1 Tawarika 17 - Wunta Mempori

Dandi-Do i Ue mongkona powangua Raha Mempori

¹ Tempono i Daudi rodoomo i rahado, motaeomo ndi nabi Nata, ”Kitaomo, mo'ia aku a raha inso a ngkeu arasi, kahinaano Burua Pedandia-Do i Ue atuu kongko i larono tenda.”

² Ka i'amba motaeomo i Nata ndi Daudi, ”Weweuomo luwuno anu ino'aroamu, hangano Ondae Ue Ala kumongkomiko.”

³ Sine, wongi koa mbo'u atuu haweomo pau-Do Ue Ala ndi Nata, kanandio,

⁴ ”Lakomo, pauakono tetenaa-Ku i Daudi, kanandiomo pau-Do i Ue: Komba omue anu ta wanguo raha po'ianga-Ku.

⁵ Nahi Kuhori mo'ia a laro raha tumampu'u Kutaate ira to Isaraeli mpeluarako hawe oleo andio, sine Ongkue melimba-limba inso a ngkema lumako a ngkema susua, ka inso a mpo'ianga aasa lumako a mpo'ianga susua.

⁶ Maupo isua Kupelakopi saru luwuno to Isaraeli, hori Akuke mompohawe pau a asa mia i olodo puu mpobitarado to Isaraeli, anu Kuparentao pakambi ira bawaa-Ku, kanandio: Tembio ka nahi mpowangua-Kune raha inso a ngkeu arasi?

⁷ Onaemo pu'uno, asalakono ka upauo kanandio ndi tetenaa-Ku i Daudi, kanandiomo pau-Do Ueno luwuakoano: Ongkuemo anu umalako inso a mpada pompakambia, tempono da upompakambi asa bawaa bembe bimba, gagi petewawado bawaa-Ku Isaraeli.

⁸ Kukongkomikomo maupo isua ulako ka mokotampula ira luwuno iwalimu inso i aromu. Aku weweuo neemu mengkena saru needo luwuno mia langkai potorodo i tolino.

⁹ Aku mompakosi asa po'iangado bawaa-Ku Isaraeli ka Kunaa ira ranta ka domerodo mpiha a mpo'iangado ondaedo ka nami dontelelu. Luwuno mia lambaha nami ira medado mbo'u ndi onae, kana i ndi'ipua,

¹⁰ mompu'u Kupotoro ira puu mpobitara a bawaa-Ku Isaraeli. Aku mokompetuundu ira luwuno iwalimu. Kupauakomu mbo'u: Ondae i Ue Ira wanguo inulemu anu moparenta.

¹¹ Tewala haweomo tempomu kolumako tepo'asaako ira uempu'umu, ka Aku wanguo inulemu lembuino, asa mia i olodo anamu, ka Aku mokomorosoo poparentaano.

¹² Onaemo anu ta mowangu raha tia-Ku ka Aku mokomorosoo kadera poparentaano ranta nahina tampulaano.

¹³ Ongkue ta gagi Amano, ka onae ta gagi ana-Ku. Petenunu ka pompehohawa-Ku nahi Aku moko'olaio inso ndi onae, kana anu Kupoko'olaiomo inso anu se'elu sekono omue.

¹⁴ Aku Kumorahakono a laro raha-Ku ka a laro poparentaa-Ku ranta nahina tampulaano ka kadera poparentaano ta moroso ranta nahina tampulaano.”

¹⁵ Menunu kana pau andio ka menunu kana pongkitaa andio, kanatuumo ipepau i Nata ndi Daudi.

Pekakai pontarimakasino i Daudi

¹⁶ Ka i'amba mokole Daudi mewinso i larono ka ipentoro i aro-Do i Ue. Ipotae, ”Isemake ongkue andio, oo Ue Ala, ka isemake somboriku, ranta ka Iwawa aku hawe olai andio?

¹⁷ Mongkona andio mbo'u da makura a pongkita-Miu, oo Ue Ala, ranta mepau Komiu mbo'u mongkona somborino tetenaa-Miu a tempo anu da olai ka kumita aku kana mia anu maramba, oo Ue Ala.

¹⁸ Hapa mbo'u anu ipokotiangio i Daudi ndi Omiu mongkona marambano tetenaa-Miu andio? Omiu tumo'orio tetenaa-Miu andio.

¹⁹ Oo Ue, hangano tetenaa-Miu andio ka menunu po'eheno aroa-Miu, Iweweuomo luwuno wineweu anu langkai andio ka Ipohaweakune luwuno weweua anu langkai atuu.

²⁰ Oo Ue, nahina kana Omiu ka nahina Ue Ala susua sangkadio Omiu, montonda luwuno anu kimerongeakono birimami.

²¹ Isema kana bawaa-Miu Isaraeli, asa tongku i tolino anu Ue Alano lumako ta tumolosio gagi bawaa-Do? Mohawe Komiu nee-Miu hangano luwuno wineweu-Miu anu langkai ka mongkokongiri ka sumaari ira luwuno tongku inso i arodo bawaa-Miu anu tinolosi-Miumo inso i Masiri.

²² Iweweu iramo bawaa-Miu Isaraeli gagi bawaa-Miu ranta nahina tampulaano ka Omiu, oo Ue, gagi Ue Alado.

²³ Kanandio-andio oo Ue, dandi anu pinau-Miu mongkona tetenaa-Miu andio ka mongkona somborino, po'ineeomo Ipokorosoo ranta nahina tampulaano ka Iweweuomo kana anu dinandi-Miu atuu.

²⁴ Po'ineeomo atuu ipinokoroso ka nee-Miu ta gagi langkai ranta nahina tampulaano, ka dompotae mia, ’Ueno luwuakoano, Ue Alano i Isaraeli onaemo Ue Alado to Isaraeli.’ Inuleno i Daudi tetenaa-Miu anu moparenta, ta moroso i aro-Miu.

²⁵ Hangano Omiu, oo Ue Alaku, Ipokomengkaaomo a ntetenaa-Miu andio nine Komiu wanguo inuleno moparenta. Onaemo pu'uno tetenaa-Miu andio memosiaako mekakai i aro-Miu.

²⁶ Onaemo pu'uno, oo Ue, butu Omiumo Ue Ala. Idandiomo mongkona anu moiko andio a ntetenaa-Miu.

²⁷ Kanandio-andio Ipemoikoo rumonsoo somborino tetenaa-Miu andio, kai kongko mpiha i aro-Miu ranta nahina tampulaano. Hangano Omiu, oo Ue umariomo rumonsoo, onaemo ka irinonso ranta nahina tampulaano.”