1 YOHANE 4 - Wunta Mempori

Penaa-Do Ue Ala ka penaa anu umewai Ira i Kerisituu 4:1-6

¹ Pepaekompo luwu-luwu anu kinekewoiku, si mpe'ala-alao sompo penaa, sine ime'arahako ira penaa atuudo, ke nte'inso koa ndi Ondae Ue Ala; hangano hadio ira nabi mpegaupi anu mpesabaako iramo ka domelako i asa wawontolino.

² Kanandiomo ka tomento'orio Penaa-Do Ue Ala; sompo penaa anu mangaku, nine hawe Iramo i Yesu Kerisituu kana mia, inso ndi Ondae Ue Ala,

³ ka sompo penaa, anu nahi pe'ala-ala Ira i Yesu, komba te'inso ndi Ondae Ue Ala. Penaa atuu onaemo penaa anu umewai Ira i Kerisituu ka mongkona onae imerongeomo, nine ta hawe ka kanandio-andio kongkoomo i wawontolino.

⁴ Luwumiu anaku nte'inso ndi Ondae Ue Ala, ka imenangi iramo nabi mpegaupi atuudo; hangano Penaa anu kongko i laromiu, langkai Irapo sekono penaa anu kongko i wawontolino.

⁵ Ondae nte'inso i wawontolino; onaemo pu'uno ka domempau ira mongkona anu i wawontolino ka wawontolino merorongeako ira.

⁶ Omami nte'inso ndi Ondae Ue Ala: ba isema tumo'ori Ira Ue Ala, iperorongeakami; ba isema komba te'inso ndi Ondae Ue Ala, onae nahi perorongeakami. Onaemo tondonino Penaa menteea ka penaa anu mompopo'oo.

Ondae Ue Ala Ondaemo pompehohawa 4:7-21

⁷ Pepaekompo luwu-luwu anu kinekewoiku, aiwamo tomemambe pehohawa, hangano pompehohawa atuu te'inso ndi Ondae Ue Ala; ka sompo mia anu mompehohawa, pine'anaako inso ndi Ondae Ue Ala ka tumo'ori Ira Ue Ala.

⁸ Ba isema nahi pompehohawa, onae nahi to'ori Ira Ue Ala, hangano Ondae Ue Ala Ondaemo pompehohawa.

⁹ I ndi'aimo pompehohawa-Do Ue Ala ipinokomengkaa i tonga-tongato, onaemo nine Dotena Iramo Ue Ala Ana-Do anu asa-asa aiwa i wawontolino, ka tomentuwu hangano Ondae.

¹⁰ Ndiomo pompehohawa atuu: Komba ontae anu mehohawa Iramo Ue Ala, sine Ondae Ue Ala anu mehohawa kitamo ka anu tumena Iramo Ana-Do gagi po'ampuni luwuno halato.

¹¹ Pepaekompo anu kinekewoiku, tewala kanandiomo Dopehohawa kita Ue Ala, ka asalakono ontae mbo'u memambe pehohawa.

¹² Nahina maupo te'asa mia anu hori kumita Ira Ue Ala. Tewala memambe pehohawa kita, Ondae Ue Ala kongko Ira mpiha i laroto, ka pompehohawa-Do soompo i laroto.

¹³ Kanandiomo ka tomento'orio, nine mekongko kita mpiha i laro-Do Ue Ala ka Ondae i laroto; Doweeakitamo ka tompohawe tia a Mpenaa-Do.

¹⁴ Ka kimengkitaomo ka mpesakosii, nine Dotena Iramo i Ama Ana-Do gagi Puu Pongkaduduino wawontolino.

¹⁵ Ba isema mangaku, nine Ondae i Yesu onaemo Ana-Do Ue Ala, Ondae Ue Ala kongko mpiha i larono ka onae i laro-Do Ue Ala.

¹⁶ Tomento'oriomo ka tompe'ala-alaomo pompehohawa-Do Ue Ala ndi ontae. Ondae Ue Ala Ondaemo pompehohawa, ka ba isema kongko mpiha a laro pompehohawa, onae kongko mpiha i laro-Do Ue Ala ka Ondae Ue Ala i larono.

¹⁷ I ndi'aimo pompehohawa-Do Ue Ala soompo i laroto, onaemo tewala memosia kita mpompe'alal-ala a oleo pobitaraa, hangano mengkena kana Ondae, ontae mbo'u mekongko i wawontolino andio.

¹⁸ A pompehohawa nahina doitoa; pompehohawa anu soompo mokotampulao doitoa; hangano doitoa mowawa pohuku ka ba isema doito, onae nahi soompo a pompehohawa.

¹⁹ Mpompehohawa kita, hangano Ondae Ue Ala tese'elu mehohawa kita.

²⁰ Tewala asa mia motae, ”Kukekewoi Ira Ue Ala,” ka i'o'aliaakono pepaekompono, onaemo mia megaupi, hangano ba isema nahi pehohawao pepaekompono anu kinitano, nahi ta kumekewoi Ira Ue Ala, anu nahi kita Ira.

²¹ Ka parenta andio tomentarimao inso ndi Ondae: Ba isema kumekewoi Ira Ue Ala, asalakono ka ipehohawao koa mbo'u pepaekompono.