1 TIMOTIU 5 - Wunta Mempori

Mongkona luwuno pepaekompo pe'asa pompe'ala-ala 5:1-2

¹ Si tekuda a mia anu mota'u, tendeano kuahakono kana ama. Kuahako ira mia memongura kana pepaekompomu,

² luwuno beine memota'u kana ine ka luwuno beine memongura kana uaimu nahina po'onde-onde.

Mongkona tuwu beine 5:3-16

³ Pelangkai ira tuwu beine anu mentee ntu'u tuwu beine.

⁴ Sine tewala aasa tuwu beine hinao anano ke ana'ueno, moikoano ondae atuu amba-ambano ka dompepaguru mpompekakaako a mpe'asa rahado ka mensuloo moikodo mia mota'u ka uedo, hangano onaemo anu pinemoiko-Do Ue Ala.

⁵ Sekono aasa tuwu beine anu mentee ntu'u tuwu beine, anu bininta asa-asano, momperorohi ndi Ondae Ue Ala ka mokua mo'ema ka mekakai meene wongi.

⁶ Sine aasa tuwu beine anu tuwu mare'e ka laloomo lahi, mateomo tempono da ituwu.

⁷ Popoto'oriako ira koa mbo'u tuwu beine atuudo mongkona luwuno andio ka domentuwu nahina tataado.

⁸ Sine tewala hinao te'asa mia anu nahi pekakaako ira pe'etuno, tamoako pe'asa rahano, mia atuu mepoura ka mosa'oopo sekono mia anu nahina pompe'ala-alano.

⁹ Anu mebinuri gagi tuwu beine, butu ondae anu nahi makura inso nomopulu nta'u tinuwudo, anu pohona koa ipekombia

¹⁰ ka anu mengkaa mo'anggaomo anu moiko, kana mompekaria ana, ineheno metotoka, mowo'ohi karudo pepaekompo pe'asa pompe'ala-ala, montulungi mia anu laro pompema'isoa – owowaano ondae anu mempakeomo luwuno tempo mpoweweu moiko.

¹¹ Siimo buri ira tuwu beine anu da memongura. Hangano tewala tepohona koa ira mingki mpewowali anu monsia ira inso ndi Ondae i Kerisituu, ondae atuu mingki mpekombia

¹² ka saru mehapuo petenunudo anu amba-ambano ndi Ondae, dompowawaakono hukuno koroido.

¹³ Tamoako mbo'u pewinso mpeluarako a rahado mia, mpepokoleleo mpeluweki ka komba butu mpeluwekimo koa, sine meme'ase mbo'u ka mensalo-saloo wineweuado mia susua ka mempau ira anu nahi tekona ipinau.

¹⁴ Onaemo pu'uno ineheku tuwu beine anu da memongura ka dompekombia mbo'u, mpe'ana, mosongka a laro nsomborino ka si mpompauako tarono pu'uno mokomosa'oo neeto.

¹⁵ Hangano ba opia ira tuwu beine mepansia iramo mentondao i Mosa'o.

¹⁶ Tewala aasa tama ke beine anu mompe'ala-ala hinao pe'etuno anu tuwu beine, ka itulungi ira ka si domegagi to'oriado bawaa. Hangano kanandio ondae anu mentee ntu'u mentuwu beine ntetulungi ira inso a bawaa.

Ba opia pontiso ka patudu mbo'u 5:17–6:2a

¹⁷ Luwuno penatua anu moiko ipetewawa tekona ipinelangkai meluka mpendua, tamoako ondae anu mpe'isei mpontutulu ka mpompaguru.

¹⁸ Kombake pinau a Wunta Mempori, ”Si ponguo ngusuno sapi anu kontongaano monsesa,” ka mbo'u ”mia mo'angga tekona ipohawe tambono.”

¹⁹ Si tarimao petuluri a aasa penatua sangkadio tewala ipokorosoo orua ke otolu mia sakosii.

²⁰ Ondae anu mpoweweu hala asalakono kuahako ira i arodo luwuno mia ka domedoito koa anu susua.

²¹ I aro-Do Ue Ala ka i Kerisituu ka luwuno mala'eka bininiki-Do ku'oliwiko ntu'u: pe'ihilaroomo pontiso andio si danggara ka weweuomo luwuakoano si po'ala-alaako.

²² Si madara komedampoakono kaemu a asa mia ka si tetonda a halado mia susua. Dagaio koa memporino koroimu.

²³ Si koa mbo'u butu mo'inu uwoi, tendeano tiangiakonomo anggoro tedei, hangano kompomu nahi madoo ka koroimu mararu imolema.

²⁴ Halado ba opia mia mengkaa, kana ipese'elungi ira a mpobitaraa, sine halado ba opia mia mbo'u lembuino ka i'amba gagi mengkaa.

²⁵ Kanandio koa mbo'u wineweu moiko atuu ronga mengkaa ka tewala komba kanandio, nahi ta mokompo'ia mpiha tewuni.