1 TIMOTIU 2 - Wunta Mempori

Mongkona pekakaido bawaa 2:1-7

¹ Amba-ambano patuduku: Imewuatakono po'ema, pekakai sapa'a ka pontarimakasi tiado luwuno mia,

² tiado luwuno mokole ka tiado luwuno anu langkai potorodo, ka tompokomentuwu rodo ka sintuwu a luwuno petenunuto mpesomba ka pelelu anu moiko.

³ Onaemo anu moiko ka anu Dopemoikoo Ue Ala, Puu pongkaduduito,

⁴ anu inehe-Do ka luwuno mia mengkinadudui ka mpohawe ponto'ori mongkona menteea.

⁵ Hangano Ondae Ue Ala atuu Asa-asa-Do ka Asa-asa-Do koa mbo'u anu gagi po'oloti olo-Do Ue Ala ka mia, onaemo mia Ondae i Kerisituu Yesu,

⁶ anu meweengakonomo koroi-Do gagi tolosido luwuno mia: onae atuu ponsakosii a tempo anu pinakosi.

⁷ Hangano ponsakosiimo atuu ka kupinakosi gagi pompalele ka tinena – anu pinauku andio mentee, nahi kupegaupi – ka gagi pompaguru mia anu komba to Yahudi, a pompe'ala-ala ka menteea.

Mongkona peleluno tama ka beine a mpesombado bawaa 2:8-15

⁸ Onaemo pu'uno ineheku, i sua-suamo koa dompekakai tama ka domensineo kaedo anu mempori, nahina tekuda ka nahina teposisalaa.

⁹ Kanandio koa mbo'u beine. Ka ipesangka koa anu tekona, montonda gau ka nahi maramba, wuuno ka sipiniu, ka si pompake wulaa ke mutiara ke maupo sangka anu masuli olino,

¹⁰ sine ka ipesangkaakono wineweu moiko, kana tekonano a beine anu mesomba.

¹¹ Asalakono beine menoro-noro ka ipomperorongeako montarima pompaguru.

¹² Nahi ku'eheakono beine mompaguru ka nahi ku'eheakono mbo'u mosongkaakono tama; tendeano ka ipenoro-noro.

¹³ Hangano i Adama anu pinokogagi amba-ambano, ka i'amba i Hawa.

¹⁴ Tamoako mbo'u komba i Adama anu tepopandei, tendeano beinemo atuu anu tepopandei ka tedonta a hala.

¹⁵ Sine beine ta kinadudui hangano onae me'ana, poolo ka ipompedato koa mpiha pompe'ala-alano ka mompehohawa memporia saru nahi maramba.