1 Tawarika 14 - Wunta Mempori

Langkanae ka somborino i Daudi

¹ I Hirami, mokole i Tirusi montena mia lumako ndi Daudi ka mo'oliwi mbo'u keu arasi, puu mpo'angga watu ka puu mpo'angga keu ka ira mpowanguakono asa langkanae.

² Ipokonto'oriomo i Daudi, nine Dopakosiomo i Ue onae gagi mokoledo to Isaraeli, hangano poparentaano tedoa pinelangkai hangano Isaraeli bawaa-Do.

³ I Daudi mo'ala mbo'u ba opia kombiano i Yerusale, ka hinao mbo'u ana ntama ka beine.

⁴ Ndiomo needo luwuno anano anu pine'anaako i Yerusale: i Samua, i Soba, i Natani, i Salomo,

⁵ i Yibahari, i Elisua, i Elapele,

⁶ i Nogahi, i Nepegi, i Yapia,

⁷ i Elisama, i Beeliada ka i Elipele.

I Daudi numangi ira to Pelisiti

⁸ Domerongeomo to Pelisiti, nine i Daudi inurapiomo gagi mokole a luwuno Isaraeli. Ka do'amba melako luwu to Pelisiti ira merakoo i Daudi. Rumongeo mongkona atuu, i Daudi lumako umaropi ira.

⁹ Mansado mehawe to Pelisiti atuu ka dompesapoi i Lembono Repaimi,

¹⁰ i Daudi mo'ema pontiso ndi Ondae Ue Ala, ipotae, ”Nde asalakonoke aku lumako umewai ira to Pelisiti ka nde Komiu meweengako irake a ngkaeku?” Pau-Do i Ue ndi onae, ”Lakomo, Aku koa meweengako ira a ngkaemu.”

¹¹ Ka i'amba i Daudi lumako i Ba'ala-Perasimi ka numangi ira i ra'ai. Motae i Daudi, ”Dorumpaiomo Ue Ala iwaliku molalo ongkue, kana uwoi anu morumpai.” Onaemo ka domeneeakono mia po'ianga atuu Ba'ala-Perasimi.

¹² To Pelisiti mebintao luwuno pinesombaido i ra'ai. Ka i'amba a mpetenano i Daudi, to Isaraeli mentunuo a api.

¹³ Mansano to Pelisiti mposapoi mbo'u i lembono atuu,

¹⁴ i Daudi wali mo'ema pontiso ndi Ondae Ue Ala, ka mepau Ira Ue Ala, ”Si melako i bungkudo, sine impelempamo kumadu ira, ranta kau pokosapoi ira te'aro inso a laro ngkeu murubei.

¹⁵ I tempono urongeo unino lempa a untuno laro ngkeu murubei atuu, asalakono peluarakomo petea, hangano Ondae Ue Ala meluarako Iramo metea i aromiu numangi ira sorodadu to Pelisiti.”

¹⁶ I Daudi weweuo kana parenta-Do Ue Ala ndi onae. Domenangi ira sorodadu to Pelisiti, mompu'u inso i Gibeoni hawe i Geseri.

¹⁷ Onae ka itelelemo neeno i Daudi a luwuno wita ka gagi dinoitoako i olodo luwuno tongku.