2 KORINTI 2 - Wunta Mempori

¹ Kupakosiomo i laro aroaku, nine nahi aku aiwa mbo'u ndi omiu a laro masusaa.

² Hangano, tewala kupokomasusao aroamiu, isema mbo'u anu mokomawongko aku ba nahi onae anu mompemasusa hangano ongkue.

³ Ka onaemo tinoono wuntaku andio, onaemo tewala hawe aku, ka si kupompemasusa hangano ondae, anu asalakono mpokomawongko aku. Hangano kupe'ala-ala komiu luwu, nine po'undeku onaemo mbo'u po'undemiu.

⁴ Kupoburiakomiu wunta saru aroa anu tedoa salalaro ka mompema'iso saru hadio uwoi mataku nte'i'iti, komba ka imasusa aroamiu, sine ka imento'orio tedoa langkai pompehohawaku ndi omiu luwu.

Asalakono inampuni mia anu sala 2:5-11

⁵ Sine tewala hinao mia anu mompokomasusa, ka komba aroaku anu pinokomasusano, tendeano aroamiu luwu, ke ba naahi – ka si lalo pauku –, aroado ba opia mia i olomiu.

⁶ A mia anu kanandio sompoomo pongkuahako inso a asa ntia langkai ndi omiu,

⁷ onaemo omiu tendeano ka ime'ampunio ka imentareroo, ka si mate hangano tedoa masusa aroano.

⁸ Onaemo pu'uno ka kupauakomiu, ka impehohawao koa ntu'u.

⁹ Hangano onaemo tinoono ka kupoburi wunta ndi omiu, onaemo umarahako komiu, ba mpetenunu komiu koa a luwuakoano.

¹⁰ Hangano ba isema anu inampunimiu salano, ku'ampunio koa mbo'u. Hangano tewala ku'ampunio, – ba hinao anu asalakono ka ku'ampunio –, ka mongkona atuu kuweweuo hangano omiu i aro-Do i Kerisituu,

¹¹ ka si me'ura i Mosa'o ndi ontae, hangano tomento'orio tinoono.

Salalaro ka sanaano i Paulu i kota Toroasi ka i Makedonia 2:12-17

¹² Tempono kuhawe i Toroasi paleleo Lele Mawongkoa-Do i Kerisituu, kuhaweo nine Do'ungkahiomo i Ue sala a mpo'anggaa i ra'ai.

¹³ Sine nahi rodo aroaku, hangano nahi kutepohaweakono pepaekompoku i Titu. Onaemo pu'uno ka kupetompa ka melungka lumako i Makedonia.

¹⁴ Sine tarimakasi ndi Ondae Ue Ala, anu wela wawa kami a nsala poponangia-Do ndi Ondae i Kerisituu. Ka mesala ndi omami Dopaleleo i sua-suamo koa mana mo'ahino tumo'ori Ira.

¹⁵ Hangano ndi Ondae Ue Ala omami onaemo woo anu mana mo'ahi inso ndi Ondae i Kerisituu i tonga-tongado anu mengkinadudui ka i olodo anu memate.

¹⁶ A anu pokotompa omami onaemo woono matea anu mompepate ka a anu amba-ambano woono tuwua anu mompotuwu. Sine isemake anu polio umanggao anggaa anu kanandio?

¹⁷ Hangano nahi kimpengkena saru hadio mia susua anu mpo'ungke urado inso a mpau-Do Ue Ala. Tendeano ndi Ondae i Kerisituu kimempauo a menteeano saru luwuno tinoo anu molino a mpetena-Do Ue Ala ka i aro-Do.