1 Tawarika 13 - Wunta Mempori

Burua-Do Ue Ala linimba inso i Kiriati-Yearimi

¹ I Daudi teriso saru luwuno petewawa sorodadu asa nsowu ka sorodadu asa etu saru luwuno mia pinemota'u.

² Mepau i Daudi a luwuno bawaa Isaraeli, ”Tewala impemoikoo ka tewala Dopemoikoo i Ue, Ue Alato, moikoomo tompotena mia a luwuno pepaekompoto anu da mpo'ia a witado to Isaraeli, ka a luwuno mbo'u sando mpesomba ka to Lewi anu mpo'ia a luwuno kota saru wita pompakambia, ka dontepo'asa saru ontae.

³ Moikoomo tomewawao Burua-Do Ue Alato mekule ndi ontae, hangano tempono i Saulu nahi tomperioo.”

⁴ Luwuno bawaa atuu mpotae nine ira meweweuo kanatuu, hangano pinewowolo atuu moiko a pongkitado luwuno tongku.

⁵ Ka i'amba i Daudi pumpu ira luwuno to Isaraeli inso a ngkoro Sikori i Masiri hawe a nsala te'aro i Hamati, ka domewawao Burua-Do Ue Ala inso i Kiriati-Yearimi.

⁶ I Daudi ka luwuno to Isaraeli mpelungka melako i Ba'ala, melako i Kiriati-Yearimi anu tewinso wita Yehuda, ira mewawao inso i ra'ai Burua-Do Ue Ala, Ue anu mentoro i wawono kerubi, anu nee-Do pinebooliako i ra'ai.

⁷ Dome'ulao Burua-Do Ue Ala atuu a laro ngkareta anu wo'ohu inso a rahano i Abinada, ka i'amba i Usa ka i Ahio mese'elungio kareta atuu.

⁸ I Daudi ka luwudo to Isaraeli mpelense-lense i aro-Do Ue Ala tompaano rosodo, tinondaako penani, katapi, gambusu, rabana, simbali ka napiri.

⁹ Tempono domehawe a mposesaano i Kidoni, i Usa tumasio kaeno ka uminio Burua atuu, hangano sapi atuudo telendo.

¹⁰ Tensilaomo tekuda-Do i Ue ndi Usa. Dopepateo i Usa, hangano i'inio Burua atuu. Kanandiomo imate i ra'ai i aro-Do Ue Ala.

¹¹ Nahi pesanaao i Daudi hangano i Usa Dotiuomo i Ue tedoa mongkokongiri, onaemo po'iangaa atuu ka inineeako Peresi-Usa hawe kanandio-andio.

¹² Itempo atuu i Daudi doito ndi Ondae Ue Ala, ipotae, ”Kana'umpe aku mokowawao Burua-Do Ue Ala atuu a mpo'iangaku?”

¹³ Onaemo pu'uno i Daudi nahi limbao Burua atuu a mpo'iangano, i kota Daudi, sine pansia ka iwawao a rahano i Obe-Edomi, to Gati.

¹⁴ Burua-Do Ue Ala kongko a rahano i Obe-Edomi, meronga somborino i larono otolu wula. Ondae i Ue rumonsoo somborino i Obe-Edomi ka luwuno arataano.