1 Tawarika 15 - Wunta Mempori

Burua-Do i Ue linimba i Yerusale

¹ I Daudi wangu ira raha langkai tiano koroino i kota Daudi. Ka i'amba mompatinda po'iangano Burua-Do Ue Ala ka mompasaakono kema.

² I tempo atuu motae i Daudi, ”Si hina anu tumandeo Burua-Do Ue Ala sangkadio to Lewi, hangano ondaemo anu bininiki-Do i Ue mentandeo Burua-Do i Ue ka mekakaako Ira hawe nahina tampulaano.”

³ Ka i'amba i Daudi pumpu ira luwu to Isaraeli melako i Yerusale mentandeo Burua-Do i Ue a mpo'ianga anu ipatindaakonomo atuu.

⁴ I Daudi pumpu ira inuleno i Haruni ka to Lewi:

⁵ inso a inuleno i Kehati: i Urieli, petewawano ka pe'etuno, anu porokono asa etu ka rua pulu mia;

⁶ inso a inuleno i Merari: i Asaia, petewawano ka pe'etuno anu porokono rua etu ka rua pulu mia;

⁷ inso a inuleno i Geresoni: i Yo'eli, petewawano ka pe'etuno anu porokono asa etu ka tolu pulu mia;

⁸ inso a inuleno i Elisapani: i Semaya, petewawano ka pe'etuno anu porokono rua etu mia;

⁹ inso a inuleno i Heberoni: i Elieli, petewawano ka pe'etuno anu porokono halu pulu mia;

¹⁰ inso a inuleno i Usieli: i Aminada, petewawano ka pe'etuno anu porokono asa etu ka hopulu ka orua mia.

¹¹ Ka i'amba i Daudi moboio i Sadoki ka i Abiata, orua ira sando mpesomba atuu ka luwuno to Lewi, onaemo i Urieli, i Asaia, i Yo'eli, i Semaya, i Elieli ka i Aminada.

¹² Ipotaeako ira, ”Omiumo petewawa a mpepe'etuado to Lewi. Impokomemporiomo koroimiu, omiu ka luwuno pepaekompomiu, kai mentandeo Burua-Do i Ue, Ue Alado to Isaraeli a mpo'ianga anu kupatindaomo atuu.

¹³ Hangano omiu nahi mehawe a amba-ambano, onaemo ka Dotiu kita i Ue, Ue Alato, hangano nahi tompo'ema pontiso-Do kana'umpe anu asalakono.”

¹⁴ Ka i'amba luwuno sando mpesomba ka to Lewi mpokomemporio koroido ka domentandeo Burua-Do Ue Ala to Isaraeli.

¹⁵ Ka i'amba inuleno i Lewi mentadeakono keu ponsela Burua-Do i Ue Ala atuu a wawo oweado, kana anu iparentaako ira i Musa, montonda pau-Do i Ue.

¹⁶ I Daudi parenta ira luwuno petewawado to Lewi atuu, ka dotena ira luwuno pepaekompodo puu mpenani ka dompenaniako temeroku penani mawongko tinondaako parewa mpenani, gambusu, katapi ka simbali.

¹⁷ To Lewi atuu tumena ira i Hemani anano i Yo'eli ka i Asapi anano i Berekia inso i olono pepaekompono; i Etani anano i Kusaia inso a inuleno i Merari, luwuno pepaekompodo;

¹⁸ ka luwuno mbo'u pepaekompodo inso a ntudano ko'orua: i Sakaria, i Beni, i Yaasieli, i Semiramoti, i Yehieli, i Uni, i Eliabi, i Benaia, i Maaseia, i Matitia, i Elipele, i Mikaneia ka i Obe-Edomi saru i Yeieli, luwuno puu mpodagai pewowa langkai.

¹⁹ Luwuno puu mpenani atuu, i Hemani, i Asapi ka i Etani, asalakono mpemaeakono simbali mala.

²⁰ I Sakaria, i Asieli, i Semiramoti, i Yehieli, i Uni, i Eliabi, i Maaseia ka i Benaia, asalakono mpemaeakono gambusu montonda penani Alamoti.

²¹ I Matitia, i Elipele, i Mikaneia, i Obe-Edomi, i Yeieli ka i Asasia, asalakono mpemaeakono katapi montonda penani Anu Ko'oalu tumondao penani.

²² I Kenanya, petewawado to Lewi mohawe anggaa pontandea; onae gagi petewawano pontandea, hangano onae tumo'orio mongkona atuu.

²³ I Berekia ka i Elikana, onaemo puu mpodagai pewowa i arono Burua;

²⁴ I Sebania, i Yosapati, i Netene'eli, i Amasai, i Sakaria, i Benaia ka i Elieseri, luwuno sando mpesomba atuu, mpopuuri napiri i arono Burua-Do Ue Ala; i Obe-Edomi ka i Yehia, onaemo puu mpodagai pewowa i arono Burua atuu.

²⁵ Ka i'amba i Daudi ka luwuno mia memota'u Isaraeli saru luwuno petewawa sorodadu asa nsowu memawongko ira melako me'alao Burua Pedandia-Do i Ue inso a rahano i Obe-Edomi.

²⁶ Hangano Dotulungi iramo Ue Ala to Lewi anu mpontande Burua Pedandia-Do i Ue atuu, pinesombaakoomo opitu sapi laki ka opitu bimba laki.

²⁷ I Daudi mompokona lemba meloe inso a nsawu lena alusu, kanatuu koa mbo'u luwudo to Lewi anu mentandeo Burua atuu ka luwuno puu mpenani saru i Kenanya gagi petewawado anu wawa ira puu mpenani. I Daudi mompake mbo'u lemba epo inso a nsawu lena.

²⁸ Luwudo to Isaraeli mewawao Burua pedandia-Do i Ue tinondaako peboo-booli ka unino tawuwua, napiri ka simbali saru pemaeno gambusu ka katapi.

²⁹ Tempono Burua-Do i Ue mewinso i kota Daudi, i Mikali ana beineno i Saulu, mentango inso a mpentangoa ka ikitao mokole Daudi melonso-lonso ka melense-lense mawongko. Onaemo pu'uno ipokongkodeio i Daudi i laro aroano.