1 Tawarika 19 - Wunta Mempori

I Daudi metea umewaio inuleno i Amoni ka to Arami

¹ Umarino mate i Nahasi, mokoledo inuleno i Amoni, ka i'amba anano anu tama umeuo gagi mokole.

² Ka i'amba motaeomo i Daudi, ”Aku mopokitao petenunuku ndi Hanuni anano i Nahasi, hangano dopopokitaomo amano petenununo ndi ongkue.” Onaemo ka ipontena mia i Daudi mompohawe pau pompemasusa ndi onae a mateano amano. Sine mansado mehawe pegawaino i Daudi a witado inuleno i Amoni atuu ndi Hanuni, mpohaweo pe'oliwi pau pompemasusa ndi onae,

³ mpotae iramo mia pinemota'u inuleno i Amoni atuu ndi Hanuni, ”Kana'umpe pohawemu, nde lano ta melangkaio i Daudi amamu ka ipontena mia ndi omue mowawa pau pompemasusa? Kombake butu ira me'aiwa memparesao ka moporooo ka mengkale-kaleo wita andio, dome'aiwa pegawaino ndi omue?”

⁴ I Hanuni metena rumako ira pegawaino i Daudi atuu, kumeru ira ka poleio lembado a ntongano hawe a taku mpuri. Ka i'amba motola ira melako.

⁵ Mansado mpelempa mpekule, pinauakoomo i Daudi mongkona mia atuudo. Ka i'amba montenaomo mia lumako tepohaweako ira, nde mia atuudo tedoa mempinokoko'ii. Dopotae mokole, ”Impo'iamo i Yeriko ranta ka ituwu danggomiu, ka i'amba wali me'aiwa.”

⁶ Mansado mpokonto'orio inuleno i Amoni, nine domeweweuomo koroido tedoa i'o'aliakono i Daudi, i Hanuni ka inuleno i Amoni mpo'oliwi asa nsowu talenta salaka pontambo kareta ka sorodadu mpengara inso i Arami-Mesopotamia, inso i Arami-Maaka ka inso i Arami-Soba.

⁷ Domentamboo tolu pulu ka orua nsowu kareta saru mokole i wita Maaka saru sorodaduno, anu aiwa mpekema umpeda Medeba. Inuleno i Amoni mbo'u pinumpu inso a luwuno kotado ka me'aiwa ira mpetea.

⁸ Rumongeo mongkona atuu, i Daudi tumenao i Yoabi lumako saru luwuno sorodadu puu mpetea.

⁹ Inuleno i Amoni melako ka mpo'atora baresi mpeteado i arono pewowa kota, sekono luwuno mokole anu mpetonda me'aiwa, singge ira mekongko a mpo'iangado i pada.

¹⁰ Mansano kumitao i Yoabi, nine ponsapoi atuu ta sumolangio inso i arono ka inso i bungkuno, ibinikio asa ntia mia tebiniki inso i Isaraeli ka i'atorao baresi umaropi ira to Arami.

¹¹ Sorodadu anu toreano inaa ira i totono petewawano i Abisai, uaino ka ondae me'atorao baresido ntepo'aro saru inuleno i Amoni atuu.

¹² Ka i'amba motae i Yoabi, ”Tewala to Arami moroso irapo sekono ongkue, omue asalakono tumulungi aku. Sine tewala inuleno i Amoni moroso irapo sekono omue, aku koa tumulungiko.

¹³ Pokorosoomo aroamu ka aiwamo tompokodatoo tinooto tiano tongkuto ka tiano luwuno kota-Do Ue Alato. Po'ineeomo Doweweuo i Ue anu moiko a pongkita-Do.”

¹⁴ Ka i'amba i Yoabi ka sorodadu anu perongano melako umaropi ira to Arami ka dompetea ka mia atuudo mpolai inso i arodo.

¹⁵ Mansado mengkitao inuleno i Amoni, nine to Arami mpolai iramo, ondae mbo'u mpolai inso i arono i Abisai, uaino i Yoabi ka mpewinso a laro ngkota. Ka i'amba i Yoabi mekule i Yerusale.

¹⁶ To Arami mengkitao nine mentenangi iramo a nto Isaraeli; ka do'amba mpontena mia lumako tumena ira to Arami anu i asa towano Koro Eparata melako mpetea, petewawado i Sopaki, tadulako sorodaduno i Hadadeseri.

¹⁷ Mansano pinauako i Daudi mongkona atuu, ipumpu ira luwudo to Isaraeli ka do'amba mensakio Koro Yarade. Onae hawe umpeda ndi ondae ka me'atorao baresido umewai ira. Mansano i Daudi umatorao baresino umaropi ira to Arami ka dompetea, mpetea ira umewaio.

¹⁸ Sine to Arami mpolai inso i arodo to Isaraeli. Inso i olodo to Arami atuu, i Daudi mompepate pitu nsowu sorodadu mpekareta ka pato pulu nsowu sorodadu melempa karu; i Sopaki mbo'u, tadulako sorodadudo atuu, ipepateo.

¹⁹ Mansano luwuno mia anu mpetuundu ndi Hadadeseri mengkitao nine mentenangi iramo a nto Isaraeli, mpoweweu ira pesintuwua saru i Daudi ka mpetenunu ndi onae. Umarino atuu to Arami nami domebehe mbo'u mpokowali ira inuleno i Amoni.