2 KORINTI 12 - Wunta Mempori

I Paulu montarima pongkita ka pepokomengkaa 12:1-10

¹ Asalakono aku mawongko, maupo lano mongkona atuu nahina tuduno, maupo kanandio aku paleleo luwuno pongkita ka luwuno pepokomengkaa anu tinarimaku inso ndi Ondae i Ue.

² Kuto'orio mongkona aasa to Kerisituu; hopulu ka opaa nta'u anu laloomo – ke a laro ngkoroi, nahi kuto'orio, ke komba a ngkoroi, nahi kuto'orio, Ondae Ue Ala tumo'orio – mia atuu mansa tinande hawe a ntudano anu ko'otolu inso i suruga.

³ Kuto'orio koa mbo'u mongkona mia atuu, – ke koroi ke komba koroi, nahi kuto'orio, Ondae Ue Ala tumo'orio –

⁴ onae mansa tinande lumako i Paradesi ka irongeo luwuno pau anu nahi pinokopau, anu nahi moiko ipauo mia.

⁵ Hangano mia atuu aku mawongko, sine a ngkoroiku ongkueku nahi aku mawongko, sangkadio hangano luwuno molemaku.

⁶ Hangano bakanaano kumingki mbo'u mawongko, ongkue komba mia benge-benge mbo'u, hangano mompau aku menteea. Sine kupeteao, ka si hina mia anu dumoao ndi ongkue torea sekonopo anu kinitado ndi ongkue ke anu rinongedo inso ndi ongkue.

⁷ Ka si kupompelangka-langkai hangano luwuno pepokomengkaa anu tedoa kinohali-haliako atuu, ka ongkue pinoweeako aasa rui a laro ihiku, onaemo asa mia tinenano i Mosa'o ka itidu aku meroku, ka si kupompelangka-langkai.

⁸ Mongkona atuu pentolumo kupebooli ndi Ondae i Ue, ka iponsuka tinenano i Mosa'o atuu inso ndi ongkue.

⁹ Sine sangki-Do i Ue ndi ongkue, ”Sompoomo pe'aroa-Ku ndi omue, hangano a laro molemamu ka igagi bobotoli pabawa-Ku.” Onaemo pu'uno inehekupo mawongko, ka ipetii pabawa-Do i Kerisituu kumongkomi aku.

¹⁰ Onaemo pu'uno sanaa aku ka memoikoo a laro molemaa, a laro pobobarasaia, a laro masukaraa, a laro poweweu nsa'o ka ma'isoa hangano Ondae i Kerisituu. Hangano tewala molema aku, onaemo ka kumoroso.

Sala-larono i Paulu 12:11-21

¹¹ Mentee ntu'u gagi akumo benge-benge; sine omiu anu medadai aku. Bakanaano omiu asalakono me'unde-unde aku. Hangano maupo tedei nahina pengkonaaku, sine a luwuakoano nahi kutenangi a luwuno tinena anu lalua ponto'orido atuu.

¹² Luwuakoano anu gagi tondonino, nine ongkue asa mia tinena, wineweuomo luwuno petondoni, anu mengkinohali-haliako ka pabawa i tonga-tongamiu a luwuno sabaraa.

¹³ Hangano mongkona anu isuake imempinokotelembui pinongkenaako saru luwuno bawaa susua, sangkadio mongkona andio, onaemo nine ongkue isa'a komba gagi aasa pokonsusamiu? Siimo impe'ihilaroo nahi moleoku andio!

¹⁴ Menteeano kanandio-andio kopentolunomo kupepatinda aku aiwa tepohaweakomiu, ka nahi aku gagi aasa pokomasusamiu. Hangano komba arataamiu anu inungkeku, tendeano omiu isa'a. Hangano komba nana'ote anu asalakono mopumpu arataa tiano mia mota'uno, tendeano mia mota'u tiado anano.

¹⁵ Onaemo pu'uno ineheku meweengakono arataaku, sekonopo koroiku kupeweengakono hangano omiu. Gaagi tewala tedoa kupehohawa komiu, tekona koake ka ikomaku-makurano kupinehohawa?

¹⁶ Moikoomo, ongkue isa'a komba gagi aasa pokomasusamiu, sine – impotae – a mpandeku me'akala ku'ohoakomiumo pompopo'oo.

¹⁷ Gaagi horike montena ndi omiu te'asa mia inso i olodo mo'ala untu inso ndi omiu?

¹⁸ Lano ku'emaomo i Titu ka ilako ka meronga saru onae kutenao pepaekompo anu susua atuu. Nde mo'ala untuke i Titu inso ndi omiu? Kombake orua kami tuwu montonda Penaa anu mengkena ka nahi pengkenake pelelumami?

¹⁹ Moro tehineomo imengkolaro-laro, nine kami mepokomentee i aromiu. I aro-Do Ue Ala ka a nee-Do i Kerisituu kipepau: luwuno andio, pepaekompo anu mempinehohawaku, ka igagi wanguno pompe'ala-alamiu.

²⁰ Hangano kuporerengkoo, nine tewala aiwa aku ka kuhawe komiu nahi kana anu ino'aroaku ka intepohaweakune nahi kana anu ino'aroamiu. Kuporerengkoo ta mansa hina teposisalaa, kohili, tekuda, mompokotekona koroino onaeno, momposebe, petanga-tanga, pompelangka-langkai, ka marisua.

²¹ Salalaro aku, nine tewala hawe aku mbo'u, Ira mokongkodei aku Ue Alaku i aromiu, ka nine aku masusaako ira hadio mia anu mpoweweu hala i ndi'upua ka naapo koa mbo'u dontepidi inso a mokoburua, pebelesua ka nahi dompoto'ori gau anu wineweudo.