1 TESALONIKA 1 - Wunta Mempori

Tabea 1:1

¹ Inso ndi Paulu, i Siliwanu ka i Timotiu a bawaado to Tesalonika anu ndi Ondae Ue Ala Ama ka ndi Ondae Ue Yesu Kerisituu. Pe'aroa ka rodoa kumongkomi komiu.

Wuano pompaleleno i Paulu 1:2-10

² Pontarimakasi kami mpiha ndi Ondae Ue Ala hangano luwumiu ka mpewua komiu a mpekakaimami.

³ Hangano kiwela merambeo po'anggano pompe'ala-alamiu, inanggano pompehohawamiu ka modatono pomperorohimiu ndi Ondae Ueto i Yesu Kerisituu i aro-Do Ue Ala ka Amato.

⁴ Ka kimento'orio, hei luwuno pepaekompo anu pinehohawa-Do Ue Ala, nine Dobiniki komiumo.

⁵ Hangano Lele Mawongkoa anu pinalelemami komba butu pinohaweako pau ndi omiu, sine saru koa mbo'u roso hangano Penaa Mempori ka saru aasa manasaa anu moroso. Lano imento'orio, ba kana'umpe kimpo'angga i olomiu hangano omiu.

⁶ Ka megagi komiumo mentonda kami ka tumonda Ira i Ue; a laro pompokonsiia anu mobea imentarimaomo pau atuu a mawongkono aroa anu inangga-Do Penaa Mempori,

⁷ ranta ka imegagimo pandirido luwuno mia anu mpompe'ala-ala i wita Makedonia ka Akaya.

⁸ Hangano inso i olomiu ka itelele pau-Do i Ue komba butu i Makedonia ka i Akaya, sine a luwuno po'ianga teleleomo mongkona pompe'ala-alamiu ndi Ondae Ue Ala, onaemo pu'uno siimo kimpompau hapa-hapa mongkona atuu.

⁹ Hangano ondaedo isa'a mentutuluo mongkona omami, ba kana'umpe imentotowo kami ka ba kana'umpe impepokule ndi Ondae Ue Ala inso a luwuno lahumoa ka mekakaako Ira Ue Ala anu tuwu ka mentee,

¹⁰ ka sumikorio hawe-Do ana-Do inso i suruga, anu Dowangu Iramo inso i olodo mia mate, onaemo Ondae i Yesu, anu kumadudui kita inso a pontekudaako anu ta hawe.