1 TESALONIKA 5 - Wunta Mempori

Petangkoro 5:1-11

¹ Sine mongkona tempo ka oleo, pepaekompo luwu-luwu, siimo imebinuriako,

² hangano omiu isa'a mento'orio ntu'u, nine oleo-Do i Ue hawe kana mia monako tempono wongi.

³ Tewala mpotae ira: Luwuno sintuwu ka rodo nahina marisua – ka borono i'alu ira masolaa, kana aasa beine anu mentia i'aluo mahaki me'ana – manasa nahi ira mentola.

⁴ Sine omiu, pepaekompoku, komba mentuwu komiu a laro wongi-wongia, ranta ka imansa humawe komiu oleo atuu kana mia monako,

⁵ hangano luwumiu ana mewine ka ana meene. Ontae komba miano wongi ke miano wongi-wongia.

⁶ Onaemo pu'uno moikoopo si tompoturi kana mia mehano, sine tompetangkoro ka molike.

⁷ Hangano ondae anu mpoturi, mpoturi tempono wongi ka ondae anu memolangu, molangu tempono wongi.

⁸ Sine ontae, anu mia meene, moikoopo tomemolike, mpelemba labuako pompe'ala-ala ka pompehohawa, ka mpe'ulu-uluako pomperorohi tekaduduia.

⁹ Hangano komba Dopakosio Ue Ala ka i'alu kita pontekudaako, sine ka tompohawe tekaduduia hangano Ondae i Yesu Kerisituu, Ueto,

¹⁰ anu mateakitamo, ke moiko mpetangkoro kita ke mpoturi kita, ka tomentuwu mperonga-ronga saru Ondae.

¹¹ Onaemo pu'uno imemambe patudumo ka memambe pokoroso kana anu lano imeweweuomo.

Luwuno patudu 5:12-22

¹² Kime'emao ndi omiu, pepaekompoku luwu-luwu, ka impelangkai ira anu mpe'isei mpo'angga i olomiu, anu wawa komiu ndi Ondae i Ue ka anu kumuahako komiu;

¹³ ka ipompesu'i mentulungi ira a pompehohawa hangano inanggado. Imentuwumo memambe sintuwu mpiha.

¹⁴ Kimempatudu komiu mbo'u, pepaekompo, imengkuahako iramo anu mentuwu nahi te'atora, imentarero iramo anu motewe aroado, impokoroso ira anu memolema, imemauruako iramo luwuno mia.

¹⁵ Impekokoongakono, ka si hina mia anu mombaloako mosa'o ka anu mosa'o, sine ime'ungkeakono mpiha anu moiko, ndi omiu nte'o'asa mia ka a luwuno mia.

¹⁶ Imemawongkomo mpiha.

¹⁷ Impekakaimo mpiha.

¹⁸ Impontarimakasimo a luwuakoano, hangano onaemo po'ehe-Do Ue Ala ndi omiu a ntepo'asaa ka Ondae i Kerisituu Yesu.

¹⁹ Si mpepateo Penaa,

²⁰ ka si mperuanahio luwuno pinau anu ta gagi.

²¹ Impepenteeomo luwuakoano ka ime'iniomo anu moiko.

²² Impoko'olaiomo koroimiu inso a mperupa-rupa anu mosa'o.

Tabea 5:23-28

²³ Po'ineeomo Ondae Ue Alano rodoa mokomempori komiu luwu ka po'ineeomo penaa, sumanga ka koroimiu sompo itepekaria saru nahina tataano a hawe-Do i Yesu Kerisituu, Ueto.

²⁴ Ondae anu moboi komiu mempori Ira, Ondae koa mbo'u Ira umihiio.

²⁵ Pepaekompoku luwu-luwu, impekakaiakamimo.

²⁶ Impohaweakono pewoo-woo anu mempori tabeamami a luwuno pepaekompo.

²⁷ A nee-Do i Ue ku'emao ntu'u ndi omiu, ka ibinasa wunta andio a luwuno pepaekompo.

²⁸ Pe'aroa-Do i Yesu Kerisituu, Ueto, kumongkomi komiu!