2 KORINTI 1 - Wunta Mempori

Tabea 1:1-2

¹ Inso ndi Paulu, anu hangano po'ehe-Do Ue Ala gagi tinena-Do i Kerisituu Yesu, ka inso ndi Timotiu pepaekompoto, hawe a bawaa-Do Ue Ala i Korinti saru luwuno mia mempori i asa wawo wita Akaya.

² Pompehohawa ka rodoa inso ndi Ondae Ue Ala, Amato, ka inso ndi Ondae Ue Yesu Kerisituu kumongkomi komiu.

Pontarimakasi 1:3-11

³ Inunde-unde Iramo Ue Ala, Ama-Do Ueto i Yesu Kerisituu, Ama anu buke pompehohawa ka Ondae Ue Ala pu'uno luwuno pontarero,

⁴ anu tumarero kami a luwuno marasaiamami, onaemo ka kipolio tumareroako ira pontarero anu tinarimamami inso ndi Ondae Ue Ala, anu mekongko a laro mperupa-rupa marasaia.

⁵ Hangano mengkena kana omami mohawe tia hadio ntu'u a ntebobarasai-Do i Kerisituu, kanandio koa mbo'u hangano Ondae i Kerisituu montarima kami pontarero hadio ntu'u.

⁶ Tewala marasai kami, onaemo gagi pontarero ka tekaduduimiu; tewala tinarero kami, onaemo atuu pontareromiu, ranta ka impohawe roso ka imensabara marasaiako tebobarasaia anu mengkena kana anu pinembasaimami koa mbo'u.

⁷ Ka pomperorohimami mongkona omiu moroso, hangano kito'orio, nine mengkena kana omiu mpo'ala komiu tia a ntebobarasaimami, mpo'ala komiu koa mbo'u tia a pontareromami.

⁸ Hangano inehemami, luwumiu pepaekompo, ka imento'orio marasaia anu pinembasaimami i wita Asia Kodei. Tembia anu kipinopotembiako tedoa langkai ka tedoa mobea, ranta nami hina pompe'osaia da kami tuwu.

⁹ Tendeano kana hinuku mate kamimo. Sine ka igagi kanatuu, ka si kipe'ala-alao koroimami, sine butu ndi Ondae Ue Ala anu wangu ira mia memate.

¹⁰ Inso a matea anu tedoa mongkokongiri Dokadudui kamimo ka Ira kumadudui kami: ndi Ondae kipomperorohi, nine Ira kumadudui kami mbo'u,

¹¹ hangano imentulungi kami koa mbo'u mpekakaiakami, ka ihadio mia montarimakasi a pompowee anu hinawemami nde mararu dompekakaiakami.

Tebalino sinongkano i Paulu 1:12–2:4

¹² Ndiomo anu kipo'undeako, onaemo nine i laro aroamami mesakosii ndi omami, nine tuwumami i wawontolino andio, tamoako a mpenggoeamami saru omiu, ipabawaio moleoa ka memporia inso ndi Ondae Ue Ala komba hangano ponto'ori ntolino, sine hangano rosono pompehohawa-Do Ue Ala.

¹³ Hangano omami butu buriakomiu hapa anu pinokobasa ka pinokonto'orimiu. Ka kuperorohio, ka impokonto'oriomo luwu,

¹⁴ kana anu impokonto'oriomo asa ntiano inso ndi omami, onaemo nine a oleo-Do Ue Yesu komiu mpo'undeakami kana koa mbo'u omami kami mo'undeakomiu.

¹⁵ Me'empehiako pompe'ala-ala andio hori aku mosongka aku tepohaweakomiu se'elu, ka impontarima pe'aroa anu kompenduano.

¹⁶ Ka ku'amba motilaloakono pelempaaku lumako i Makedonia, ka i'amba inso i Makedonia mekule mbo'u ndi omiu, ka imentulungi aku a laro pelempaaku lumako i Yudea.

¹⁷ Gaagi, momperuanahike i larono kusongka kanandio? Ke sinongkaku atuu montonda po'eheku ongkueku, ranta ndi ongkue meronga hinawe ”humbee” ka ”naahi”?

¹⁸ A nee-Do Ue Ala anu nahi bali pe'aroa-Do, dandimami ndi omiu komba meronga ”humbee” ka ”naahi”.

¹⁹ Hangano Ondae i Yesu Kerisituu, Ana-Do Ue Ala, anu kimempaleleomo i tonga-tongamiu, onaemo ongkue ka i Siliwanu ka i Timotiu, komba ”humbee” ka ”naahi”, sine tendeano ndi Ondae butu hinao ”humbee.”

²⁰ Hangano Ondae i Kerisituu onaemo ”humbee” a luwuno dandi-Do Ue Ala. Onaemo pu'uno hangano Ondae ka tompotae ”Ami” melangkai Ira Ue Ala.

²¹ Hangano Ondaemo anu mokoroso kami saru omiu ndi Ondae i Kerisituu, onaemo Ondae Ue Ala anu mo'urapi Iramo,

²² tumondoniakono pontondoni-Do ndi ontae ka anu moweeakita Penaa Mempori i laro aroato gagi pe'inia inso a luwuno anu pinatindaomo tiato.

²³ Sine mebooli aku ndi Ondae Ue Ala gagi sakosiiku – Doto'ori aku –, nine pu'uno ka nahi ku'aiwa i Korinti onaemo ka kupehohawa komiu.

²⁴ Komba hangano kami mpetena hapa anu asalakono impe'ala-alao, nde mpentade komiu moroso a pompe'ala-alamiu. Tendeano, kami mpopokowali mpo'angga tiano mawongkoamiu.