1 Tawarika 29 - Wunta Mempori

Pesomba tiano powangu raha-Do i Ue

¹ Mokole Daudi mepau a luwuno bawaa atuu, ”I Salomo anaku anu asa-asano bininiki-Do Ue Ala, da mongura ka napi hadio ponto'orino, sekono anggaa andio langkai, hangano raha atuu komba tiano mia, tendeano tia-Do Ue Ala.

² Tompaano pompoliku, kupatindaomo weweuno raha-Do Ue Alaku, onaemo wulaa weweua luwuno sangka wulaa, salaka weweua luwuno sangka salaka, mala weweua luwuno sangka mala, labu weweua luwuno sangka labu ka keu weweua luwuno sangka keu, watu paramata kerisopara ka paramata podedea, watu mo'ito ka watu paramata mperupa-rupa sorano, saru luwuno rupano watu bininiki ka puala anu hadio ntu'u.

³ Hangano pongkekewoiku a raha-Do Ue Alaku, kupeweengakono mbo'u wulaa ka salaka gagi tiangino anu kupantindaomo tiano raha mempori;

⁴ tolu nsowu talenta wulaa inso a wulaa Opiri ka pitu nsowu talenta salaka ntu'u weweua apiino rere bolongko,

⁵ wulaa weweua luwuno sangka wulaa ka salaka weweua luwuno sangka salaka ka weweua luwuno anu inanggado puu mpo'angga. Isema ke ia oleo andio umehe mompowee pesombano ndi Ondae i Ue?”

⁶ Ka i'amba luwuno petewawado anu mpepe'etu, luwuno petewawa suku Isaraeli, luwuno petewawa sorodadu asa nsowu ka sorodadu asa etu, saru luwuno petewawa anggaa tiado mokole mokomengkaao inehedo.

⁷ Dompeweengakono tiano anggaa i raha-Do Ue Ala, lima nsowu talenta wulaa ka hopulu nsowu dirihami, hopulu nsowu talenta salaka ka hopulu ka oalu nsowu talenta mala saru asa etu talenta labu.

⁸ Isema anu hinao watu paramata, ipeweengakono ndi Yehieli, to Geresoni atuu, ninaa a mponaapa arataa i raha-Do i Ue.

⁹ Tongku atuu memawongko a pompoweedo asa mia ka asa mia, hangano moleo aroado mpompowee pesomba a moputeno aroado ndi Ondae i Ue. Mokole Daudi mbo'u tedoa mawongko aroano.

Po'unde-undeno i Daudi

¹⁰ Umarino atuu i Daudi umunde-unde Ira i Ue i arono matado luwuno bawaa atuu. Mepauomo i Daudi, ”Inunde-unde Komiumo, oo Ue, Ue Alano i Isaraeli, amamami, inso i ndi'ipua ranta nahina tampulaano.

¹¹ Oo Ue, Omiumo me'ueo langkaino potoro ka pompoli, pompelangkai ka telelea ka marambaa, oo, luwuakoano anu kongko i langi ka i tolino! Oo Ue, Omiumo me'ueo poparentaa ka Omiu anu lalu mantande gagi petewawa lumaloio luwuakoano.

¹² Hangano pompolia ka marambaa inso ndi Omiu ka Omiumo anu pabawa a luwuakoano. A ngkae-Miumo roso ka pompolia; a ngkae-Miumo pabawa mompokolangkai ka mompokomoroso luwuakoano.

¹³ Kanandio-andio, oo Ue Alamami, mpontarimakasi kami ndi Omiu ka me'unde-undeo nee-Miu anu langkai.

¹⁴ Hangano isemake ongkue andio ka isemake tongkuku, ranta kami mempolio mpopowee pesomba a moleono aroamami kanandio? Hangano luwuakoano inso ndi Omiu ka inso a ngkae-Miumo pesomba anu kiweea-Komiu.

¹⁵ Hangano omami mehawe anu mperato i aro-Miu mengkena kana luwudo uempu'umami. Oleo ntumuwumami i wawo tolino kana eo-eo ka nahina pomperorohi.

