1 TIMOTIU 3 - Wunta Mempori

Atora gagi petewawa bawaa 3:1-7

¹ Menteeomo pau andio, ”Mia anu ineheno potoro gagi petewawa bawaa ineheno anggaa anu tekosi.”

² Onaemo pu'uno petewawa bawaa asalakono asa mia anu nahina tataano, tama anu asa koa beineno, mompedato, pande mosongka, moiko gauno, ineheno metotoka, pande mompaguru mia,

³ komba marampo'inu, komba marantekuda tendeano me'aroa, mompokomoiko mia teposisala, komba te'ataako doi,

⁴ aasa petewawa sombori anu moiko, inondaha ka dompelangkaio anano.

⁵ Tewala asa mia nahi ponto'ori mosongka a laro nsomborino, kana'umpeke ka ipoko'orusuo Bawaa-Do Ue Ala?

⁶ Onae komba mia anu da sarai itepidi, ka si gagi mompelangka-langkai ka ikonao hukuno i Mosa'o.

⁷ Onae ka imoiko koa mbo'u neeno i bungkuno bawaa, ka si domentatao mia ka itedonta a ohono i Mosa'o.

Atora gagi diakee 3:8-13

⁸ Kanandio koa mbo'u luwuno diakee asalakono mia mempinelangkai, ka si pesampa elo, ka si marampo'inu, ka si po'ungke urano a nsala anu molengku,

⁹ tendeano mia anu mekariao rahasiano pompe'ala-ala i laro aroa anu mempori.

¹⁰ Ondae mbo'u asalakono me'inarahako koa ari, mansano nahina tataado ka do'amba mempinakosi a pompekakaakoa atuu.

¹¹ Kanandio koa mbo'u luwuno beinedo ka domia koa mentinudu, ka si marapomposebe, asalakono mokompompedato ka pine'ala-ala a luwuakoano.

¹² Diakee asalakono tama anu aasa koa beineno ka moiko iposongkaako ira anano ka somborino.

¹³ Hangano ondae anu moiko dompompekakaako mpohawe potoro anu moiko ranta ka domemalua mpesakosii a pompe'ala-ala ndi Ondae i Kerisituu Yesu.

Bawaa-Do Ue Ala, pu'uno ka tumbono menteea 3:14-16

¹⁴ Luwuno atuu kuburioakomu, maupo kuperorohio aku koa ronga mokohaweko.

¹⁵ Gaagi tewala nahi kuronga hawe, uto'oriomo ba kana'umpe asalakono mia domentuwu gagi ihino sombori-Do Ue Ala, onaemo bawaa-Do Ue Ala anu tuwu, karu pontumbo ka pu'uno menteea.

¹⁶ Ka menteeano langkaiomo rahasiano pesombato: ”Ondae, anu mepokomengkaa Iramo a rupano mia, pinokomentee a Mpenaa; anu mepopokita a luwuno mala'eka, pinalele i olodo luwuno tongku anu nahi domento'ori Ira Ue Ala; anu pine'ala-ala i wawontolino, winuatako a marambaa.”