1 Tawarika 21 - Wunta Mempori

Pohuku a mpodoaa palili

¹ I Mosa'o mewangu umewai ira to Isaraeli ka ipopandeio i Daudi ka idoa ira to Isaraeli.

² Ka i'amba i Daudi motaeakono i Yoabi ka mia pinemota'udo palili, ”Imelakomo, doa iramo to Isaraeli inso i Bereseba hawe i Dani. Ka i'amba mewawao hasilino ndi ongkue, ka kuto'oriokoa hadiodo.”

³ Sumangki i Yoabi, ”Po'ineeomo Dotiangio i Ue palili-Do meluka asa etu inso anu hina kanandio-andio. Oo ueku mokole, kombake ondae, luwuno atamiu ueku? Tembio ueku ka ipedada umemao mongkona andio? Tembio mongkona atuu asalakono gagi sala anu domentembio to Isaraeli?”

⁴ Sine parentado mokole atuu asalakono iweweuo i Yoabi. Ka lumakoomo i Yoabi sumompoo luwuno Isaraeli, ka i'amba mekule i Yerusale.

⁵ I Yoabi pauakono i Daudi hasilino peburiado palili. Inso a luwuno Isaraeli hinao asa juta ka asa etu nsowu mia anu mokompopake ponai, ka inso i Yehuda hinao pato etu ka pitu pulu nsowu mia anu mokompopake ponai.

⁶ To Lewi ka to Benami nahi domebinuri i olodo, hangano petenado mokole atuu tedoa mokokowuereo i Yoabi.

⁷ Maupo a pongkita-Do i Ue, petena atuu mosa'o, onaemo pu'uno ka Dohuku ira to Isaraeli.

⁸ Ka i'amba mepauomo i Daudi ndi Ondae Ue Ala, ”Tehala akumo ntu'u, hangano weweuo mongkona andio. Kanandio-andio, po'ineeomo ka Ipoko'olaio salano tetenaa-Miu, hangano moweweu akumo anu tedoa benge-benge.”

⁹ Sine Ondae i Ue mepau ndi Gadi, puu mpongkitano i Daudi,

¹⁰ ”Lakomo, pauakono i Daudi, kanandiomo pau-Do i Ue: otolu rupa Kupo'aroo ndi omue. Binikiomo aasa inso i olono, ka Aku weweuo ndi omue.”

¹¹ Ka i'amba i Gadi aiwa ndi Daudi ka pauakono, ”Kanandiomo pau-Do i Ue, ’Binikiomo:

¹² otolu nta'u mokoninggoa ke otolu wula upolai inso i arodo luwuno iwalimu, kontongaano ponaido iwalimu tumondariko ke otolu oleo ponai-Do i Ue, onaemo hakilele kongko i wita andio, ka Mala'eka-Do i Ue mompotii ropua a luwuno wita i Isaraeli.’ Kanandio-andio, timbangaomo temoiko sangki hapa anu asalakono kupohaweo ndi Ondae anu tumena aku.”

¹³ Sumangki i Daudi ndi Gadi, ”Tedoa aku mompemasusa. Po'ineeomo kutendonta a ngkae-Do i Ue, hangano langkai ntu'u pompehohawa-Do, sine siimo kutedonta a ngkaedo mia.”

¹⁴ Dopotiiomo i Ue hakilele a nto Isaraeli, ka memate iramo inso a nto Isaraeli pitu pulu nsowu mia.

¹⁵ Ondae Ue Ala montena Mala'eka lumako i Yerusale ka ipokoropuo. Tempono mala'eka atuu ta mokoropuo, Dokitao i Ue ka me'o'oleakono masolaa atuu. Mepau Iramo a mala'eka puu mporopu atuu, ”Sompoomo! Potiio kaemu!” Tempo atuu Mala'eka-Do i Ue kontongaano mentade umpeda a ponsesaano i Orinani, to Yebusi.

