a oleo andio pebomboni atuu da kongko bomboni ira, tewala mpobasa ira dandi nse'elu atuu nahi sinungke, hangano butu Ondae i Kerisituu anu mokosungkeo.

¹⁵ Maupo hawe a oleo andio, sompo domebasao wuntano i Musa, hinao pebomboni anu tumutuwio aroado.

¹⁶ Sine tewala aroano asa mia mepokule ndi Ondae i Ue, ka pebomboni atuu inala inso ndi onae.

¹⁷ Hangano Ondae i Ue onaemo Penaa; ka ba isua hinao Penaa-Do Ue Ala, i tu'ai hinao maradekaa.

¹⁸ Ka luwuto mpetamiako maramba-Do i Ue saru rupa anu nahi tetutuwi. Ka hangano maramba atuu inso ndi Ondae i Ue anu onaemo Penaa, onaemo ka tomebinali gagi kana rupa-Do, a laro marambaa anu kolangka-langkaino.