1 YOHANE 5 - Wunta Mempori

Pompe'ala-ala numangio wawontolino 5:1-5

¹ Sompo mia anu mompe'ala-ala, nine Ondae i Yesu Ondaemo i Kerisituu, pine'anaako inso ndi Ondae Ue Ala; ka sompo mia anu kumekewoi Ira anu me'anaakono, ipehohawao koa mbo'u anu pine'anaako inso ndi Ondae.

² Ndiomo tondonino, nine tompehohawa ira ana-Do Ue Ala, onaemo tewala tomengkekewoi Ira Ue Ala saru weweuo luwuno petena-Do.

³ Hangano ndiomo pongkekewoi ndi Ondae Ue Ala, onaemo, nine tomentondao luwuno petena-Do. Luwuno petena-Do atuu komba mobea,

⁴ hangano luwuno anu pine'anaako inso ndi Ondae Ue Ala, numangio wawontolino. Ka ndiomo ponangia anu numangio wawontolino: pompe'ala-alato.

⁵ Isemake anu numangio wawontolino, ba nahi onae anu me'ala-alao, nine Ondaemo i Yesu Ana-Do Ue Ala?

Ponsakosii mongkona Ana-Do Ue Ala 5:6-12

⁶ Ondaemo andio anu haweako uwoi ka rea, onaemo Ondae i Yesu Kerisituu, komba butu saru uwoi, sine saru uwoi ka saru rea. Ka Penaa anu mompowee ponsakosii, hangano Penaa Ondaemo menteea.

⁷ Hangano otolu anu mompowee ponsakosii [i laro nsuruga: Ondae i Ama, Pau ka Penaa Mempori; ka otolu Ira aasa koa.

⁸ Ka hinao otolu anu mompowee ponsakosii i tolino]: Penaa ka uwoi ka rea ka anu otolu andio aasa koa.

⁹ Ontae mpontarima ponsakosiido mia, sine ponsakosii-Do Ue Ala laluaopo moroso. Hangano kanandiomo ponsakosii-Do Ue Ala mongkona Ana-Do.

¹⁰ Ba isema me'ala-ala Ira Ana-Do Ue Ala, hinao ponsakosii atuu a ngkoroino; ba isema nahi pe'ala-ala Ira Ue Ala, iweweu Ira gagi megaupi, hangano nahi pe'ala-alao ponsakosii-Do Ue Ala mongkona Ana-Do.

¹¹ Ka ndiomo ponsakosii atuu: Ondae Ue Ala moweeakitamo tuwua anu nahina tampulaano ka tuwua atuu kongko ndi Ondae Ana-Do.

¹² Ba isema me'umbu Ira Ana, ipe'umbuo tuwua; ba isema nahi pe'umbu Ira Ana, nahi pe'umbuo tuwua.

Ponto'ori mongkona tuwua anu nahina tampulaano 5:13-21

¹³ Luwuno atuu kuburiakomiu, ka imento'orio, nine omiu anu mpe'ala-alao nee-Do Ana-Do Ue Ala, impe'umbuo tuwua anu nahina tampulaano.

¹⁴ Ka ndiomo mosiano pompe'ala-alato ndi Ondae, onaemo nine Do'induo pekakaito, tewala hinao inemato ndi Ondae montonda po'ehe-Do.

¹⁵ Ka tewala tomento'orio, nine Do'induo hapamo koa anu inemato, ka tomento'orio koa mbo'u, nine tomehaweomo luwuakoano anu tome'emaomo ndi Ondae.

¹⁶ Tewala hinao asa mia kumitao pepaekompono moweweu hala, onaemo hala anu komba mowawa matea, po'ineeomo ka ipekakai ndi Ondae Ue Ala ka Ira moweeakono tuwua, onaemo ondae, anu mpoweweu hala anu komba mowawa matea. Hinao hala anu mowawa matea; mongkona atuu komba kupauo, nine asalakono ka ipekakai.

¹⁷ Luwuno mosa'oa onaemo hala, sine hinao hala anu komba mowawa matea.

¹⁸ Tomento'orio, nine sompo mia anu pine'anaako inso ndi Ondae Ue Ala, nahi poweweu hala; sine Ondae anu pine'anaako inso ndi Ondae Ue Ala dumagaio, ka i Mosa'o nahi poko'anggao.

¹⁹ Tomento'orio, nine mente'inso kita ndi Ondae Ue Ala ka asa wawontolino kongko i totono pabawano i Mosa'o.

²⁰ Sine tomento'orio, nine Ana-Do Ue Ala hawe Iramo ka Dopoweeakitamo ponto'ori, ka tomento'ori Ira Anu Mentee; ka mekongko kita i laro-Do Anu Mentee, ndi Ondae i Yesu Kerisituu. Ondaemo Ue Ala anu mentee ka tuwua anu nahina tampulaano.

²¹ Anaku luwu-luwu, impetangkoromo a luwuno lahumoa.