1 TESALONIKA 3 - Wunta Mempori

Lele moiko anu winawano i Timotiu 3:1-13

¹ Nami kimpokompeteao mbo'u, onaemo pu'uno ka kimemputusio ka kupo'ia asa-asaku i Atena.

² Ka ki'amba mentenao i Timotiu ka i'aiwa, pepaekompo anu saru omami mpo'anggaako Ira Ue Ala a pompalelea Lele Mawongkoa-Do i Kerisituu, ka ipokomorosoo aroamiu ka patudu komiu mongkona pompe'ala-alamiu,

³ ka si hina mia anu telelu pompe'ala-alano hangano luwuno masusaa andio. Omiu isa'a mento'orio, nine kanatuumo tomentinantuiako.

⁴ Hangano, tempono mbo'u kimperonga-ronga saru omiu, kimempauakomiumo, nine kita mpompembasai masusaa. Ka mongkona atuu, kana imento'orio, gagiomo.

⁵ Onaemo pu'uno, hangano nami kupokompeteao mbo'u, ka kutenaomo aiwa, ka kuto'orio mongkona pompe'ala-alamiu, hangano kuporerengkoo ba mansa i'ara-arahako komiumo puu pompopandei ka ba mansa nahina tuduno pe'iseimami.

⁶ Sine kanadio-andio, mansano wali hawe i Timotiu inso ndi omiu ka mowawa lele anu mompokomawongko mongkona pompe'ala-alamiu ka pompehohawamiu, ka nine wela komiu mponaa pewowoloa anu moiko mongkona omami ka mingki ntepohaweakami, kana omami mbo'u mingki ntepohaweakomiu,

⁷ ka omami mbo'u, pepaekompo luwu-luwu, a laro luwuno pompema'isoa ka masukaraa gagi kami ntetarero hangano omiu ka pompe'ala-alamiu.

⁸ Kanandio-andio wali kami mentuwu, polomo koa ka imemoroso mpentade ndi Ondae i Ue.

⁹ Hangano pontarimakasi hapake anu kami mpokompesombaakono ndi Ondae Ue Ala a luwuno mawongkoa, anu hinawemami hangano omiu, i aro-Do Ue Alato?

¹⁰ Meene wongi mpekakai kami ntu'u, ka tontepohawe rupa pada rupa ka tumiangio hapa anu da makura a pompe'ala-alamiu.

¹¹ Po'ineeomo Ondae, Ue Ala ka Amato, ka Ondae i Yesu, Ueto, ka Do'ungkahiakami sala aiwa ndi omiu.

¹² Ka po'ineeomo Ondae i Ue ka dopokogagi komiu koteti-tetiangi ka memare'e a laro mambe pehohawa ka a luwuno mia, mengkena koa mbo'u kana omami mpehohawa komiu.

¹³ Po'ineeomo ka Dopokomorosoakomiu aroamiu, ka si hina tataano ka mempori, i aro-Do Ue Ala ka Amato a tempo hawea-Do i Yesu, Ueto, saru luwuno mia mempori-Do.