1 TESALONIKA 4 - Wunta Mempori

Patudu ka tomentuwu mempori 4:1-12

¹ Poko'ariano, pepaekompo luwu-luwu, kime'emao ka patudu komiu ndi Ondae Ue Yesu: Imerongeomo inso ndi omami ba kana'umpe asalakono imentuwu ka Dopemoikoo Ue Ala. Mongkona atuu lano imentondaomo, sine moikoopo imeweweuo lalu mpopesu'ui mbo'u.

² Imento'orio koa mbo'u luwuno pontiso isua anu kimewee komiumo a nee-Do Ue Yesu.

³ Hangano ndiomo po'ehe-Do Ue Ala: pokomemporiamiu, onaemo ka ime'olaiakono pebelesua,

⁴ ka impo'alamo singge mia aasa beine gagi beinemu ka imentuwu a laro pepokomemporia ka pompelangkaia,

⁵ komba a mpo'eheno koroi, kana wineweudo mia anu nahi domento'ori Ira Ue Ala,

⁶ ka mongkona luwuno andio mia ka si poweweu anu nahi moiko a mpepaekompono ke mopo'oo. Hangano Ondae i Ue mombaloakono luwuno andio, kana anu kimempauomo ka mpokomanasaa komiu i ndi'upua.

⁷ Dopoboi kita Ue Ala komba ka tompoweweu hapa anu mokoburu, tendeano hapa anu mempori.

⁸ Onaemo pu'uno isema anu nahi tarimao andio komba mia anu nahi tarimao, tendeano nahi tarima Ira Ue Ala anu moweeakomiumo mbo'u Penaa-Do anu mempori.

⁹ Mongkona pompehohawa a mpepaekompo siimo imebinuriako, hangano omiu isa'a mpepaguru komiumo mambepehohawa inso ndi Ondae Ue Ala.

¹⁰ Mongkona atuu imeweweuo koa mbo'u a luwuno pepaekompo i asa wawo wita Makedonia. Sine kimempatudu komiu, pepaekompo luwu-luwu, ka imeweweuo lalu mpompesu'ui mbo'u.

¹¹ Ka topotaemo kana aasa pompelangkai ka irodo imentuwu, ka imeweweuo luwuno anggamiu omiu-miu ka mpo'anggaako kae, kana anu kimempauakomiumo,

¹² ranta ka imentuwu kana mia anu mponto'ori gau a pongkitado mia i bungkuno ka nahi impomperorohi ndi ondae.

Hawea-Do i Ue 4:13-18

¹³ Ka i'amba nahi kimebehe, pepaekompo luwu-luwu, nine nahi imento'orio mongkona ondae anu memate, ka si mpompemasusa kana mia mehano anu nahina pomperorohido.

¹⁴ Hangano tewala tompe'ala-alao, nine Ondae i Yesu mate Iramo ka mewangu Iramo, ka tompe'ala-alao koa mbo'u nine ondae anu memate iramo ndi Ondae i Yesu Ira pumpu ira Ue Ala meronga saru Ondae.

¹⁵ Ndio kimempauakomiu a mpau-Do i Ue: ontae anu mentuwu, anu da mpo'ia ranta hawea-Do i Ue, nahi ntu'u kita mpese'elungi ira anu memate iramo.

¹⁶ Hangano i tempono pinowee petondoni, onaemo tempono ipebooli petewawado mala'eka ka tawuwua-Do Ue Ala me'uni, ka Ondae i Ue Ira metii inso i suruga ka ondae anu memate ndi Ondae i Kerisituu ira ntese'elu mpewangu;

¹⁷ umarino atuu, ontae anu mentuwu, anu da mpo'ia, kita mentinande mperonga-ronga saru ondae a laro nseru tumotowo Ira i Ue i laro meene. Kanandiomo ontae kita mperonga-ronga saru Ondae i Ue ranta nahina tampulaano.

¹⁸ Onaemo pu'uno imemambe tareroakomo luwuno pau andio.