1 YOHANE 3 - Wunta Mempori

¹ Kitaomo, tedoa langkai pompehohawa anu Doweeakita i Ama, onaemo ka tomenineeako ana-Do Ue Ala, ka lano ontae ana-Domo Ue Ala. Onaemo pu'uno wawontolino nahi to'ori kita, hangano wawontolino nahi to'ori Ira.

² Pepaekompo anu kinekewoiku, kanandio-andio ontae ana-Domo Ue Ala, sine napi mengkaa kana'umpe teweweuto te'upua; sine tomento'orio, nine tewala Ondae i Kerisituu mepokomengkaa, kita gagi mpengkena kana Ondae, hangano kita kumita Ira a nteweweu-Do anu menteeano.

³ Sompo mia anu momperorohi atuu ndi Ondae, mepokomempori mengkena kana Ondae anu mempori Ira.

⁴ Sompo mia anu woweweu hala, molimpai mbo'u songka-Do Ue Ala, hangano hala onaemo polimpaia songka-Do Ue Ala.

⁵ Ka imento'orio, nine mepokomengkaa Iramo, ka Dopahihio luwuno hala, ka ndi Ondae nahina hala.

⁶ Onaemo pu'uno sompo mia anu kongko mpiha ndi Ondae, nahi poweweu mbo'u hala; sompo mia anu kongko moweweu hala, nahi kita Ira ka nahi to'ori Ira.

⁷ Anaku luwu-luwu, si mpo'ineeo maupo te'asa mia mopo'oo komiu. Ba isema anu moweweu mentee onae mentee, mengkena kana Ondae i Kerisituu mentee Ira;

⁸ ba isema anu kongko moweweu hala, tepu'u inso ndi Mosa'o, hangano i Mosa'o moweweu hala inso a pompu'uano. Onaemo andio pu'uno ka Dopepokomengkaa Ana-Do Ue Ala, onaemo ka Dopokoropuo luwuno wineweuno i Mosa'o atuu.

⁹ Sompo mia anu pine'anaako inso ndi Ondae Ue Ala, nahi poweweu mbo'u hala; hangano penaa mempori kongko mpiha i larono ka onae nahi pokompoweweu hala, hangano onae pine'anaako inso ndi Ondae Ue Ala.

¹⁰ Ndio tondonino luwuno ana-Do Ue Ala ka luwuno anano i Mosa'o: sompo mia anu nahi poweweu menteea, komba tepu'u inso ndi Ondae Ue Ala, kanandio koa mbo'u ba isema anu nahi pompehohawa pepaekompono.

Mompehohawa pepaekompo gagi tondonino tuwu wo'ohu 3:11-18

¹¹ Hangano ndio lele anu imerongeomo inso a pompu'uano, onaemo nine asalakono ka tomemambe pehohawa;

¹² komba kana i Kai, anu tepu'u inso ndi Mosa'o ka anu mepateo uaino. Ka hapake pu'uno ka ipepateo? Hangano luwuno wineweuno mosa'o ka wineweuno uaino mentee.

¹³ Si mengkohali-hali, pepaekompo luwu-luwu, tewala i'o'aliaakomiu wawontolino.

¹⁴ Tomento'orio, nine mpelimba kitamo inso a matea melako a ntuwua, onaemo hangano mpompehohawa kita pepaekompoto. Ba isema nahi pompehohawa, onae kongko mpiha a matea.

¹⁵ Sompo mia anu mo'o'aliako pepaekompono, onaemo asa mia puu pompepate mia. Ka imento'orio, nine nahina te'asa mia puu pompepate anu kongko me'umbuo tuwua anu nahina tampulaano a ngkoroino.

¹⁶ Kanandiomo tomento'orio pompehohawa-Do i Kerisituu, onaemo nine Dopeweengakonomo penaa-Do tiato; gaagi ontae mbo'u asalakono tompeweengakono penaato tiado pepaekompoto.

¹⁷ Ba isema hinao arataa ntolinono ka ikitao pepaekompono marasaiako makuraa sine nahi perioo pepaekompono atuu, kana'umpeke pompehohawa-Do Ue Ala ka ipokompo'ia mpiha a ngkoroino?

¹⁸ Anaku luwu-luwu, ime'aiwamo tompompehohawa komba saru pau ke elo, sine saru wineweu ka a menteea.

Pompe'ala-ala i aro-Do Ue Ala 3:19-24

¹⁹ Kanandiomo ka tomento'orio, nine ntepu'u kita inso a menteea. Kanandio koa mbo'u ka tompokorodoo aroato i aro-Do Ue Ala,

²⁰ hangano tewala ituluri kita, Ondae Ue Ala langkai Irapo sekono aroato saru tumo'orio luwuakoano.

²¹ Pepaekompo luwu-luwu anu kinekewoiku, tewala aroato nahi tuluri kita, ka memosia kita umpedaako Ira Ue Ala a pompe'ala-ala,

²² ka hapamo koa anu inemato, tomehaweo inso ndi Ondae, hangano tomentondao luwuno parenta-Do ka mpoweweu hapa anu Dopemoikoo.

²³ Ka ndiomo parenta-Do atuu: ka tompe'ala-alao nee-Do i Yesu Kerisituu, Ana-Do, ka tomemambe pehohawa menunu saru parenta anu Doweeakita i Kerisituu.

²⁴ Ba isema tumondao luwuno parenta-Do, onae mo'ia i laro-Do Ue Ala ka Ondae Ue Ala i larono. Ka kanandiomo ka tomento'orio, nine Ondae Ue Ala kongko Ira i laroto, onaemo Penaa anu Doweeakitamo.