1 Tawarika 16 - Wunta Mempori

¹ Burua-Do Ue Ala atuu winawa mewinso, ka i'amba ninaa i tonga-tongano kema anu pinasano i Daudi tiano atuu. Ka do'amba mpopesombaako pesomba tinunu ka pesomba tekaduduia i aro-Do Ue Ala.

² Mansano umari mpopesombaako pesomba tinunu ka pesomba tekaduduia, i Daudi rumonso ira tongku atuu a nee-Do i Ue.

³ Ka i'amba sompo mia Isaraeli, moiko tama maupo beine, singge mia tiniaako asa roti bonggoli, asa hea bau ka asa mpole kukisi kisimisi.

⁴ Ipotoro ira mbo'u inso a nto Lewi atuu ba opia mia gagi puu pompekakaako i arono Burua-Do i Ue kai pinebooliako nee-Do i Ue, Ue Alado to Isaraeli ka mpenaniako potarima kasi saru po'unde-unde ndi Ondae.

⁵ Petewawano onaemo i Asapi ka mia ko'orua onaemo i Sakaria, ka i'amba i Yeieli, i Semiramoti, i Yehieli, i Matitia, i Benaya, i Obe-Edomi ka i Yeieli, anu memaeakono gambusu ka katapi, i Asapi anu memaeakono simbali.

⁶ I Benaya ka i Yahasieli, orua ira sando mpesomba anu nahi dohori ineu mompuuri napiri i arono Burua Pedandia-Do Ue Ala.

Penani mpo'unde-undeno i Daudi

⁷ Ia oleo mbo'u atuu, anu amba-ambano i Daudi tumenao i Asapi ka luwuno pepaekompono mpenaniako pontarimakasi ndi Ondae i Ue:

⁸ Pontarimakasimo ndi Ondae i Ue, pebooliakonomo nee-Do, popoto'oriomo winewu-Do i olono luwuno tongku!

⁹ Penaniako Iramo, unde-unde Iramo, popauomo luwuno wineweu-Do anu kinohali-haliako!

¹⁰ Impo'undemo a nee-Do anu mempori, kai mawongkomo aroado mia anu umungke Ira i Ue!

¹¹ Ungke Iramo i Ue ka roso-Do, ungkeomo mpiha rupa-Do!

¹² Imerorambeomo luwuno wineweu-Do anu kinohali-haliako, luwuno pabawa-Do ka luwuno pompakosi anu pinau-Do,

¹³ oo! Ana'ueno i Isaraeli, tetenaa-Do, oo! Luwuno anano i Yako, luwuno mia anu bininiki-Do!

¹⁴ Ondaemo i Ue, Ue Alato, i asa wawontolino melempa pompakosi-Do.

¹⁵ Impewowoloomo pedandia-Do ranta nahina tampulaano, pau anu pinakosi-Do tiano asa nsowu api ntumuwu,

¹⁶ pedandia anu wineweu-Do saru i Burahima, ka sumpa-Do ndi Saki,

¹⁷ anu pinokoroso-Do gagi pompakosi tiano i Yako, gagi pedandia nahina tampulaano tiado to Isaraeli:

¹⁸ Ndi omue ”Aku meweengakono wita Kana'a gagi tia pusaka anu pinakosi tiamu.”

¹⁹ Mansano nami domehadio, asa bawaa mia mehawe i wita atuu,

²⁰ ka mpolio-lio inso a tongku lumako a tongku, inso a asa poparentaa lumako a tongku susua,

²¹ Nahi Dopo'ineeo maupo te'asa mia mokonsii ira; ka mopoto'oriako ira luwuno mokole, hangano ondae,

²² ”Si mensosanggoli ira mia inurapi-Ku, ka si mpoweweu mosa'o a luwuno nabi-Ku!”

²³ Impenanimo tia-Do i Ue, oo asa wawontolino, paleleomo pongkadudui-Do sompo-sompo oleo.

²⁴ Tutuluomo maramba-Do i olono luwuno tongku ka luwuno wineweu-Do anu kinohali-haliako i olono luwuno tongku.

