1 YOHANE 1 - Wunta Mempori

Ponsakosiido tinena mongkona Pau tuwua 1:1-4

¹ Hapa anu hinaomo inso a pompu'uano, anu kimerongeomo, anu kimengkitaakonomo matamami, anu kimensakosiio ka anu kimperareakonomo kaemami mongkona Pau tuwua – onaemo anu binurimami ndi omiu.

² Tuwua atuu pinokomengkaaomo, ka kimengkitaomo ka kanandio-andio mpesakosii kami ka mempaleleo ndi omiu mongkona tuwua nahina tampulaano, anu kongko meronga-ronga saru Ondae i Ama ka anu pinokomengkaaomo ndi omami.

³ Hapa anu kinitamami ka anu rinongemami atuu, kimempaleleo mbo'u ndi omiu, ka impohawe koa mbo'u tepo'asaa saru omami. Ka tepo'asaamami onaemo tepo'asaa saru Ondae i Ama ka saru Ana-Do, i Yesu Kerisituu.

⁴ Ka luwuno andio kimeburiakomiu, ka igagi soompo po'undemami.

Ondae Ue Ala onaemo mewine 1:5-10

⁵ Ka ndiomo lele, anu kimerongeomo inso ndi Ondae, ka anu kimpohaweo ndi omiu: Ondae Ue Ala onaemo mewine ka i laro-Do nahina ntu'u wongi-wongia.

⁶ Tewala mpotae kita, nine mpohawe kita tepo'asaa saru Ondae, sine mentuwu kita a laro wongi-wongia, mpegaupi kita ka nahi tompoweweu menteea.

⁷ Sine tewala mentuwu kita a laro mewine mengkena kana Ondae kongko a laro mewine, ka kita mpohawe tepo'asaa pada ontaeto, ka rea-Do i Yesu, Ana-Do atuu, mokomempori kita inso a luwuno hala.

⁸ Tewala mpotae kita, nine nahi tontehala, ka tomempopo'oo koroito ontaeto ka menteea nahina i laroto.

⁹ Tewala tomemangakuakono halato, Ondae pine'ala-ala ka moleo Ira, onaemo ka Do'ampunio luwuno halato ka mokomempori kita inso a luwuno mosa'oa.

¹⁰ Tewala mpotae kita, nine nahi tompoweweu hala, ka tomeweweu Ira gagi megaupi ka pau-Do nahina i laroto.