1 Tawarika 22 - Wunta Mempori

¹ Ka i'amba motae i Daudi, ”I ndi'aimo raha-Do Ue Ala, ka i ndi'aimo meda pontunua pesomba, pesomba tinunudo to Isaraeli.”

Pepatinda mowangu Raha Mempori

² I Daudi metena pumpu ira luwu mia mehawe anu kongko i wita Isaraeli, ka i'amba tumena ira puu mpopole watu ka dompompatinda watu anu ta pinake mowangu raha-Do Ue Ala.

³ I Daudi mbo'u mompatinda hadio ntu'u labu weweua pasono lewe mpewowa langkai ka weweua luwuno pontumbo, hadio ntu'u mbo'u mala anu nahi kinati mobeano,

⁴ ka keu arasi anu nahi pinokodoa hadiono, hangano to Sidoni ka to Tirusi mpowawa hadio ntu'u keu arasi ndi Daudi.

⁵ Mompewowolo i Daudi, ”I Salomo anaku da mongura ka napi hadio ponto'orino, kahinaano raha anu ta wanguako Ira i Ue, asalakono langkai ntu'u, ranta gagi tenee ka lalu tekosi i luwuno wita. Onaemo pu'uno, moikoomo kupompatindaakono!” Ka i'amba i Daudi mompatinda hadio ntu'u se'eluno napi mate.

⁶ Ka i'amba moboio i Salomo, anano ka iparentao wanguo raha-Do i Ue, Ue Alado i Isaraeli.

⁷ Pauno i Daudi ndi Salomo, ”Anaku, ongkueku montoo mowangu rahano nee-Do i Ue, Ue Alaku.

⁸ Sine pau-Do i Ue hawe ndi ongkue, ’Hadio ntu'u rea anu inuwumu ka moweweukomo peteaa langkai. Nahi moiko upowangu rahano nee-Ku, hangano hadiomo rea inuwumu a wita i aro-Ku.

⁹ Menteeano, ta hina anamu tama. Onae ta gagi mia tuwu sintuwu. Aku moweeakono rodoa ndi onae inso a luwuno iwali limbu-limbu. I Salomo ta gagi neeno. Manangaia ka rodoa Aku weeakono Isaraeli ia tempono.

¹⁰ Onaemo anu ta wanguo rahano nee-Ku. Onaemo anu ta gagi ana-Ku ka Aku gagi Amano. Aku mokorosoo kadera poparentaano a nto Isaraeli hawe nahina tampulaano.’

¹¹ Kanandio-andio, oo anaku, po'ineeomo Ondae i Ue kumongkomiko, ranta kau pokowanguo raha-Do i Ue, Ue Alamu, kana anu pinau-Do mongkona omue.

¹² Butu po'ineeomo Ondae i Ue moweeakomu pompewowolo molino ka ponto'ori ka weweuko moparenta a nto Isaraeli, kau pekakaakono Taura-Do i Ue, Ue Alamu.

¹³ Bakanandio kome'ura, tewala metenunuko weweuo luwuno pompakosi ka luwuno songka anu Dopeparentaako i Ue ndi Musa tiado to Isaraeli. Pokorosoomo aroamu, si doito ka si terungku aroamu.

¹⁴ Kitaomo, maupo a laro masusaa, kupatindaomo weweua raha-Do i Ue, asa nsowu talenta wulaa, asa juta talenta salaka, hadio ntu'u mala ka labu, ranta mobeano nahi pinokongkati. Maupo keu ka watu, kupatindaomo, sine asalakono utiangio mbo'u.

¹⁵ Tamoako hadio ira ntu'u anu mpo'anggaakomu, moiko luwuno puu mpompole watu, anu pande mpo'angga watu ka keu, maupo luwuno mia anu monto'ori a hadio rupa anggaa:

¹⁶ wulaa, salaka, mala ka labu, anu nahi pinokodoa hadiono. Pompu'umo po'angga! Ondae i Ue kumongkomiko!”

¹⁷ I Daudi parenta ira luwuno anu langkai potorodo i Isaraeli atuu ka dompokowalio i Salomo, ana ntamano, ipotae,

¹⁸ ”Ondaemo i Ue, Ue Alamiu kumongkomi komiu ka moweeakomiumo rodoa i luwuno siuno. Mentee ntu'u, Dopeweengakonomo palilino wita andio a ngkaemiu, ranta wita andio metuundu i aro-Do i Ue ka a bawaa-Do.

¹⁹ Kanandio-andio, po'aroomo aroa ka sumangamiu kai ungke Ira i Ue, Ue Alamiu. Impompu'umo mewanguo po'ianga mempori-Do Ue Ala, kai pinokowawa Burua Pedandia-Do i Ue ka parewa mempori-Do Ue Ala mewinso a laro raha anu winangu po'iangano nee-Do i Ue.”