2 KORINTI 13 - Wunta Mempori

Luwuno patudu pokotompa 13:1-10

¹ Ndio anu kopentolunomo kuhawe ndi omiu: Saru pompauno orua ke otolu mia sakosii ka i'amba mentee aasa kara-kara.

² Ndi ondae, anu mpoweweu hala i ndi'upua, ka a luwudo mia mehano, se'eluomo kupauako ira ka aku pauo tepohonapo mbo'u – kanandio-andio tempono ku'olaiakomiu kana ntu'u i tempono haweku kompenduano – nine i tempono kuhawe mbo'u nahi aku mehohawa ira.

³ Hangano inehemiu aasa tondonino, nine mepau Ira i Kerisituu telalo ndi ongkue, ka komba molema Ira ndi omiu, tendeano pabawa i tonga-tongamiu.

⁴ Nde maupo pinaso Iramo a ngkeu pinotamba hangano molemaa, sine tuwu Ira hangano pabawa-Do Ue Ala. Lano memolema kami a ntepo'asaa saru Ondae i Kerisituu, sine kami koa mentuwu meronga saru Ondae tiamiu hangano pabawa-Do Ue Ala.

⁵ Impepenteeo koroimiu, ba memoroso komiu koa mpiha a laro pompe'ala-ala. Imemparesaomo koroimiu! Nahi impe'ala-alaoke koroimiu, nine Ondae i Kerisituu Yesu kongko i laromiu? Hangano tewala komba kanandio, nahi komiu mponangi.

⁶ Sine kuperorohio, nine imento'orio, nine komba omami anu mponangi.

⁷ Mekakai kami ndi Ondae Ue Ala, ka si mpoweweu anu mosa'o komba ka imengkaa monangi kami, tendeano omiu andio ka impoweweu hapa anu moiko, maupo omami isa'a tengkita nahi kiponangi.

⁸ Hangano nahi kipokompoweweu hapa-hapa umewaio menteea; anu pinokoweweumami onaemo tiano menteea.

⁹ Hangano mo'unde kami, tewala molema kami ka omiu memoroso. Ka onaemo andio anu pinekakaiakomami, onaemo ka ibobotoli pompe'ala-alamiu.

¹⁰ Onaemo pu'uno pohona andio ka kupoburi wunta ndi omiu tempono ku'olaiakomiu, ka si kumansa tekuda montonda pabawa anu Doweeakune i Ue ba kukongko i tonga-tongamiu mowangu pompe'ala-ala ka komba mongkale-kale.

Tabea 13:11-13

¹¹ Pokotompaano, pepaekompoku, impo'undemo, impeteahakomo ka ibobotoli pompe'ala-alamiu. Imentarimaomo luwuno patuduku! Impe'asa aroamo ka mpe'asa pompewowolo, ka imentuwumo a laro rodoa! ka Ondae Ue Ala, pu'uno pompehohawa ka rodoa Ira kumongkomi komiu!

¹² Imemabe petabeiako pewoo-woo anu mempori. Tabea ndi omiu inso a luwuno mia mempori.

¹³ Pompehohawa-Do Ue Yesu Kerisituu, ka pompehohawa-Do Ue Ala, ka tepo'asaa-Do Penaa Mempori kumongkomi komiu luwu.