¹⁶ Oo Ue, Ue Alamami, luwuno hadio ntu'u anu kimempatindaomo wanguno raha-Miu, po'iangano nee-Miu anu mempori tepu'u inso a ngkae-Miu ka Omiumo me'ueo luwuakoano.

¹⁷ Kuto'orio, oo Ue Alaku, nine Omiumo anu umara-arahakono aroa ka memoikoo moleoa, onaemo ka kupesombaakono luwuno atuu a moleono aroa. Kanandio-andio bawaa-Miu anu mehawe i ndi'ai kukita iramo mpompowee pesomba ndi Omiu a moleono aroa ka mawongko.

¹⁸ Oo Ue, Ue Alano i Burahima, i Saki ka i Isaraeli, uempu'umami, Ipekaria iramo ranta nahina tampulaano aroado bawaa-Miu anu kanandio-andio ka kongko Iwawao aroado ndi Omiu.

¹⁹ Ndi Salomo, anaku Ipoweeakonomo aroa anu moleo ka ipekariao luwuno parenta-Miu ka pepopoto'ori-Miu ka pompakosi-Miu, weweuo luwuakoano ka wanguo raha anu kupatindaomo.”

I Salomo gagi mokole; i Daudi mate

²⁰ Ka i'amba mepauomo i Daudi a luwuno bawaa atuu, ”Unde-unde Iramo i Ue, Ue Alamiu!” Luwuno mbo'u bawaa umunde-unde Ira i Ue, Ue Alano uempu'udo. Mpenggolontu ira ka mpesomba ndi Ondae i Ue ka ndi mokole.

²¹ Tisomono mpompesombaako ira pesomba sinumbele ka pesomba tinunu ndi Ondae i Ue, onaemo asa nsowu sapi lakino, asa nsowu bimba lakino ka asa nsowu bimba mongura, saru luwuno pesomba tinawano ka pesomba sinumbele anu hadio ntu'u a luwuno Isaraeli.

²² Mpongkaa ka mpo'inu ira ia oleo atuu memawongko langkai i aro-Do i Ue. Ka i'amba anu kompenduano domempakosio i Salomo anano i Daudi gagi mokole ka onae inurapi ndi Ondae i Ue gagi mokole ka i Sadoki gagi sando mpesomba.

²³ Ka i'amba i Salomo mentoro i wawono kadera poparentaa-Do i Ue, gagi mokole umeuo i Daudi, amano. Onae tedoa mehasili, ranta sompo to Isaraeli mperorongeakono pinauno.

²⁴ Ka i'amba luwuno petewawa ka sorodadu, saru mbo'u luwuno anado mokole Daudi me'akuio pabawano mokole Salomo.

²⁵ Ondae i Ue weweuo i Salomo tedoa langkai a pongkitado luwuno to Isaraeli ka moweeakono marambano poparentaa anu nahi hori hina a luwuno mokole anu moparenta i Isaraeli se'eluno onae.

²⁶ Kanandiomo i Daudi anano i Isai moparenta a luwuno Isaraeli.

²⁷ Onae moparenta a nto Isaraeli pato pulu nta'u tehineno; i kota Heberoni onae moparenta opitu nta'u ka i kota Yerusale tolu pulu ka otolu nta'u.

²⁸ Onae mate i tempono moputeomo wuuno, melai tiniwuno, tedoa mompoli ka maramba. Ka i'amba i Salomo, anano, gagi mokole umeuo.

²⁹ Menteeano teweweuno mokole Daudi inso a pompu'uano hawe pokotompaano teburi a wunta teweweuno i Samueli, puu mpongkita atuu, a wunta nteweweuno i nabi Nata, ka a wunta nteweweuno i Gadi, puu mpongkita atuu,

³⁰ saru luwuno poparentano anu moroso gagi mokole ka luwuno tempo anu pinembasaino ka to Isaraeli, saru luwuno poparentaa i wita susua.