²⁵ Hangano langkai pabawa-Do i Ue ka tedoa inunde-unde, langkaiopo pabawa-Do sekono luwuno anu pinesombai susua.

²⁶ Hangano anu pinesombai susua luwuno tongku, butu lahumoa nahina pengkonaano, sine Ondaemo i Ue anu mokogagio langi.

²⁷ Langkaia ka marambaa kongko i aro-Do, roso ka mawongka kongko a mpo'ianga-Do.

²⁸ Weeako Iramo i Ue, oo luwuno tongku, weeako Iramo i Ue marambaa ka roso!

²⁹ Weeako Iramo i Ue marambano nee-Do, wawaomo pesomba ka pewinsomo pe'aro ndi Ondae! Penggolontuumo pesombai Ira i Ue a maramba memporia.

³⁰ Impondendemo i aro-Do i Ue, oo asa wawontolino; tolino montoro ntu'u, nahi telelu.

³¹ Moikoomo langi mawongko ka tolino mpebooli mpo'unde, moikoomo dompotae mia i olono luwuno tongku, ”Ondae i Ue atuu Mokole!”

³² Moikoomo irundu tahi saru ihino, moikoomo imawongko pada ka luwuno anu mo'ia i larono,

³³ humbee, moikoomo luwuno keu a ntobu domemawongko i aro-Do i Ue, hangano hawe-Do mohuku tolino.

³⁴ Pontarimakasimo ndi Ondae i Ue, hangano moiko Ira! Menteeano ranta nahina tampulaano petenunu ka pompehohawa-Do.

³⁵ Ka potaemo, ”Kadudui kamimo, oo Ue Ala, puu pongkaduduimami, pumpu kamimo ka potola kamimo inso i olono luwuno tongku, ka kimpotarimakasi a nee-Miu anu mempori, ka mpo'unde a laro po'unde-unde ndi Omiu.”

³⁶ Inunde-unde Iramo i Ue, Ue Alado i Isaraeli, inso i ndi'ipua hawe nahina tampulaano. Ka i'amba luwuno bawaa mpotae, ”Ami! Unde-unde Iramo i Ue!”

Mpo'angga a mpesombaa

³⁷ I Daudi bintao i Asapi ka luwuno pepaekompono i ra'ai i arono Burua Pedandia-Do i Ue, ka dopompekakaako mpiha i arono Burua atuu, kana'umpe anu asalakono sompo oleo,

³⁸ tewinso mbo'u i Obe-Edomi ka nomo pulu ka oalu mia luwuno pepaekompono. I Obe-Edomi anano i Yedutuni ka i Hosa, onaemo puu mpodagai pewowa langkai.

³⁹ Sine sando mpesomba Sadoki ka luwuno pepaekompono, luwuno sando mpesomba, ibinta ira i arono Kema Mempori-Do i Ue, a mpesombaa i Gibeoni,

⁴⁰ ka dowela mpopesombaako pesomba tinunu ndi Ondae i Ue i wawono meda pontunua pesomba tinunu mo'oru ka ngkiniwia, menunu saru luwuno anu teburi i larono Taura-Do i Ue anu Doparentaako ira to Isaraeli.

⁴¹ Meronga saru ondae kongko mbo'u i Hemani, i Yedutuni ka luwuno mia tebiniki susuano, anu neeno tiniso kai pontarimakasi ndi Ondae i Ue, ”Menteeano ranta nahina tampulaano petenunu ka pompehohawa-Do.”

⁴² I Hemani ka Yedutuni, to'oriado napiri ka simbali pakeado luwuno puu mpemae, luwuno mbo'u parewa mpenani anu tumonda penani unde-unde-Do Ue Ala. Luwuno anano i Yedutuni medagaio pewowa langkai.

⁴³ Umarino atuu mpekule iramo luwuno tongku atuu, singge mia lumako i rahano. I Daudi mbo'u mekule moweeako ira tabea poronso ndi ondae luwuno ihino rahano.