1 YOHANE 2 - Wunta Mempori

Ondae i Kerisituu puu mpo'alaakoto 2:1-6

¹ Omiu anaku, luwuno andio kuburiakomiu, ka si mpoweweu hala, sine tewala asa mia moweweu hala, hinao asa mia puu mpo'ala-alaakoto ndi Ondae i Ama, onaemo Ondae i Yesu Kerisituu, anu moleo.

² Ka Ondaemo mompokosintuwu a luwuno halato, ka komba butu halato, sine halado mbo'u asa wawontolino.

³ Ka ndiomo tondonino, nine tomento'ori Ira Ue Ala, onaemo tewala tomentondao luwuno parenta-Do.

⁴ Ba isema motae: Kuto'ori Ira, sine nahi tondao parenta-Do, onemo asa mia puu mpegaupi ka i larono nahina menteea.

⁵ Sine ba isema tumondao pau-Do, i larono mia atuu mentee ntu'u sompoomo pompehohawa-Do Ue Ala; onaemo atuu ka tomento'orio, nine mekongko kita i laro-Do.

⁶ Ba isema motae, nine onae kongko i laro-Do, onae asalakono tuwu mengkena kana Ondae i Kerisituu tuwu Iramo.

Parenta anu wo'ohu 2:7-17

⁷ Pepaekompo luwu-luwu anu kinekewoi, komba parenta wo'ohu anu kuburiakomiu, tendeano parenta tehineomo anu hinaomo ndi omiu inso a pompu'ano. Parenta tehineomo atuu onaemo pau anu imerongeomo.

⁸ Sine parenta wo'ohu mbo'u anu kuburiakomiu, mengkaomo mentee i laro-Do ka i laromiu; hangano wongi-wongia kontongaano moliu ka mewine anu mentee mewantaomo.

⁹ Ba isema motae, nine onae kongko a laro mewine, sine i'o'aliaakono pepaekompono, onae kongko a laro wongi-wongia hawe kanandio-andio.

¹⁰ Ba isema mehohawao pepaekompono, onae kongko mpiha a laro mewine, ka i larono nahina pompopo'ooa.

¹¹ Sine ba isema umo'aliaakono pepaekompono, onae kongko a laro wongi-wongia ka tuwu a laro wongi-wongia. Nahi to'orio ba isua ilako, hangano wongi-wongia atuu mokomorawuakono matano.

¹² Kupoburiakomiu, hei nana'ote, nde halamiu inampuniomo hangano nee-Do.

¹³ Kupoburiakomiu, hei luwuno ama, hangano imento'ori Iramo, anu kongko Ira inso a pompu'uano. Kupoburiakomiu, hei luwuno mia mongura, hangano imenangiomo anu mosa'o.

¹⁴ Kupoburiakomiu, hei luwuno nana'ote, hangano imento'ori Ira i Ama. Kupoburiakomiu, hei luwuno ama, hangano imento'ori Ira, anu kongko Ira inso a pompu'uano. Kupoburiakomiu, hei luwuno mia mongura, hangano memoroso komiu ka pau-Do Ue Ala mo'ia i laromiu ka imenangiomo anu mosa'o.

¹⁵ Si mengkekewoio wawontolino ka hapa anu hina i larono. Tewala mia mongkekewoi wawontolino, asalakono kumekewoi Ira i Ama nahina i larono mia atuu.

¹⁶ Hangano luwuno anu kongko i wawontolino, onaemo minosisiriakono koroi ka minosisiriakono mata saru tuwu mompelangka-langkai, komba mepu'u inso ndi Ondae i Ama, tendeano inso i wawontolino.

¹⁷ Ka wawontolino andio tekonai moliu saru minosisiriakono, sine mia anu weweuo po'ehe-Do Ue Ala tuwu mpiha nahina tampulaano.

Anu umewai Ira i Kerisituu 2:18-27

¹⁸ Anaku luwu-luwu, tempo andio onaemo tempo anu pokotompa, ka kana anu imerongeomo, asa mia anu umewai Ira i Kerisituu ta hawe, kanandio-andio hadio iramo mpentade umewai Ira i Kerisituu. Onaemo tondonino, nine tempo andio mentee ntu'u onaemo tempo anu pokotompa.

¹⁹ Lano ondae mente'inso i oloto, sine komba inso ntu'u i aroado ntewinso ndi ontae; hangano tewala inso ntu'u i aroado ntewinso ndi ontae, asalakono ira koa mperonga-ronga mpiha saru ontae. Sine ka igagi mongkona atuu, ka igagi mengkaa, nine komba luwudo inso ntu'u i aroado ntewinso ndi ontae.

²⁰ Sine mpohawe komiumo po'urapia inso ndi Ondae Anu Mempori, ka hangano kanandio luwumiu mento'orio.

²¹ Kupoburiakomiu, komba hangano nahi imento'orio menteea, sine tendeano hangano imento'orio ka hangano imento'orio koa mbo'u, nine nahi pegaupi anu tepu'u inso a menteea.

²² Isema marampegaupi atuu? Onaemo atuu anu umewai Ira i Kerisituu, onaemo onae anu humapu Ira i Ama maupo Ondae i Ana.

²³ Hangano ba isema humapu Ira i Ana, onae mbo'u nahi pe'umbu Ira i Ama. Ba isema umakui Ira Ana, ipe'umbu Ira mbo'u i Ama.

²⁴ Ka omiu, hapa anu imerongeomo inso a pompu'uano, asalakono ka ipo'ia mpiha atuu i laromiu. Tewala hapa anu imerongeomo inso a pompu'uano atuu kongko mpiha i laromiu, asalakono komiu koa mpo'ia mpiha i laro-Do i Ana ka i laro-Do i Ama.

²⁵ Ka ndiomo dandi anu Dodandiomo Ondae-Do ndi ontae, onaemo tuwua anu nahina tampulaano.

²⁶ Luwuno atuu kuburiakomiu, onaemo mongkona luwuno mia anu mpe'usaha mokontesaa komiu.

²⁷ Hangano a ngkoroimiu kongko mpiha po'urapi anu imentarimaomo inso ndi Ondae. Onaemo pu'uno nahi ira mempaguru komiu mia susua. Sine ba kana'umpe po'urapi-Do paguru komiu mongkona luwuakoano – ka pompaguru-Do atuu mentee, komba pegaupi – ka ba kana'umpe i ndi'upua Dopaguru komiumo, ka ikanandiomo impo'ia mpiha i laro-Do.

Luwuno ana-Do Ue Ala 2:28–3:10

²⁸ Ka kanandio-andio, oo luwuno anaku impo'iamo tepo'asaako Ira i Kerisituu, ka tomemosia mpompe'ala-ala ba Dopepokomengkaa, ka siimo tontekoko'ii ndi Ondae a oleo hawea-Do.

²⁹ Tewala imento'orio, nine mentee Ira, asalakono ka imento'orio koa mbo'u, nine sompo mia, anu moweweu menteea, inso ndi Ondae ipine'anaako.