¹⁶ Mansano i Daudi mengkikita, ikitao Mala'eka-Do i Ue kontongaano mentade i olono tolino ka langi, saru ponai tebuta a ngkaeno anu inio i wawono Yerusale. Ka i'amba i Daudi ka luwuno mia memota'u mpenggolontu saru mpesangka mpo'inombo.

¹⁷ Mepauomo i Daudi ndi Ondae Ue Ala, ”Kombake ongkue anu metena dumoa ira palili ka ongkuemo anu tehala ka moweweu mosa'oa? Sine luwuno bimba andio, hapake anu domeweweuomo? Oo Ue, Ue Alaku, po'ineeomo kae-Miu humuku aku ka somboriku, sine siimo bawaa-Miu i'aluako ira pohuku.”

Meda pontunua pesomba winangu ka pohuku menaa-naa

¹⁸ Ka i'amba Mala'eka-Do i Ue tumenao i Gadi pauakono i Daudi, nine i Daudi asalakono lumako kai powangu meda pontunua pesomba tia-Do i Ue a mposesaano i Orinani, to Yebusi atuu.

¹⁹ Lumakoomo i Daudi, menunu kana pinauno i Gadi anu pinohaweno a nee-Do i Ue.

²⁰ I Orinani kumitao mala'eka atuu tempono ipewolili. Opaa ira anano anu perongano, mpewuni ira. Tempo atuu onae tekonai monsesa gandu.

²¹ I Daudi hawe a mpo'iangano i Orinani. Mansano tumandeo i Orinani rupano, ka ikitao i Daudi, onae meluarako inso a mposesaa, ka i'amba menggolontu mesomba ndi Daudi saru rupano hawe a wita.

²² Motaeomo i Daudi ndi Orinani, ”Wee'akumo ponsesaa andio, ka kupowangu i ndi'ai meda pontunua pesomba ndi Ondae i Ue. Wee'akumo andio ka ku'olio montonda pe'olia, ka ipenaa-naa koa pohuku andio umalu ira palili.”

²³ Sumangki i Orinani ndi Daudi, ”I'alaomo, ka iweweuomo hapa anu pinemoikomiu ueku mokole. Kitaomo, kupeweengakono sapi andio gagi pesomba tinunu ka luwuno dopi ponsesaa andio gagi keu pontunu ka gandu weweua pesomba kaanga, luwuno atuu kupeweengakono.”

²⁴ Sine ipotae i Daudi ndi Orinani, ”Osi'i, mentee ntu'u aku umolio montonda pe'olia, hangano nahi kubehe umalao arataamu tia-Do i Ue ka mompesombaako pesomba tinunu anu inala mpena.”

²⁵ Ka i'amba i Daudi umowahio ndi Orinani, wulaa mobeano nomo etu sikala olino po'ianga atuu.

²⁶ I ra'ai i Daudi mowangu meda pontunua pesomba ndi Ondae i Ue, mompesombaako pesomba tinunu ka pesomba tekaduduia, saru moboi Ira i Ue. Ondae i Ue sumangkiakono api anu metii inso i langi a wawo meda pontunua pesomba tinunu atuu.

²⁷ Ka i'amba mepau Iramo i Ue a Mala'eka atuu, kai pokuleo ponaino a tampino.

²⁸ Ia tempomo atuu i Daudi mompesombaako mbo'u pesomba i ra'ai, mansano kumitao nine Dosangkiomo i Ue a mposesaano i Orinani, to Yebusi atuu.

²⁹ Kema Mempori anu wineweuno i Musa i pada one, ka meda pontunua pesomba tinunu i tempo atuu, kongko a mpesombaa i Gibeoni,

³⁰ sine i Daudi nahi sapa lumako i ra'ai i aro-Do Ue Ala mo'ungke pontiso-Do, hangano idoitoakono mponaino Mala'eka-Do i Ue atuu.