1 TIMOTIU 4 - Wunta Mempori

Anggaano i Timotiu umaropio pompaguru mompopo'oo 4:1-16

¹ Sine manasa Dopauo Penaa nine a tempo-tempo lembuino, hinao mia anu ta mepoura ka i'amba tumonda ira penaa mompopo'oo ka pompagurudo onitu

² hangano pompopo'oodo anu mpompau pegaupi anu aroa mewinedo mpetondoniako tondonido.

³ Ondae atuu me'onto ira mia mpekombia, me'onto ira mia mpongkaa kaanga anu pinokogagi-Do Ue Ala ka domengkaano mia anu mpompe'ala-ala ka anu mento'oriomo menteea saru mpontarimakasi.

⁴ Hangano luwuno anu pinokogagi-Do Ue ala atuu moiko ka maupo te'asa nahina anu upali, tewala tinarimaako pontarimakasi,

⁵ hangano luwuno atuu pinokomemporiako pau-Do Ue Ala ka pekakai.

⁶ Saru wela mopoto'oriako ira pepaekompoto mongkona luwuno atuu, omue kogagi aasa puu pompekakaako-Do i Kerisituu Yesu anu moiko, tepaguru a luwuno pepu'uano pompe'ala-alato ka a pompaguru mentee anu utondaomo andio.

⁷ Sine olaiakonomo tutu-tutuludo beine memota'u anu nahina tuduno. Pepokoleleomo pesomba.

⁸ Mokoleleoo koroi tolino komba hadio tuduno, sine mesomba atuu mentudu a luwuakoano, hangano i tu'ai hinao dandi, moiko tiano tuwu andio maupo tiano tuwu anu ta hawe.

⁹ Pau andio mentee ka tekona itinarima ka ipine'ala-ala ntu'u.

¹⁰ Onaemo pu'uno ka tompe'isei ka mpeteahako, hangano mpomperorohi kita ndi Ondae Ue Ala anu tuwu, Puu pongkaduduido luwuno mia, tamoako lahi ondae anu mpompe'ala-ala.

¹¹ Paleleomo ka pompaguruakomo luwuno atuu.

¹² Si hina maupo te'asa mia me'uru-uruko hangano mongurako. Gagimo pandirido luwuno mia mpompe'ala-ala, a mpepaumu, a mpelelumu, a pompehohawamu, a mpetenunumu ka a memporimu.

¹³ Kontongaano atuu, ranta ka kuhawe temokua basaako ira bawaa Wunta Mempori, mompokomoroso ka mompaguru.

¹⁴ Si kolupeo pakeo pompowee inso ndi Ondae i Ue anu hina ndi omue, anu uwineeako hangano pinau anu ta gagi ka saru pedampono kaedo penatua.

¹⁵ Pekokoongakonomo luwuno atuu, tuwumo i larono ka imengkaa a luwuno mia kotaha-tahaneno tumuwumu.

¹⁶ Dagaiomo koroimu omiu-miu ka dagaiomo pompagurumu. Petenunumo a luwuno atuu, hangano a wineweumu kanandio kokumaduduio koroimu ka luwuno mia anu rumongeko.